ပဲခူးတိုင်း၊ ဝေါမြို့နယ်၊ ရန်ကုန်-မော်လမြိုင်ကားလမ်းရှိ ညောင်ခါးရှည်စစ်ဆေးရေးဂိတ်အနီး မတ် ၃၁ ရက်မနက် ၁၀ နာရီက စစ်ကားနဲ့ တခြားယာဉ် ၃ စီးတို့ ဆင့်တိုက်မှုကြောင့် စစ်ကောင်စီတပ်ဖွဲ့ဝင် ၆ ယောက် အပါအဝင် ၈ ယောက် ဒဏ်ရာရရှိခဲ့ကြောင်း ခရီးသွားယာဥ်မောင်းတွေဆီက သိရပါတယ်။
ဝေါမြို့နယ်ဘက်ကနေ မွန်ပြည်နယ်ဘက်ကို မောင်းနှင်လာတဲ့ စစ်ကောင်စီကားမှာ ညောင်ခါးရှည်ဂိတ်မှာ တန်းစီနေတဲ့ ခရီးသည်တင် ပရိုဘောက်ကား ၁ စီး၊ ကုန်တင် ၁၂ ဘီးကား ၂ စီးတို့ကို ဝင်တိုက်ပြီး တိမ်းမှောက်သွားတာလို့ ယာဥ်မောင်းတယောက်က ပြောပါတယ်။
“ဝင်တိုက်တဲ့ စစ်တပ်ကားက နေပြည်တော် တပ်မတော်နေ့ အခမ်းအနားပြီးလို့ ပြန်လာတဲ့ စစ်မေတွေ လိုက်လာတဲ့ကား။ လောလောဆယ်တော့ စစ်ကားမောင်းတဲ့ ယာဥ်မောင်းက ညပ်မိနေတာ။ စစ်မေ ၅ ဦး ဒဏ်ရာရတယ်။ ပရိုဘောက်ကားပေါ်က အမျိုးသားတယောက်နဲ့ အမျိုးသမီး တယောက် ဒဏ်ရာရတယ်။ ပရိုဘောက်ယာဥ်မောင်းက အခု ကျိုက်ထိုဆေးရုံကို ပို့ထားတယ်။ ဝေါ ထွေအုပ်နဲ့ စစ်တပ်ကတော့ ပရိုဘောက်ကားသမားကို ယာဥ်မဆင်မခြင်မောင်းမှု တရားစွဲမယ်လို့တော့ ပြောသံကြားတယ်။”
ယာဥ်တိမ်းမှောက်မှုကြောင့် စစ်ကောင်စီတပ်ဖွဲ့ဝင် အမျိုးသမီး ၅ ယောက်နဲ့ ယာဥ်မောင်း တပ်သား ၁ ယောက်၊ ပရိုဘောက်ယာဥ်ပေါ်က မော်လမြိုင်မြို့ ညောင်ပင်ဆိပ်စက်မှုဇုန် ကွမ်းသီးစက်ရုံမှ အသက် ၃၀ ကျော်အရွယ် ဝန်ထမ်းအမျိုးသား ၁ ယောက်နဲ့အမျိုးသမီး ၁ ယောက်၊ စုစုပေါင်း ၈ ယောက် ပြင်းထန်ဒဏ်ရာရရှိသွားသလို အတိုက်ခံရတဲ့ ပရိုဘောက်ယာဉ် ကားဦးခေါင်းပိုင်းကြေမွသွားပြီး ၁၂ ဘီးကားတစ်စီးလည်း ဦးခေါင်းပိုင်း ကြေသွားကြောင်း သိရပါတယ်။
အဲဒီယာဥ်တိုက်မှုကြောင့် စစ်ကားတိမ်းမှောက်သွားကာ လမ်းပိတ်ဆို့နေကြောင်းနဲ့ နှစ်ဖက် သွားလာမယ့် ခရီးသွားကားတွေလည်း ပိတ်မိနေကာ စောင့်ဆိုင်းနေရကြောင်း ခရီးသွား ယာဥ်မောင်းတွေဆီက သိရပါတယ်။
Photo: ခရီးသွားတဦး
