ရခိုင်ပြည်နယ်၊ မောင်တောမြို့နယ်မှာ စစ်ကောင်စီတပ်က ထောင်ထားတဲ့ စစ်ကျန် မြေမြှုပ်မိုင်း နင်းမိပြီး ပြည်သူတယောက် အပြင်းအထန် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။
မောင်တောမြို့နယ်၊ သင်္ဘောလှရွာ အရှေ့ဘက်ကတောထဲမှာ မတ် ၂၅ ရက် မနက် ၁၁ နာရီခွဲလောက်က စစ်ကောင်စီတပ်က ထောင်ထားခဲ့တဲ့မိုင်း နင်းမိပြီး ပြည်သူတယောက် အပြင်းအထန် ဒဏ်ရာရရှိခဲ့တာလို့ ဒေသခံရွာသားတယောက်က ပြောပါတယ်။
အဲဒီ မြေမြှုပ်မိုင်း ပေါက်ကွဲမှုကြောင့် သင်္ဘောလှကျေးရွာက အသက် ၅၇ နှစ်အရွယ် ဦးပန်ညို ဒဏ်ရာရခဲ့တာဖြစ်ပြီး တရွာတည်းနေ အပေါင်းဖော် ၄ ယောက်နဲ့အတူ တောထဲမှာ ဝါးသွားခုတ်ချိန် စစ်ကောင်စီတပ်က ထောင်ထားခဲ့တဲ့ စစ်ကျန်မြေမြှုပ်မိုင်း နင်းမိကာ ညာဘက် ခြေထောက်တဖက် ပြတ်ထွက်သွားပြီး အရေးပေါ် ဆေးဝါးကုသမှု ခံယူနေရတယ်လို့ ဆိုပါတယ်။
မောင်တောမြို့နယ်အတွင်းမှာ အာရက္ခတပ်တော် (AA) က မိုင်းရှင်းလင်းရေးတွေ ဆက်တိုက်လုပ်ဆောင်နေပေမဲ့လည်း ပြည်သူတွေ မကြာခဏ စစ်ကျန်မြေမြှုပ်မိုင်းနင်းမိကာ ဒဏ်ရာတွေ ရရှိခဲ့ကြပါတယ်။
ရခိုင်ပြည်နယ်၊ တောင်ကုတ်မြို့နယ်မှာလည်း မတ် ၂၁ ရက် ညနေပိုင်းမှာ စစ်ကောင်စီတပ်က ထောင်ထားခဲ့တဲ့ စစ်ကျန်မိုင်း နင်းမိပြီး ပြည်သူတယောက် အပြင်းအထန် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။
