ဘင်္ဂလားဒေ့ရှ်နိုင်ငံ၊ ကော့ဇ်ဘဇားခရိုင်မှာရှိတဲ့ ရိုဟင်ဂျာဒုက္ခသည်စခန်းမှာ ရိုဟင်ဂျာ လက်နက်ကိုင် RSO အဖွဲ့နဲ့ ARA အဖွဲ့တို့အကြား မတ် ၈ ရက်ညက ပစ်ခတ်မှုဖြစ်လို့ ဒုက္ခသည်တယောက် သေဆုံးပြီး ၄ ယောက် ဒဏ်ရာရရှိခဲ့တယ်လို့ ဒုက္ခသည်စခန်း သတင်းရင်းမြစ်က ပြောပါတယ်။
မတ် ၈ ရက် ည ၉ နာရီလောက်မှာ ဒုက္ခသည်စခန်းရှိ Camp 8E ၊ Block B-21 - B-32 အနီးမှာ ဒါဇင်နဲ့ချီတဲ့ လက်နက်ကိုင် ၂ ဖွဲ့ အပြန်အလှန်ပစ်ခတ်ခဲ့ကြတာမှာ အသက် ၃၂ နှစ်အရွယ် အမျိုးသားတယောက် သေဆုံးခဲ့သလို နောက်ထပ် အမျိုးသား ၄ ယောက်လည်း ထိခိုက်ဒဏ်ရာ ရရှိခဲ့ကြတယ်လို့ စခန်းမှာနေထိုင်တဲ့ ရိုဟင်ဂျာဒုက္ခသည်တယောက်က ပြောပါတယ်။
“RSO နဲ့ ARA တို့အကြားမှာ မတ်လ ၈ ရက်နေ့ညက နှစ်ဖက်ပစ်ခတ်မှု ဖြစ်ပွားခဲ့ကြတယ်။ အဓိကတော့ မူးယစ်ဆေးဝါးကိစ္စတွေနဲ့ ဖြစ်ကြတာ။ ပစ်ခတ်မှုအနီးမှာရှိတဲ့ အရပ်သားတဦး ကျည်ထိမှန်ပြီး သေဆုံးခဲ့သလို နောက်ထပ် ၄ ဦးထက်မနည်းလည်း ထိခိုက်ဒဏ်ရာ ရရှိသွားတယ်။ ဒုက္ခသည်စခန်းအတွင်းမှာက လက်နက်ကိုင်တွေအကြား မကြာခဏဆိုသလို ငြိတာတွေ ရှိကြတယ်။”
သေဆုံးသွားသူဟာ အသက် ၃၂ နှစ်အရွယ် မာမတ်ရော်ဖိက် ဖြစ်ပြီး အရပ်သားတချို့ ထိခိုက်ခဲ့သလို ပစ်ခတ်မှုမှာ ပါဝင်ကြတဲ့ လက်နက်ကိုင်တပ်ဖွဲ့ဝင်တချို့လည်း ထိခိုက်ဒဏ်ရာ ရသွားတယ်လို့ စခန်းတွင်းနေထိုင်သူတွေက ပြောကြပါတယ်။
အဲဒီပစ်ခတ်မှု ဖြစ်ပွားပြီးနောက် မတ် ၈ ရက် ည ၁၀ နာရီဝန်းကျင်မှာ ARA အဖွဲ့ရဲ့ ခေါင်းဆောင် မာမတ်အာယုတ်နဲ့ တပ်ဖွဲ့ဝင် ၂ ယောက်ကို ဘင်္ဂလားဒေ့ရှ်ရဲတပ်ဖွဲ့က ဖမ်းဆီးသွားပါတယ်။
နောက်ထပ် ရိုဟင်ဂျာဒုက္ခသည်တယောက်က “ပစ်ခတ်မှုဖြစ်ပြီးနောက်မှာ ARA ခေါင်းဆောင် မာမတ်အာယုတ်နဲ့ တပ်ဖွဲ့ဝင် ၂ ယောက်ကို ဘင်္ဂလားဒေ့ရှ်ရဲတပ်ဖွဲ့က ဖမ်းဆီးသွားတာရှိတယ်။ RSO ကတော့ ဖမ်းဆီးတာ မရှိသေးဘူး။ RSO က ဘင်္ဂလားဒေ့ရှ်အစိုးရနဲ့ နီးကပ်မှုရှိတယ်လို့ ပြောရမယ်။ ဒုက္ခသည်စခန်းမှာက လက်နက်ကိုင်တွေ ခြေရှုပ်နေကြတာဖြစ်ပြီး ဘင်္ဂလားဒေ့ရှ် အစိုးရကလည်း သူတို့ကို လှုပ်ရှားခွင့်ပေးထားတဲ့ သဘောရှိတယ်” လို့ ပြောပါတယ်။
ရိုဟင်ဂျာ လက်နက်ကိုင်အဖွဲ့တွေဖြစ်ကြတဲ့ RSO၊ ARA၊ ARSA၊ RIM စတဲ့အဖွဲ့တွေမှာ ဒုက္ခသည်စခန်းကို အခြေပြုလှုပ်ရှားပြီး လူသစ်စုဆောင်းတာ၊ မူးယစ်ဆေးဝါးရောင်းချတာနဲ့ လက်နက်မှောင်ခိုမှုတွေပါ ပြုလုပ်နေကြတာ ဖြစ်ပါတယ်။
ဒါ့အပြင် RSO၊ ARA၊ ARSA အဖွဲ့တို့ဟာ ဘူးသီးတောင်နဲ့ မောင်တောမြို့သိမ်းတိုက်ပွဲတွေမှာ စစ်ကောင်စီနဲ့ပူးပေါင်းပြီး အာရက္ခတပ်တော် (AA) ကို တိုက်ခိုက်ခဲ့ကြကာ စစ်ရှုံးပြီးနောက် ဘင်္ဂလားဒေ့ရှ်နိုင်ငံဘက် ထွက်ပြေးခဲ့ကြတာ ဖြစ်ပါတယ်။
ရိုဟင်ဂျာ ဒုက္ခသည်စခန်းတွေမှာ အခြေပြုထားတဲ့ RSO၊ ARA၊ ARSA၊ RIM အဖွဲ့တို့ဟာ စစ်ကောင်စီနဲ့ မဟာမိတ်ဆက်ဆံရေးရှိတဲ့ ဒိလ်မာမတ်ရဲ့ ဦးဆောင်မှုနဲ့ Four Brothers Alliance တပ်ပေါင်းစုကို ဖွဲ့စည်းထားပြီး အာရက္ခတပ်တော် (AA) ကို တိုက်ခိုက်ဖို့ စီစဉ်နေတယ်လို့ ရိုဟင်ဂျာ အသိုက်အဝန်းကနေ သိရပါတယ်။
