နိုင်ငံတဝန်း ငလျင်ဒဏ်ကြောင့် စိတ်သောကရောက်နေချိန် ဧရာဝတီတိုင်း၊ လေးမျက်နှာမြို့နယ်မှာ စစ်ကောင်စီတပ်က ဗုံးကြဲတိုက်ခိုက်တာကြောင့် အရပ်သားတွေ ထိခိုက်သေဆုံးမှု ရှိနေတယ်လို့ ဒေသခံတွေဆီကနေ သိရပါတယ်။
စစ်ကောင်စီတပ်က မတ် ၃၁ ရက်မှာ ဝါးတောကွင်းကျေးရွာကို ဗုံးကြဲတိုက်ခိုက်ခဲ့တာကြောင့် ထင်းခုတ်၊ လယ်ယာလုပ်ငန်းလုပ်နေတဲ့ အရပ်သား ၂ ယောက် သေဆုံးခဲ့ကာ နောက်ထပ်တယောက် ထိခိုက်ဒဏ်ရာရရှိခဲ့ပြီး အရပ်သားတွေရဲ့ နေအိမ် ၈ လုံးထက်မနည်းပါ မီးလောင်ကျွမ်းခဲ့တယ်လို့ ဆိုပါတယ်။
ဒေသခံတယောက်က “ဗုံးကြဲခံရတဲ့ရွာက လေးမျက်နှာနဲ့ အင်္ဂပူအစပ်က ရွာပါ။ သေဆုံးသူတွေကတော့ ဘယ်ရွာကလဲတော့ မသိပါဘူး။ အားလုံး ၂ ယောက်က ဆုံးသွားတယ်လို့ သိရတယ်။ နောက်ထပ်တယောက်လည်း ပြင်းထန်တဲ့ဒဏ်ရာ ရရှိသွားတယ်။ စစ်ကောင်စီတပ်က ဗုံးကြဲတဲ့နေရာတွေက အရပ်သားတွေချည်းပဲနေတဲ့ နေရာတွေပါ” လို့ ပြောပါတယ်။
စစ်ကောင်စီတပ်က ကျုံပျော်အခြေစိုက် ခလရ ၆၃ တပ်ကနေ စက်တပ်လေထီးတွေနဲ့ လေးမျက်နှာ၊ ရေကြည် စတဲ့ ရခိုင်ပြည်နယ်ရဲ့အစပ် ကျေးရွာတွေကို ပြီးခဲ့တဲ့ မတ်လ ဒုတိယ အပတ်ကတည်းက လေကြောင်းနဲ့ ပစ်ခတ်တိုက်ခိုက်နေတာလို့ ဆိုပါတယ်။
ရေကြည်၊ သာပေါင်း၊ လေးမျက်နှာ၊ အင်္ဂပူ စတဲ့မြို့နယ်တွေဘက်မှာ အကြမ်းဖက်သမားတွေ ရှိနေတာကြောင့် စက်တပ်လေထီးတွေ၊ လေယာဉ်တွေနဲ့ လုံခြုံရေးလုပ်ငန်းတွေ လုပ်ဆောင်နေတာရှိတယ်လို့ စစ်ကောင်စီတပ် အရာရှိတယောက်က ဆိုပါတယ်။
စစ်ကောင်စီဟာ ပြည်သူတွေ ငလျင်ဒဏ်ခံစားနေရချိန်မှာ ဧရာဝတီတိုင်း၊ မကွေးတိုင်း၊ ရခိုင်ပြည်နယ်နဲ့ ကချင်ပြည်နယ်တွေဘက်မှာ စက်တပ်လေထီးတွေ၊ ဒရုန်းတွေ၊ လေယာဉ်တွေ အသုံးပြုပြီး ဗုံးကြဲတိုက်ခိုက်နေတယ်လို့ ဒေသခံတွေရဲ့ ပြောပြချက်အရ သိရပါတယ်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန အနေနဲ့ ငလျင်ဒဏ်ခံစားနေရတဲ့ အရပ်သားပြည်သူတွေကို စာနာတဲ့အနေနဲ့ ထိုးစစ်ကို နှစ်ပတ်ကြာ ရပ်တန့်ထားမယ်လို့ သတင်းထုတ်ပြန်ထားပါတယ်။
