မြန်မာနိုင်ငံမှာ ပျက်စီးဆုံးရှုံးမှုတွေနဲ့ ကြုံတွေ့ခဲ့ရတဲ့ အင်အားပြင်း ငလျင်ဘေးကို တုံ့ပြန် ဆောင်ရွက်ဖို့ ယန်း သန်း ၉၀၀ (အမေရိကန်ဒေါ်လာ ၆ သန်းခန့်) တန်ဖိုးရှိ အရေးပေါ် အကူအညီတွေ ပေးအပ်ဖို့ အဆင်သင့်ဖြစ်နေပြီလို့ ဂျပန်အစိုးအဖွဲ့ အတွင်းဝန်ချုပ် ယိုရှိမာဆာ ဟာယာရှီက ဧပြီ ၂ ရက် သတင်းစာရှင်းပွဲမှာ ကြေညာပါတယ်။ 

မစ္စတာ ယိုရှိမာဆာ ဟာယာရှီက“နိုင်ငံတကာ အဖွဲ့အစည်းတွေကနေတဆင့် ပံ့ပိုးသွားမှာဖြစ်ပြီး ဂျပန်အစိုးရအနေနဲ့ မြန်မာပြည်သူပြည်သားတွေကို တိုက်ရိုက်အကျိုးပြုမယ့် လူသားချင်းစာနာ ထောက်ထားမှုဆိုင်ရာ အကူအညီတွေကိုဆက်လက်ပြီးတော့ ပံ့ပိုးကူညီသွားမှာဖြစ်သလို အကျပ်အတည်းရင်ဆိုင်နေရတဲ့ မြန်မာပြည်သူပြည်သားတွေကို ကူညီပံ့ပိုးပေးမယ့် ကျနော်တို့ရဲ့ တသမတ်တည်းသော မူဝါဒနဲ့အညီ မြန်မာပြည်သူတွေဘက်မှာ အမြဲရပ်တည် ဆက်လက်ပြီး ပံ့ပိုးပေးသွားမှာပါ”လို့ ပြောပါတယ်။

လက်ရှိ ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA)  ကတဆင့် အရေးပေါ် ကယ်ဆယ်ရေးပစ္စည်းတွေ ထောက်ပံ့ပေးဖို့နဲ့ အဖွဲ့ဝင် ၃၂ ယောက်ပါတဲ့ ဂျပန်သဘာဝဘေးကယ်ဆယ်ရေးဆေးအဖွဲ့ကို   မြန်မာနိုင်ငံဆီ စေလွှတ်ထားပါတယ်။

ဧပြီ ၂ ရက်မှာ တာပေါ်လင် ၂၄၀ နဲ့  ရွက်ဖျင်တဲ ၄၅၀ တို့နဲ့အတူ သူတို့ရဲ့ လှုပ်ရှားမှုတွေ စတင်ဖို့ စီစဉ်ထားပြီး  အနာဂတ်မှာ ရေနဲ့ ရေသန့်စင်စက်တွေ ထုတ်ပေးဖို့လည်း ဂျပန်အစိုးရက စီစဉ်နေတယ်လို့ ပြောပါတယ်။