မြန်မာပရိသတ်တွေနဲ့ ရင်းနှီးပြီးသားဖြစ်တဲ့ ကိုရီးယားအနုပညာရှင်တွေနဲ့ အဆိုတော် အိုင်ဒေါတွေက  မြန်မာ့ငလျင်အတွက် နိုင်ငံတကာအဖွဲ့တွေကနေတဆင့် ငွေကြေးတွေ လှူဒါန်းခဲ့ကြတယ်လို့ ကိုရီးယားသတင်းတွေမှာ ဖော်ပြပါတယ်။

Goblin၊ Exhuma နဲ့ Love in the Big City တို့နဲ့ မြန်မာပရိသတ် အခိုင်အမာရှိထားတဲ့ သရုပ်ဆောင် ဂင်မ်ဂိုအွန်းက ဝမ် သန်း ၅၀ လှူဒါန်းခဲ့ပြီး “အိုးအိမ်တွေ ဆုံးရှုံးသွားရတဲ့ မြန်မာပြည်သူတွေအကြောင်း ကြားသိရတာ စိတ်နှလုံးကွဲကြေရပါတယ်။ အခုလို ဆုံးရှုံးသွားတဲ့ ပြည်သူတွေအတွက်လည်း ကျမရင်ထဲကနေ အားပေးစကားဆိုပေးချင်ပါတယ်” လို့ ပြောပါတယ်။၊

ဒါ့အပြင် သရုပ်ဆောင် အဆိုတော် အင်မ်စီဝမ် (Im Si-wan) ကလည်း မြန်မာငလျင်အတွက် ဝမ်သန်း ၃၀ လှူဒါန်းခဲ့ကြောင်း UNICEF က ဖော်ပြထားပါတယ်။

ယူနီဆက်ဖ်ကိုရီးယားကော်မတီ အထွေထွေအတွင်းရေးမှူး ဂျိုမီဂျင်က “Im Si-wan က မြန်မာနိုင်ငံက ကလေးငယ်တွေအတွက် အဖိုးတန်သော အလှူငွေများကို လှူဒါန်းခဲ့ပါတယ်၊ ဒီရန်ပုံငွေက ရုတ်တရက် သဘာဝဘေးအန္တရာယ်ကြောင့် ကြောက်လန့်တကြား စိတ်ပျက်လက်ပျက်ဖြစ်ခဲ့ရတဲ့ ငလျင်ဒဏ်ခံခဲ့ရသူတွေအတွက် ကြီးစွာတဲ့ နှစ်သိမ့်မှုတခု ဖြစ်လိမ့်မယ်” လို့ ပြောပါတယ်။

ဒါ့အပြင် အမျိုးသမီး KPop အဖွဲ့တခုဖြစ်တဲ့  (G)I-DLE အဖွဲ့ဝင် ထိုင်းနိုင်ငံသူ Minnie ကလည်း  မြန်မာ-ထိုင်း ငလျင်ဘေးအတွက် ဝမ်သန်း ၁၀၀ လှူဒါန်းခဲ့ကြောင်း သိရပါတယ်။

မတ် ၂၈ ရက်က လှုပ်ခတ်ခဲ့တဲ့ ပြင်းအား ၇ ဒသမ ၇ ရစ်ချ်တာစကေးရှိ ငလျင်ကြောင့်  ဧပြီ ၁ ရက် မြန်မာစံတော်ချိန်  ည ၈ နာရီအထိ စုစုပေါင်း သေဆုံးသူ ၃,၇၅၆ ယောက်၊ ထိခိုက်ဒဏ်ရာရရှိသူ ၄,၅၇၅ ယောက်နဲ့ ပျောက်ဆုံးနေသူ ၇၀၅ ယောက်ရှိကြောင်း DVB က ကောက်ယူစုဆောင်းထားတဲ့ စာရင်းတွေအရ သိရပါတယ်။