ပဲခူးတိုင်း၊ တောင်ငူမြို့နယ်မှာ မတ် ၂၁ ရက် မနက် ၉ နာရီဝန်းကျင်က ဆိုင်ကယ်စီးလာတဲ့ ရဲတပ်ဖွဲ့ဝင်တွေ ပစ်ခတ်ခံရလို့ ဒုရဲအုပ်တယောက် သေဆုံးတယ်လို့ တောင်ငူအခြေစိုက် တော်လှန်ရေးတပ်ဖွဲ့တွေဆီကနေ သိရပါတယ်။

တောင်ငူ-သံတောင် လမ်းပိုင်းပေါ်က အမှတ် ၃ ရဲစခန်းနဲ့ အမှတ် ၁၁ ရဲတပ်ရင်း ၂ ခုကြားမှာ ပစ်ခတ်မှုဖြစ်ပွားခဲ့တာပါ။ 

ပဲခူးခရိုင် ပကဖ တာဝန်ခံ ရဲဘော်တယောက်က “တောင်ငူ အမှတ် ၃ ရဲစခန်းကနေ တောင်ငူဘက်ကို ဆိုင်ကယ်စီးလာတဲ့ ရဲ ၂ ယောက်ကို တောင်ငူ-သံတောင်သွား လမ်းပေါ်က အင်းဝိုင်းရွာနဲ့ မိုးကောင်းရွာကြားမှာ တောင်ငူအခြေစိုက် တော်လှန်ရေးတပ်ဖွဲ့ကနေ ဆိုင်ကယ်နဲ့ ဘေးချင်းကပ်ပြီး လိုက်ပစ်ခတ်ခဲ့တာပါ” လို့ ပြောပါတယ်။

အဆိုပါပစ်ခတ်မှုကြောင့် ဆိုင်ကယ်ပေါ်လိုက်ပါလာတဲ့ ဒုရဲအုပ်တယောက် သေဆုံးသလို သူ ကိုင်ဆောင်တဲ့ ခြောက်လုံးပြူးသေနတ်တလက်ကိုလည်း သိမ်းဆည်းရရှိခဲ့တယ်လို့ ပဲခူးတိုင်း စစ်ရေးတာဝန်ခံ ရဲဘော်တယောက်က ပြောပါတယ်။

“ဆိုင်ကယ်စီးလာတဲ့ ၂ ယောက်ထဲက တယောက် ဒဏ်ရာနဲ့ လွတ်သွားပြီးတော့ ဒုရဲအုပ်ကတော့ သေပြီး ဆိုင်ကယ်ပေါ်ကနေ ပြုတ်ကျကျန်ခဲ့တယ်။ အလောင်းက ရဲတပ်ရင်း ၁၁ က လာသယ်သွားတယ်။ သူကိုင်တဲ့ ခြောက်လုံးပြူးကိုတော့ သိမ်းလာနိုင်တယ်။”

ပစ်ခတ်မှုပြီးနောက်ပိုင်း စစ်ကောင်စီဘက်က လုံခြုံရေးတွေ တိုးမြှင့်ထားပါတယ်။

အဆိုပါဖြစ်စဥ်နဲ့ပတ်သက်ပြီး သက်ဆိုင်ရာ တော်လှန်ရေးတပ်ဖွဲ့တွေဘက်က သတင်းတစုံတရာ ထုတ်ပြန်လာတာ မတွေ့ရသေးသလို ဖြစ်စဥ်နဲ့ပတ်သက်ပြီး အသေးစိတ်သိနိုင်ဖို့ တောင်ငူ အမှတ် ၃ ရဲစခန်းကို DVB က ဖုန်းနဲ့ အကြိမ်ကြိမ်ဆက်သွယ်ခဲ့ပေမဲ့ လက်ခံဖြေဆိုသူ မရှိပါဘူး။

ပဲခူးတိုင်းအတွင်း စစ်ရေးအခြေအနေ တင်းမာနေတဲ့အတွက်ကြောင့်လည်း ပြည်သူတွေအနေနဲ့ သတိ၀ီရိယထား နေထိုင်သွားလာကြဖို့ ပဲခူးတိုင်းအခြေစိုက် တော်လှန်ရေးတပ်ဖွဲ့တွေက တိုက်တွန်းထားပါတယ်။