မွန်ပြည်နယ်၊ ကျိုက်ထိုမှာ မတ် ၂၃ ရက် ညနေပိုင်းက စစ်ကောင်စီ လက်အောက်ခံ အထူးစုံစမ်းစစ်ဆေးရေးဦးစီးဌာနက အရာရှိ ၃ ယောက် ပစ်ခတ်ခံရလို့ ၂ ယောက် သေဆုံးပြီး တယောက် ဆေးရုံတင်ထားရတယ်လို့ မြို့ခံတွေဆီက သိရပါတယ်။
မနေ့ ညနေ ၅ နာရီခွဲက ကျိုက်ထိုမြို့နယ်၊ ကြာဖြူကျေးရွာထိပ်-ခမိတ်အစိုးရ ရာဘာခြံအနီး ရန်ကုန်-မော်လမြိုင် ကားလမ်းပေါ်မှာ ပစ်ခတ်ခံရတာလို့ မြိုခံတယောက်က DVB ကို ပြောပါတယ်။
“စသုံးလုံးက အဖွဲ့တွေ ယာဥ်စစ်ဆေးရေးနဲ့ သတင်းထောက်လှမ်းနေတဲ့အချိန် ပစ်ခံရတာ အရာရှိတွေ သေလို့ စစ်တပ်ပါ ဆင်းလာပြီး စစ်ဆေးနေတယ်။ ဘယ်အဖွဲ့က ပစ်တယ်ဆိုတာတော့ မသိဘူး။”
ပစ်ခတ်မှုကြောင့် ဒုစုံစမ်းစစ်ဆေးရေးမှူး မင်းသူနဲ့ လက်ထောက်စုံစမ်းစစ်ဆေးရေးမှူး မျိုးသန့်တို့ အခင်းဖြစ်ရာနေရာမှာ သေဆုံးခဲ့ပြီး စုံစမ်းစစ်ဆေးရေးမှူး သူရစိုး ဒဏ်ရာရရှိခဲ့အတွက် ဆေးရုံတင်ထားရတယ်လို့ ခရိုင်အုပ်ချုပ်ရေးနဲ့ နီးစပ်တဲ့ သတင်းရင်းမြစ်က ပြောပါတယ်။
“အရာရှိငယ် ၂ ယောက် သေတယ်။ ဒဏ်ရာရတဲ့ အရာရှိကလည်း စိုးရိမ်ရတဲ့အနေအထားပဲ။ ကျိုက်ထိုဆေးရုံကနေ စစ်ဆေးရုံကို လွှဲထားရတယ်။”
လတ်တလောမှာ ရန်ကုန်-မော်လမြိုင် ကားလမ်းတလျှောက်နဲ့ ပစ်ခတ်မှုဖြစ်ရာ ကြာဖြူကျေးရွာ အနီးမှာ စစ်ကောင်စီတပ်နဲ့ ရဲတွေက စစ်ဆေးနေတယ်လို့ မြို့ခံတွေက ပြောပါတယ်။
ကျိုက်ထိုမြို့နယ် အထူးစုံစမ်းစစ်ဆေးရေးဦးစီးဌာနက အရာရှိတွေဟာ ကျိုက်ထိုခရိုင်အတွင်းရှိ ကျိုက်ထိုနဲ့ ဘီးလင်းမြို့က နိုင်ငံရေးတက်ကြွလှုပ်ရှားသူတွေ စုံစမ်းပြီး စစ်တပ်ကို ပေးပို့နေရတာ ဖြစ်ပါတယ်။
