မြန်မာစစ်အာဏာသိမ်းအဖွဲ့က သူတို့တပ်ဖွဲ့တွေဟာ အရင်နေ့ကပဲ တရုတ်ကြက်ခြေနီ အကူအညီပေးရေးယာဉ်တန်းကို သတိပေး ပစ်ခတ်ခဲ့တယ်လို့ ပြောကြားပြီးနောက်မှာ မြန်မာနိုင်ငံရောက် တရုတ်နိုင်ငံရဲ့ ကယ်ဆယ်ရေးအဖွဲ့နဲ့ ကယ်ဆယ်ရေးပစ္စည်းတွေ ဘေးကင်းကြောင်း တရုတ်နိုင်ငံခြားရေးဝန်ကြီးဌာနက ဧပြီ ၂ ရက်မှာ ပြောကြားခဲ့ပါတယ်။
“တရုတ်ကြက်ခြေနီအသင်းက ပေးအပ်တဲ့ သဘာဝဘေး ကယ်ဆယ်ရေးပစ္စည်းတွေ မြန်မာနိုင်ငံကို ရောက်ရှိနေပြီး မန္တလေးတိုင်းဒေသကြီး သဘာဝဘေးသင့်ဒေသကို ပို့ဆောင်ပေးနေကြောင်းနဲ့ လက်ရှိမှာ ကယ်ဆယ်ရေးဝန်ထမ်းတွေနဲ့ ကယ်ဆယ်ရေးပစ္စည်းတွေ ဘေးကင်းပါကြောင်း” နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကိုကျားကွန့်က ဗုဒ္ဓဟူးနေ့မှာ ပြုလုပ်တဲ့ ပုံမှန်သတင်းစာရှင်းလင်းပွဲမှာ ပြောပါတယ်။
မြန်မာနိုင်ငံရှိ အင်အားစုအားလုံးအနေနဲ့ ငလျင်ကယ်ဆယ်ရေးကို သူတို့ရဲ့ အဓိကတာဝန်အဖြစ် ဆောင်ရွက်ဖို့နဲ့ တရုတ်နိုင်ငံ အပါအဝင် နိုင်ငံအားလုံးမှ ကယ်ဆယ်ရေးဝန်ထမ်းတွေနဲ့ ပစ္စည်းတွေ ဘေးကင်းလုံခြုံမှုရှိစေဖို့ကို တရုတ်နိုင်ငံက မျှော်လင့်ထားတယ်လို့လည်း ဆိုပါတယ်။
တချိန်တည်းမှာပဲ ကယ်ဆယ်ရေးအတွက် သယ်ယူပို့ဆောင်ရေးလမ်းကြောင်းတွေကို အတားအဆီး မရှိစေဖို့ သေချာစေရမယ်လို့လည်း ကိုကျားကွန့်က ပြောပါတယ်။
တရုတ်ကြက်ခြေနီ အကူအညီပေးရေး ယာဉ်တန်းဟာ ပဋိပက္ခဇုန်မှာ မောင်းနှင်နေတုန်း စစ်တပ်က ရပ်တန့်ဖို့ ညွှန်ကြားချက်ကို မလိုက်နာတာကြောင့် သူ့တပ်ဖွဲ့ဝင်တွေက သတိပေး ပစ်ခတ်ခဲ့တာ ဖြစ်ကြောင်း စစ်ကောင်စီက ဗုဒ္ဓဟူးနေ့မှာ ပြောပါတယ်။
စစ်အုပ်စုရဲ့ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကတော့ ဒီဖြစ်ရပ်ဟာ ဧပြီလ ၁ ရက် အင်္ဂါနေ့ နှောင်းပိုင်းမှာ ဖြစ်ပွားခဲ့ပြီး တရုတ်ကြက်ခြေနီအသင်းက အဲဒီဒေသမှာ သူတို့ရှိနေတာကို အစိုးရ သို့မဟုတ် သံရုံးကို အသိပေးခဲ့ခြင်း မရှိဘူးလို့ ပြောပါတယ်။
ဒေသတွင်း မော်တော်ယာဉ်တွေပါ ပါဝင်နေတဲ့ အဲဒီယာဉ်တန်းဟာ ရပ်တန့်ဖို့ ပျက်ကွက်ခဲ့ပြီးနောက်မှာ လုံခြုံရေးအဖွဲ့က သေနတ်နဲ့ပစ်ခတ်ခဲ့ကြောင်း ဆိုပါတယ်။
Source : Reuters
