မြန်မာ့ငလျင်ဘေး ကူညီရာမှာ အလိမ်အညာတွေကို သတိပြုကြဖို့ အလှူရှင်တွေကို တိုက်တွန်းလိုက်တဲ့အကြောင်း ဧပြီ ၃ ရက် The Mainichi  ဂျပန်သတင်းတပုဒ်မှာ ဖော်ပြပါတယ်။

လတ်တလောမှာတော့ မြန်မာနိုင်ငံအလယ်ပိုင်းမှာ လှုပ်ခတ်ခဲ့တဲ့ ငလျင်ဘေးဒဏ်သင့် ပြည်သူတွေကို ကူညီနိုင်ဖို့ ဂျပန်နိုင်ငံမှာ ရန်ပုံငွေရှာဖွေရေးလုပ်ငန်းတွေ စတင်လုပ်ဆောင်နေပြီ ဖြစ်တာကြောင့် အဆိုပါ ပရဟိတလုပ်ဆောင်မှုတွေကနေ လိမ်လည်အမြတ်ထုတ်ဖို့ ကြိုးပမ်းနေတာတွေကိုလည်း သတိပြုဖို့ နှိုးဆော်လိုက်တာပါ။

လွန်ခဲ့တဲ့ ၂၀၁၁ ခုနှစ်တုန်းက ဂျပန်နိုင်ငံအရှေ့ပိုင်းမှာ လှုပ်ခတ်ခဲ့တဲ့ ငလျင်ဘေးကူညီရာမှာ ဂိုဏ်းစတားတယောက် အပါအဝင် အမျိုးသား ၄ ယောက်ကို လိမ်လည်အလှူခံမှုနဲ့ ဖမ်းဆီးခဲ့ရတယ်လို့ ဆိုပါတယ်။

အသက် ၃၀ နဲ့ ၄၀ ကြားအရွယ်တွေဖြစ်တဲ့ အဆိုပါအမျိုးသား ၄ ယောက်ဟာ ငလျင်လှုပ်ခတ်မှုအပြီး ၄ ရက်အကြာကနေ စတင်ပြီး ဂျပန်နိုင်ငံအနောက်ပိုင်း ကန်ဆိုင်းဒေသထဲက အိုဆာကာ၊ ဟျိုဂို၊ နာယာ စတဲ့ နေရာတွေရဲ့ လမ်းမတွေပေါ်မှာ အချိန် ၂ လကြာလောက် ရန်ပုံငွေရှာ အလှူငွေ ကောက်ခံခဲ့ကြတာဖြစ်ပြီး အဲဒီကရရှိငွေ စုစုပေါင်း ယန်း ၃၈၀,၀၀၀ လောက်ကို လိမ်လည်ခဲ့ကြတာလို့ သတင်းမှာ ဖော်ပြပါတယ်။

သူတို့ဟာ အလှူခံသေတ္တာတွေ သယ်ဆောင်လာပြီး ဘူတာရုံတွေနဲ့ အများသူငါ သွားလာနေကြတဲ့ နေရာတွေအနီးမှာ အလှူခံခဲ့ကြတာဖြစ်ပြီး သူတို့နဲ့အတူ လုပ်ဆောင်သူ အသိမိတ်ဆွေ ၁၂ ယောက် ရှိတယ်လို့ ထွက်ဆိုခဲ့ကြသလို တူညီဝတ်စုံတွေနဲ့ “ကန်ဆိုင်း စေတနာ့ဝန်ထမ်းအသင်း” က ဖြစ်တယ်ဆိုကာ “သဘာဝဘေးဒဏ်ခံရသူတွေကို ကျွန်ုပ်တို့ ကူညီပံ့ပိုးပေးနေပါတယ်” လို့ ရိုက်နှိပ်ထားတဲ့ လက်ကမ်းစာစောင်တွေကိုလည်း ထုတ်ပေးခဲ့ကြတယ်လို့ ဆိုပါတယ်။

အလားတူ သီးခြားဖြစ်ရပ်တခုမှာလည်း အသက် ၂၀ ဝန်းကျင် အမျိုးသားတယောက်က ငလျင် လှုပ်ခတ်မှုအပြီး ၁ ပတ်လောက်အကြာမှာ ငလျင်ကယ်ဆယ်ရေးရန်ပုံငွေလို့ ရေးထားတဲ့  ကတ်ထူပြားအလှူပုံးပါ စက်ဘီးတစီးနဲ့အတူ လမ်းသွားလမ်းလာတွေဆီက အလှူခံရင်း ယန်း ၁၂,၀၀၀ လိမ်လည်ခဲ့သလို အသက် ၅၀ အရွယ် အမျိုးသားတယောက်ကလည်း သက်ကြီး အဘွားအိုတဦးရဲ့ နေအိမ်မှာ သဘာဝဘေးဒုက္ခသည်တွေအတွက် အလှူငွေ ကောက်ခံနေတယ် ပြောကာ ဘဏ်အကောင့်ထဲ ငွေလွှဲလိမ်လည်ဖို့ ကြိုးစားမှုနဲ့ ဖမ်းခံခဲ့ရကြောင်း သတိပေးထားတာပါ။

မြန်မာနိုင်ငံမှာ မတ် ၂၈ ရက်က စစ်ကိုင်းမြို့အနီးကို ဗဟိုပြုပြီး လှုပ်ခတ်ခဲ့တဲ့ အင်အား ၇ ဒသမ ၇ ရစ်ချ်တာစကေး ရှိတဲ့ ငလျင်ကြောင့် ထိခိုက်သေဆုံးသူ စုစုပေါင်း ၃,၈၆၆ ယောက်အထိ ရှိနေပြီလို့ ဧပြီ ၂ ရက် ည ၈ နာရီအထိ  DVB က ကောက်ယူရရှိတဲ့ စာရင်းတွေအရ သိရပါတယ်။

လတ်တလောမှာတော့ ဂျပန်နိုင်ငံ စားသုံးသူရေးရာအေဂျင်စီက ဘေးအန္တရာယ်တွေ ဖြစ်ပွားတဲ့အခါ ရန်ပုံငွေရှာဖွေတဲ့ အဖွဲ့အစည်းတွေက လှူဒါန်းမှုတွေ၊ အသုံးပြုမှုတွေကို ဂရုတစိုက် စစ်ဆေးဖို့နဲ့ မူဝါဒအပေါ် ကျေနပ်မှုရှိမှသာ လှူဒါန်းကြဖို့ ပြည်သူတွေကို တိုက်တွန်းထားပါတယ်။

Source: The Mainichi