မြောက်ကိုရီးယားနိုင်ငံဟာ အမေရိကန်နဲ့ တောင်ကိုရီးယားတို့ စီစဉ်ထားတဲ့ နှစ်စဉ်ပြုလုပ်နေကျ ပူးတွဲစစ်ရေးလေ့ကျင့်မှုကို ဝေဖန်လိုက်ပြီး ကိုရီးယားကျွန်းဆွယ်မှာ အခြေအနေတွေ ပိုဆိုးလာမယ်လို့ ပြောကြားလိုက်ကြောင်း နိုင်ငံပိုင်မီဒီယာ KCNA က ပြောပါတယ်။
မြောက်ကိုရီးယားလို ခြိမ်းခြောက်မှုတွေအတွက် အဆင်သင့်ပြင်ဆင်ထားမှု အားကောင်းလာစေဖို့ ရည်ရွယ်ပြီး Freedom Shield လို့ ခေါ်တွင်တဲ့ တောင်ကိုရီးယားနဲ့ အမေရိကန်တို့ရဲ့ နှစ်စဉ် စစ်ရေးလေ့ကျင့်မှုကို မတ် ၁၀ ရက်မှာ စတင်တော့မှာဖြစ်ပြီး မတ် ၂၀ ရက်အထိ ပြုလုပ်သွားမှာဖြစ်ကြောင်း ဆိုးလ်ရဲ့ ပူးတွဲစစ်ဦးစီးချုပ်များအဖွဲ့ (JCS) က ပြောထားပါတယ်။
ဒီစစ်ရေးလေ့ကျင့်မှုကြောင့် ကိုရီးယားကျွန်းဆွယ်မှာ အခြေအနေတွေ ဆိုးရွားစေမှာဖြစ်ကြောင်း KCNA က ပြောကြားခဲ့ပါတယ်။
မတ် ၆ ရက်ကလည်း ဖိုချွန်းမြို့အနီးမှာ တောင်ကိုရီးယား-အမေရိကန် ပူးတွဲ စစ်ရေးလေ့ကျင့်မှုအတွင်း အရပ်သားနယ်မြေထဲကို မှားယွင်းကာ မတော်တဆ ဗုံးပြုတ်ကျမှုကြောင့် လူ ၁၅ ယောက် ဒဏ်ရာရရှိသွားပြီး နေအိမ်တွေနဲ့ ဘုရားကျောင်းတခု ပျက်စီးခဲ့ကြောင်း လေတပ်နဲ့ မီးသတ်အေဂျင်စီတို့က ပြောကြားခဲ့ပါတယ်။
ဒီဖြစ်ရပ်အပြီးမှာ တောင်ကိုရီးယား ဆန္ဒပြသူတွေဟာ စစ်ရေးလေ့ကျင့်မှုကို ရပ်တန့်ပေးဖို့ တောင်းဆိုခဲ့ကြပါတယ်။
ဖိုချွန်းမြို့ဟာ ဆိုးလ်မြို့ရဲ့ အရှေ့မြောက်ဘက် ကီလိုမီတာ ၄၀ (၂၅ မိုင်) အကွာမှာရှိပြီး မြောက်ကိုရီးယားနဲ့ စစ်အင်အားပြင်းထန်တဲ့ နယ်စပ်အနီးမှာ တည်ရှိပါတယ်။
Source : Reuters
