မကွေးတိုင်း၊ ပေါက်မြို့နယ်မှာ  မတ် ၃၁ ရက်က စစ်ကောင်စီတပ်ရဲ့ ပစ်ခတ်မှုကြောင့် ကလေးငယ်တယောက်၊ ကျောင်းဆရာတယောက်နဲ့ ရပ်ကျေး ပြည်သူ့ကာကွယ်ရေးတပ်ဖွဲ့ဝင် ၂ ယောက်တို့ သေဆုံးခဲ့တယ်လို့ ပေါက်အခြေစိုက် တော်လှန်ရေးတပ်ဖွဲ့ဝင်တွေဆီကနေ သိရပါတယ်။

ပေါက်အခြေစိုက် တော်လှန်ရေးတပ်ဖွဲ့ဝင်တယောက်က “ဖြစ်စဥ်တွေကတော့ မတူဘူးဗျ။ အသက် ၁၃ နှစ်အရွယ် သမီးငယ်လေး ဆုံးသွားတာက စစ်တပ်ရဲ့ လက်နက်ကြီးထိလို့ပါ။ ကျောင်းဆရာတယောက်နဲ့ ရပ်ကျေး ပကဖရဲဘော် ၂ ယောက်တို့ ကျသွားရတာက ချောင်းပြီး အပစ်ခံရတာပါ” လို့ ပြောပါတယ်။

မတ် ၃၁ ရက်မှာ စစ်ကောင်စီတပ်လက်အောက်ခံ ကပစ ၂၄ ထဲကနေ လက်နက်ကြီးနဲ့ ပစ်ခတ်ခဲ့လို့ အဆိုပါ ကပစ ၂၄ နဲ့ ၃ မိုင်ဝန်းကျင်သာ ကွာဝေးတဲ့ ပလောင်းကျေးရွာအတွင်း ကျရောက်ပေါက်ကွဲခဲ့တာကြောင့် ၁၃ နှစ်အရွယ် မိန်းကလေးငယ်တယောက် ဗုံးစထိမှန်ပြီး ဝမ်းဗိုက်မှာရရှိခဲ့တဲ့ ဒဏ်ရာကြောင့် သေဆုံးသွားခဲ့ကာ လူနေအိမ် ၃ လုံးထက်မနည်း ထိခိုက်ပျက်စီးခဲ့တယ်လို့ ဆိုပါတယ်။

ပေါက်မြို့နယ် ပြည်သူ့ကာကွယ်ရေးအဖွဲ့ရဲ့ ပြန်ကြားရေးတာဝန်ခံ ကိုစစ်မုန်းက “နယ်မြေအခြေအနေကြည့်ဖို့ သွားကြတာက ၆ ယောက်ဗျ။ ပေါက်မြို့ပေါ်နဲ့ ကပစ ၂၄ ဆက်သွယ်ထားတဲ့လမ်းပိုင်းက သူတို့ စစ် (--) တွေဘက်က ထိန်းချုပ်ထားတယ်။ သူတို့တွေ အဲဒီလမ်းပိုင်းပေါ် အရောက်မှာ ကင်းစောင့်နေတဲ့  စစ် (-) တွေက ချောင်းပြီးပစ်တော့ NUG ရဲ့ ကြားကာလပညာရေးစာသင်ကျောင်းတွေမှာ လိုက်ပြီး စာသင်ပေးနေတဲ့ ကျောင်းဆရာ တယောက်ရယ်၊ ရပ်ကျေး ပကဖ ရဲဘော် ၂ ယောက်တို့ ကျသွားတယ်။ ကျန်တဲ့ ၃ ယောက်ကတော့ အရှောင်မြန်လို့ လွတ်လာကြတယ်။ စနိုက်ပါနဲ့ အပစ်ခံရတယ်လို့ ယူဆတယ်” လို့ ပြောပါတယ်။

သေဆုံးသွားတဲ့ ကျောင်းဆရာနဲ့ ရပ်ကျေး ပကဖ ရဲဘော်တွေရဲ့ ရုပ်အလောင်းတွေကို ကောင်းမွန်စွာ သင်္ဂြိုဟ်ပေးနိုင်ခဲ့တယ်လို့လည်း သူက ဆက်ပြောပါတယ်။

အမျိုးသားညီညွတ်ရေးအစိုးရအနေနဲ့ မတ် ၂၈ ရက်မှာ လှုပ်ခတ်သွားတဲ့ ငလျင်ဒဏ်သင့် ပြည်သူတွေကို အရေးပေါ် ကယ်ဆယ်ရေးလုပ်ငန်းတွေ ဆောင်ရွက်နိုင်ဖို့ ၂ ပတ်ကြာ ရပ်နားထားမယ်လို့ ကြေညာပြီးတဲ့နောက် ကပစ ၂၄ ထဲကနေ ပလောင်းကျေးရွာကို အခုလို လက်နက်ကြီးနဲ့ ပစ်ခတ်ခဲ့တာဖြစ်ပါတယ်။

ငလျင်ဘေး ကူညီကယ်ဆယ် ပြန်လည်ထူထောင်ရေးလုပ်ငန်းတွေကို အရှိန်အဟုန်နဲ့ ဆောင်ရွက်နိုင်စေဖို့ ဧပြီ ၂ ရက်ကနေ ၂၂ ရက်အထိ ယာယီပစ်ခတ်တိုက်ခိုက်မှုရပ်စဲရေး ကာလအဖြစ် သတ်မှတ်ထားတယ်လို့ စစ်ကောင်စီတပ်ဘက်ကလည်း ထုတ်ပြန်ထားပါတယ်။