ငလျင်သဘာဝဘေးနဲ့ တွေ့ကြုံနေရပေမဲ့ စစ်ကောင်စီတပ်ရဲ့ ထိုးစစ်နဲ့ လေကြောင်း တိုက်ခိုက်မှုတွေကတော့ မရပ်မနား ဆက်ရှိနေတယ်လို့ ကချင်လွတ်လပ်ရေးအဖွဲ့ (KIO/KIA) ဘက်က ပြောပါတယ်။
ပြီးခဲ့တဲ့ သောကြာနေ့က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရှိ အင်အားပြင်း ငလျင်တခု လှုပ်ခတ်ခဲ့တာကြောင့် မြန်မာပြည်အနှံ့ နေအိမ်အဆောက်အအုံတွေ ပြိုတာ၊ လမ်းတံတားတွေ ပျက်စီးတာအပြင် လူထောင်ချီ သေဆုံးခဲ့တာပါ။
လက်ရှိအချိန်ထိလည်း လူသေဆုံးမှုတွေက ဆက်တိုးနေပြီး ကူညီကယ်ဆယ်ရေးတွေ မလုပ်နိုင်ပေမဲ့ စစ်ကောင်စီဘက်ကတော့ လေကြောင်းတိုက်ခိုက်မှုတွေနဲ့ ထိုးစစ်တွေကို ဆက်ပြီး လုပ်ဆောင်နေတာ ဖြစ်ပါတယ်။
ကချင်ပြည်နယ်အတွင်းမှာလည်း စစ်ကောင်စီဘက်က ဗန်းမော်မြို့မှာ လေကြောင်းကနေ ဗုံးကြဲတိုက်ခိုက်တာတွေကို အဆက်မပြတ် လုပ်နေသလို KIA တပ်မဟာ ၈ နယ်မြေမှာလည်း မတ် ၃၁ ရက်က လေကြောင်းကနေ တိုက်ခိုက်တာရှိတယ်လို့ KIO သတင်းပြန်ကြားရေးတာဝန်ခံ ဗိုလ်မှူးကြီးနော်ဘူက ပြောပါတယ်။
ဒါ့အပြင် ဝိုင်းမော်မြို့နယ်နဲ့ လီဒိုလမ်းဘက်မှာလည်း စစ်ကောင်စီရဲ့ ထိုးစစ်တွေ ဆက်ရှိနေတာကြောင့် တိုက်ပွဲတွေ ဆက်ရှိနေတယ်လို့ ပြောပါတယ်။
KIA တပ်တွေ အနေနဲ့ကတော့ သဘာဝဘေး ကြုံနေရတဲ့ကာလမှာ ထိုးစစ်တွေမလုပ်ဖို့ ညွှန်ကြားထားပြီး စစ်ကောင်စီရဲ့ ထိုးစစ်ကိုပဲ ခုခံကာကွယ်နေတယ်လို့လည်း ဆိုပါတယ်။
ဗိုလ်မှူးကြီးနော်ဘူက “ကချင်ပြည်နယ်မှာတော့ သူတို့ရဲ့ စစ်ရေးလှုပ်ရှားမှုက ရပ်တန့်တာမရှိဘူးလို့ ပြောလို့ရပါတယ်။ KIO ဘက်ကတော့ သူတို့ဘက်က ထိုးစစ်ဆင်တာမဟုတ်ရင် တိုက်ပွဲကို အတတ်နိုင်ဆုံး ရှောင်ဖို့တော့ ပြောထားတာရှိပါတယ်။ သူတို့ ထိုးစစ်ဆင်ရင်တော့ ခုခံတဲ့ တိုက်ပွဲကတော့ ရှိမှာပါ” လို့ ပြောပါတယ်။
စစ်ကောင်စီဘက်ကတော့ လူထု ဘယ်လောက်ဒုက္ခရောက်ရောက် စစ်ရေးတွေကို ရပ်တန့်ဖို့ စိတ်ကူးရှိမနေဘူးလို့လည်း ဗိုလ်မှူးကြီးနော်ဘူက ဝေဖန်ပါတယ်။
“ကျနော်တို့ရဲ့ ပြည်သူလူထုတွေ ဘယ်လောက်ပဲ ဒုက္ခရောက်ရောက်၊ သူတို့ရဲ့ စစ်ရေးကိုတော့ မရပ်တန့်ဘူးဆိုတဲ့သဘော ရှိပါတယ်။ အဲဒီလိုပုံစံ ဖြစ်ပါတယ်။ လူသားချင်းစာနာမှုကိုလည်း တန်ဖိုးမထားတဲ့ပုံစံမျိုးနဲ့ အခုလိုမျိုး စစ်ရေးကို ဆက်လုပ်တဲ့သဘောမျိုး ရှိပါတယ်။”
ဒါ့အပြင် မကွေးတိုင်း ပေါက်မြို့နယ်၊ ရခိုင်ပြည်နယ် မြောက်ဦးနဲ့ ကျောက်ဖြူမြို့နယ်မှာလည်း စစ်ကောင်စီတပ်က လေကြောင်းတိုက်ခိုက်မှုတွေ ဆက်တိုက်လုပ်နေတယ်လို့ စစ်ရေးသတင်းရင်းမြစ်တွေက ပြောပါတယ်။
ဧပြီ ၁ ရက် နေ့လယ် ၁ နာရီအထိ DVB က ကောက်ယူထားတဲ့ စာရင်းတွေအရ ငလျင်ကြောင့် သေဆုံးသူပေါင်း ၃,၆၄၃ ယောက်၊ ထိခိုက်ဒဏ်ရာရ ၄,၅၇၅ ယောက်နဲ့ ပျောက်ဆုံးသူ ၇၀၅ ယောက် ရှိပါတယ်။
ထက်အောင်
