မကွေးတိုင်း၊ ပခုက္ကူမြို့နယ်မှာ မတ် ၆ ရက် မနက်ပိုင်းက စစ်ကောင်စီ စစ်ဆေးရေးဂိတ်တခု တိုက်ခိုက်ခံရပြီး ၂ ယောက်သေဆုံးကာ ၂ ယောက် ဒဏ်ရာရရှိခဲ့တယ်လို့ ပခုက္ကူသူရိန်တပ်ဖွဲ့ကနေ သိရပါတယ်။

ပခုက္ကူ-ကမ္မလမ်းပိုင်းက ညောင်ဂျစ်ပင်ကျေးရွာမှာ စစ်ကောင်စီတပ်သားနဲ့ ပျူစောထီး အင်အား ၅၀ လောက် အထိုင်ချ တပ်စွဲထားတဲ့ စစ်ကောင်စီစစ်ဆေးရေးဂိတ်ကို မတ် ၆ ရက် မနက် ၉ နာရီခွဲလောက်မှာ ပြည်သူ့ကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့တာလို့ သူရိန်တပ်ဖွဲ့ရဲ့ ပြန်ကြားရေးတာဝန်ခံက DVB ကို ပြောပါတယ်။

အဲဒီတိုက်ခိုက်မှုကြောင့် စစ်ကောင်စီတပ်သား ၂ ယောက် သေဆုံးကာ ပျူစောထီး အမျိုးသားတယောက်နဲ့ အမျိုးသမီးတယောက် ဒဏ်ရာရရှိခဲ့တယ်လို့ ဆိုပါတယ်။

အဲဒီတိုက်ခိုက်မှုကို Earthquake PDF၊ Hunter၊ SSGF၊ JRF၊ Black Cheetah တို့နဲ့အတူ ပူးပေါင်းတိုက်ခိုက်ခဲ့တာဖြစ်ပြီး ပူးပေါင်းတပ်ဘက်က ရဲဘော်တွေ ထိခိုက်မှုမရှိဘူးလို့ ဆိုပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို DVB က သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။