ရခိုင်ပြည်နယ်၊ မောင်တောမြို့နယ်မှာ မတ် ၁၉ ရက်နေ့က မွတ်ဆလင်အမျိုးသား ၇ ယောက် ဓားပြတိုက်ခံရပြီး မော်တော်ဘုတ်ပိုင်ရှင်ပြန်ပေးဆွဲခံခဲ့ရတယ်လို့ အာရက္ခပြည်သူ့တော်လှန်ရေး အစိုးရရဲ့ ပြည်သူ့လုံခြုံရေးနဲ့ တရားဥပဒေစိုးမိုးရေးဌာန DLEPS နဲ့ နီးစပ်သူတွေဆီကနေ သိရပါတယ်။
မောင်တောမြို့နယ်၊ ကျောက်ပန်းဒူရွာနားက အာရက္ခရေပိုင်နက်အတွင်းမှာ မတ် ၁၉ ရက်နေ့က ဘင်္ဂလားဒေ့ရှ်နိုင်ငံကနေ ရေနံဆီဝယ်ပြီးပြန်လာတဲ့ မွတ်ဆလင် အမျိုးသား ၇ ယောက်ကို ဘင်္ဂလားဒေ့ရှ်နိုင်ငံဘက်ကလာတဲ့ လူအယောက် ၂၀ လောက်က ဓားပြတိုက်ခဲ့တာပါ။
ဓားပြတိုက်ခံခဲ့ရသူတွေကတော့ ပေါက်တောမြို့နယ် စက်ကဲပြင်အောက်ရွာက လူငယ်လူလတ်ပိုင်း အမျိုးသားတွေဖြစ်ပြီး စက်လှေပိုင်ရှင် ဆော်လီမူလာကိုတော့ ဓားပြတွေက ဖမ်းဆီးထားလိုက်တယ်လို့ DLEPS နဲ့ နီးစပ်သူတယောက်က DVB ကိုပြောပါတယ်။
ဘဂ်လားဒေ့ရှ့်နိုင်ငံသား အယောက် ၂၀ ဟာ တုတ်၊ ဓားတွေနဲ့ ခရီးသွား ၇ ယောက်ကို ရိုက်နှက်နှိပ်စက်ပြီးနောက် ရေနံဆီ ၁၇ ဂါလံဆံ့ပုံး အလုံး ၃၀၊ ဖုန်း ၄ လုံး နဲ့ စားနပ်ရိက္ခာတွေကို ဓားပြတိုက်လုယူခဲ့ပြီး လူ ၆ ယောက်ကို ပြန်လွှတ်ပေးခဲ့ပေမဲ့ စက်လှေပိုင်ရှင်ကို ဖမ်းဆီးပြန်ပေးဆွဲထားတယ်လို့ ပြောပါတယ်။
အဲဒီဖြစ်စဉ်ပတ်သက်လို့ အာရက္ခပြည်သူ့တော်လှန်ရေးအစိုးရရဲ့ DLEPS တပ်ဖွဲ့ဝင်တွေက ဓားပြတိုက် ပြန်ပေးဆွဲသူတွေကို အမြန်ဆုံးဖမ်းဆီးအရေးယူနိုင်အောင် လုပ်ဆောင်နေတယ်လို့ DLEPS နဲ့ နီးစပ်သူတွေဆီကနေ သိရပါတယ်။
