ရန်ကုန်၊ မြောက်ဥက္ကလာပမြို့နယ်၊ ရွှေပေါက်ကံမြို့သစ်မှာ ဧပြီ ၁ ရက် ည ၉ နာရီက စစ်တပ်၊ ရဲနဲ့ အုပ်ချုပ်ရေးအဖွဲ့တွေက ပူးပေါင်းကာ ရခိုင်လိုင်းခန်းတွေကို ဧည့်စာရင်းစစ်ဆေးခဲ့ပြီး ဖမ်းဆီးခံရသူတချို့ ရှိတယ်လို့ မြို့ခံတွေဆီက သိရပါတယ်။
မနေ့ည ၉ နာရီက ရွှေပေါက်ကံမြို့သစ်အတွင်းမှာ စစ်ကောင်စီယာဥ်တန်း၊ ရဲကားနဲ့ အုပ်ချုပ်ရေး အဖွဲ့တွေက ဘေးတွဲဆိုင်ကယ်တွေနဲ့ လိုက်ပါကာ ရပ်ကွက်တွေကို ဧည့်စာရင်းစစ်ဆေးခဲ့ပြီး ဖမ်းဆီးခံရသူတချို့ ရှိတယ်လို့ ၁၅ ရပ်ကွက်နေသူတယောက်က ပြောပါတယ်။
“ကျနော်တို့လမ်းက ရခိုင်အဆောင်ကို ဧည့်စာရင်းလာစစ်တာ ဘေးတွဲ ၆ စီး၊ ရဲကားတစီး၊ စစ်ကား ၂ စီးနဲ့ လာစစ်တာ။ ရခိုင်အဆောင်တွေပဲစစ်တာ၊ တခြားအဆောင်တွေ သိပ်မစစ်ဘူး။ ဘယ်နှစ်ယောက် ပါသွားလဲတော့ မသိဘူး။ ဖမ်းခံရသူတွေ ရှိတယ်။”
မြောက်ဒဂုံတံတားအဆင်း ရွှေပေါက်ကံမြို့သစ် ၂၂ ရပ်ကွက် ပြည်ထောင်စုဘောလုံးကွင်းအနီးက ရခိုင်အဆောင်တဆောင်ကို မနေ့ည ၉ နာရီခွဲမှာ စစ်ကောင်စီတပ်က ဧည့်စာရင်းစစ်ဆေးခဲ့တယ်လို့ ၂၂ ရပ်ကွက်နေသူတယောက်က DVB ကို ပြောပါတယ်။
“ဧည့်စာရင်းစစ်တာထက် သတင်းရလို့လာရှာတဲ့ပုံစံ၊ ကားပေါ်မှာလည်း ဖမ်းလာတဲ့သူတွေပါတယ်၊ မီးပျက်လို့ အိမ်အပြင်မှာထွက်ထိုင်နေတဲ့သူတောင် စစ်တပ်က ခေါ်စစ်တာ၊ တလမ်းလုံးမစစ်ဘူး၊ သူတို့စစ်ချင်တဲ့အိမ် စစ်တာ၊ ဧည့်စာရင်းနဲ့နေတဲ့ ရခိုင်တွေ အဓိကထားစစ်တာ။”
အလားတူ ရွှေပေါက်ကံမြို့သစ် ၁၂ ရပ်ကွက် YBS 19 ဂိတ်အနီးက လိုင်းခန်းတွေကို မနေ့ညက စစ်ကောင်စီတပ်နဲ့ ရဲတွေက ဧည့်စာရင်းစစ်ဆေးခဲ့တယ်လို့လည်း အဲဒီရပ်ကွက်မှာ နေထိုင်သူတွေက ပြောပါတယ်။
စစ်ကောင်စီတပ်က ဧည့်စာရင်းစစ်ဆေးပြီး ဖမ်းဆီးသွားတာမှန်ပေမဲ့ ဖမ်းဆီးခံရသူ အရေအတွက် ကိုတော့ သီးခြားအတည်ပြုနိုင်ခြင်းမရှိပါဘူး။
ပြီးခဲ့တဲ့ မတ် ၂၈ ရက်နဲ့ ၂၉ ရက်တို့မှာ မြောက်ဥက္ကာလမြို့နယ်အတွင်းက ရပ်ကွက်တချို့ကို စစ်တပ်နဲ့ ရဲတွေက ဧည့်စာရင်းစစ်ဆေးပြီး အဖမ်းပြကာ ငွေကြေးတောင်း ပြန်လွှတ်ခဲ့တဲ့ဖြစ်စဥ်တွေလည်း ရှိပါတယ်။
