ရန်ကုန်-ပုသိမ်သွား ကားလမ်းပေါ်က ပန်တိုင်စစ်ဆေးရေးဂိတ်ကို မတ် ၈ ရက်နေ့ ညပိုင်းက သေနတ်ပစ်ခတ်ခံရပြီး ရဲ ၂ ယောက် ထိခိုက်ဒဏ်ရာရသွားတယ်လို့ ခရီးသွားတွေဆီက သိရပါတယ်။
ပန်တိုင်စစ်ဆေးရေးဂိတ် ပစ်ခတ်ခံရတာကြောင့် ဂိတ်မှာတာဝန်ကျနေတဲ့ ရဲတပ်ဖွဲ့ဝင် ၂ ယောက် သေနတ်ကျည်ထိမှန် ဒဏ်ရာတွေရရှိခဲ့တာလို့ ဆိုပါတယ်။
ပန်တိုင်စစ်ဆေးရေးဂိတ်အနီး နေထိုင်သူတယောက်က “ညအစောပိုင်းမှာ ပန်တိုင်ဂိတ်မှာ ပစ်ခတ်မှုဖြစ်သွားတယ်။ ရဲ ၂ ဦးအပစ်ခံရတယ်။ ညတွင်းချင်း စစ်တပ်ကရောက်လာပြီး လိုက်လံရှာဖွေတာတွေ ပြုလုပ်နေတယ်။ မနက်မိုးလင်းတော့ ခရီးသွားယာဉ်တွေကိုရှာဖွေ စစ်ဆေးတာတွေလုပ်နေတယ်” လို့ DVB ကိုပြောပါတယ်။
မတ် ၉ ရက်နေ့ ဒီကနေ့ မနက်ပိုင်းမှာ ခရီးသွားယာဉ်တွေကို စစ်ဆေးနေတာကြောင့် ရန်ကုန်- ဧရာဝတီသွား ကားလမ်းပေါ် ယာဉ်တွေပိတ်ဆို့နေတယ်လို့ ဆိုပါတယ်။
ပန်တိုင်ဂိတ်ကို ဘယ်အဖွဲ့က သေနတ်နဲ့ဝင်ရောက်ပစ်ခတ်ခဲ့တယ်ဆိုတာ မသိရှိရသေးတဲ့အပြင် သေနတ်နဲ့ ဝင်ရောက်ပစ်ခတ်သူတွေလည်း လွတ်မြောက်သွားတယ်လို့ ပန်တိုင်ဂိတ် လုံခြုံရေးရဲတပ်ဖွဲ့နဲ့ နီးစပ်သူတွေဆီက သိရပါတယ်။
