ရခိုင်ပြည်နယ်၊ သံတွဲမြို့နယ်မှာ စစ်ကောင်စီတပ်က ထောင်ထားခဲ့တဲ့ မြေမြှုပ်မိုင်းကို နင်းမိပြီး မတ် ၂၀ ရက်နေ့မနက်ပိုင်းက လူငယ်တယောက် ခြေထောက်ပြတ်ပြီး အပြင်းအထန် ဒဏ်ရာရတယ်လို့ ဒေသခံတွေဆီကနေ သိရပါတယ်။

သံတွဲမြို့နယ်၊ ရေဖြူအိုင်ကျေးရွာနားမှာ မတ် ၂၀ ရက်နေ့ မနက် ၉ နာရီလောက်က ရေဖြူအိုင်ရွာက ဦးတင်အောင်ရဲ့ သားဖြစ်သူ မောင်ဆန်းဝင်းဟာ ရွာနားမှာ ထင်းသွားခုတ်တဲ့အချိန် စစ်ကောင်စီတပ်က ထောင်ထားခဲ့တဲ့ မြေမြှုပ်မိုင်းကို နင်းမိလို့ ညာဘက်ခြေထောက်တဖက် ပြတ်ထွက်ပြီး အပြင်းအထန်ဒဏ်ရာရခဲ့တယ်လို့ ဒေသခံတွေက ဆိုပါတယ်။

အဲဒီရွာဟာ သံတွဲမြို့မှာရှိခဲ့တဲ့ စစ်ကောင်စီရဲ့ ပင်မရေငုပ်တပ်ဝန်းကျင် ဖြစ်ပြီး အာရက္ခတပ်တော် (AA) နဲ့ အပြင်းအထန် တိုက်ပွဲဖြစ်ခဲ့တဲ့နေရာတွေ ဖြစ်ပါတယ်။

ရခိုင်ပြည်နယ် တောင်ကုတ်မြို့မှာလည်း မတ် ၁၇ ရက်နေ့ မနက်ပိုင်းမှာ စစ်ကောင်စီတပ်က ထောင်ထားခဲ့တဲ့ စစ်ကျန်မိုင်းနင်းမိပြီး အမျိုးသမီးတယောက် အပြင်းအထန် ဒဏ်ရာရခဲ့ပါသေးတယ်။

ရခိုင်ပြည်နယ်အတွင်းမှာ ပြီးခဲ့တဲ့ ဖေဖော်ဝါရီတလအတွင်း စစ်ကောင်စီတပ်က ထောင်ထားခဲ့တဲ့ မြေမြှုပ်မိုင်းနဲ့ စစ်ကျန်လက်နက်ပေါက်ကွဲလို့ အရပ်သားပြည်သူ ၈ ယောက်ထက်မနည်း သေဆုံး၊ ၂၀ ထက်မနည်း ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။