ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်၊ မုံးစီး ပိန်းခမ်းရွာမှာ ရေအရင်းအမြစ်ဘက် ရွှေတူးဖော်မှုကို သွားရောက်တားဆီးတဲ့ ဒေသခံ လယ်ပိုင်ရှင်တွေကို မတ် ၅ ရက် နေ့ခင်း ၁၂ နာရီ ဝန်းကျင်မှာ MNDAA တပ်ဖွဲ့က ပစ်ခတ်လို့ ၆ ယောက် သေဆုံးပြီး ၆ ယောက် ဒဏ်ရာရရှိခဲ့ကြောင်း ဒေသခံတွေဆီက သိရပါတယ်။
ဒေသခံ အမျိုးသမီးတယောက်က “သေဆုံးသွားတာ ၆ ယောက်၊ ဒဏ်ရာရတာ ၆ ယောက်။ ခြေထောက်ထိတဲ့သူထိ” လို့ ပြောပါတယ်။
မတ် ၅ ရက် ညနေ ၆ နာရီလောက်မှာ အလောင်းသယ်ပြီး ဒေသခံ ပြည်သူတွေ အများအပြား ကိုးကန့် MNDAA တပ်စခန်းဘက် သွားကြကာ ဆန္ဒထုတ်ဖော်ကြတယ်လို့ သူကပြောပါတယ်။ ထိခိုက်ဒဏ်ရာရသူတွေကိုတော့ ဆေးကုသဖို့ ကွတ်ခိုင်ဆေးရုံကို ပို့ဆောင်ထားတယ်လို့ ဆိုပါတယ်။
ဒေသခံ အမျိုးသားတယောက်က “ကျနော်တို့ ပိန်းခမ်းရွာမှာပါ။ ဒေသခံပြည်သူတွေ ပိတ်ပင်တားဆီးထားတဲ့ နေရာမှာ ရွှေတူးဖို့ လုပ်တာ။ MNDAA တပ်ဖွဲ့က သေနတ်နဲ့ တရစပ် ပစ်ခတ်လို့ အများကြီး ထိသွားတယ်” လို့ ပြောပါတယ်။
မတ် ၄ ရက်ကတည်းက မုံးစီးဒေသမှာနေတဲ့ ဒေသခံပြည်သူတွေအားလုံး၊ အဲဒီ ပြိန်းခမ်းချောင်း ရေအရင်းအမြစ်သုံးရတဲ့ မုံးစီးက လယ်ပိုင်ရှင် ရှမ်းရော၊ တရုတ်ရော၊ ကချင်ရော အကုန်သွားပြောပြီး တားမြစ်ဖြေရှင်းထားပြီး ဖြစ်ပေမဲ့ မတ် ၅ ရက် အစောကြီးကတည်းက ဘက်ဟိုးနဲ့ တခါ ရွှေတူးဖို့ ပြန်ပြင်ဆင်လာတာမှာ ဒေသခံပြည်သူတွေ နောက်တခေါက် ပြန်သွားပြောကြတာလို့ သူကပြောပါတယ်။
“အဲမှာ အငြင်းပွားကြတယ်။ သူတို့ MNDAA စစ်သားတွေက တူးမယ်ပေါ့။ တက်လာတဲ့ ဒေသခံတွေက တူးခွင့်မပြုဘူးလို့ ပြောထားပြီးပြီ ဆိုပြီး ငြင်းခုံရာက ကိုးကန့်စစ်သားတွေက သေနတ်မောင်းတင်ပြီး ချိန်လာတယ်။ သေနတ်နဲ့ချိန်တော့ သေနတ်လုလိုက်တာ။ ကိုးကန့် MNDAA တွေလည်း ဘယ်နှယောက်လည်း မသိဘူး။ တရစပ် ပစ်ခတ်ပြီး ပစ်သတ်လိုက်တာ” လို့ ဒေသခံတယောက်က ပြောပါတယ်။
အဲဒီနေရာက မုံးစီးဒေသရှိ လယ်တွေအားလုံးရဲ့ ရေအရင်းအမြစ် ဖြစ်တာကြောင့် ဒေသခံတွေ အကြိမ်ကြိမ် အဖန်ဖန် ရွှေတူးခွင့် တားဆီးထားတဲ့နေရာ ဖြစ်တယ်လို့ သူက ပြောပါတယ်။
သေဆုံး ဒဏ်ရာရတဲ့ ဒေသခံ လယ်ပိုင်ရှင်တွေထဲမှာ KIA ရဲ့ ဒေသကာကွယ်ရေးတပ်ဖွဲ့ဝင် ၃ ယောက် ပါဝင်ပြီး အဲဒီလို သွားပြောရာမှာ ဒေသခံ ပြည်သူတွေအနေနဲ့ သွားပြောတာဖြစ်ပြီး ဘယ်သူမှ ယူနီဖောင်းလည်း မဝတ်ထားဘူးလို့ သူက ထပ်ပြောပြပါတယ်။
မုံးစီးဒေသမှာရှိတဲ့ လယ်တွေအားလုံး ပိန်းခမ်းချောင်းရေ သွင်းရတာကြောင့် အဲဒီနေရာမှာ ရွှေတူးရင် မုံးစီးက လယ်တွေကားလုံး လယ်လုပ်လို့ မရတော့တာကြောင့် ဒေသခံတွေ အကုန်လုံး ကန့်ကွက်ရတာ ဖြစ်တယ်လို့ ဒေသခံတွေက ပြောပါတယ်။
