တောင်ကိုရီးယား တိုက်လေယာဉ်က စစ်ရေးလေ့ကျင့်စဉ် မတော်တဆ ဗုံးမှားယွင်းကြဲချခဲ့လို့ လူ ၁၅ ယောက် ဒဏ်ရာရသွားကာ ဘုရားကျောင်းနဲ့ လူနေအိမ်တွေ ပျက်စီးခဲ့ရပြီးနောက် ဖိုချွန်းမြို့ခံလူထုဟာ သူတို့ဒေသအတွင်း တိုက်ရိုက်ပစ်ခတ်လေ့ကျင့်မှုအားလုံးကို ချက်ချင်းရပ်ဆိုင်းဖို့ တောင်းဆိုလိုက်ပါတယ်။
မတ် ၆ ရက်က မြောက်ကိုရီးယားနယ်စပ်အနီးမှာ ပစ်ခတ်မှုတွေ ပါဝင်တဲ့ စစ်ရေးလေ့ကျင့်မှု အတွင်း လူနေကျေးရွာတခုကို Air Force KF-16 တိုက်လေယာဉ်က ဗုံး ၈ လုံး မှားချမိလို့ မြန်မာအလုပ်သမားတယောက် အပါအဝင် ၁၅ ယောက် ဒဏ်ရာရသွားခဲ့တာပါ။
ဒဏ်ရာရရှိသူ ၁၅ ယောက်ထဲမှာ ၂ ယောက်က အပြင်းအထန် ဒဏ်ရာရခဲ့ကြောင်း ဂျောင်ဂီဒို ဘွတ်ဘူ မီးသတ်ဌာနက ထုတ်ပြန်ချက်မှာ ဖော်ပြထားပါတယ်။
ဒေသခံကိုယ်စားလှယ် ဂန်ထယ်အီလ်က “ပစ်ခတ်လေ့ကျင့်မှုအားလုံးကို ချက်ချင်းရပ်ဆိုင်းဖို့နဲ့ နောင်မှာ ဒီလိုဖြစ်ရပ်မျိုး ထပ်မဖြစ်ပွားအောင် တားဆီးဖို့ ခိုင်မာတဲ့ အစီအမံတွေ အကောင်အထည်ဖော်ဖို့ ကျနော်တို့ ပြင်းပြင်းထန်ထန် တောင်းဆိုပါတယ်” လို့ ဗုံးပေါက်ကွဲမှုကြောင့် ပျက်စီးသွားတဲ့ နေအိမ်တလုံးရဲ့ အပြင်ဘက်မှာ မီဒီယာတွေကို ပြောပါတယ်။
ဒေသခံလူထုဟာ အနီးနားရှိ လေ့ကျင့်ရေးကွင်းတွေကနေ အနှောင့်အယှက်နဲ့ အန္တရာယ်ဖြစ်စေနိုင်တဲ့ အလားအလာနဲ့ ပတ်သက်ပြီး နှစ်နဲ့ချီ ဆန္ဒပြနေကြတာ ဖြစ်ပါတယ်။
တောင်ကိုရီးယား လေတပ်ကတော့ ဒီဖြစ်ရပ်အတွက် လူသိရှင်ကြား တောင်းပန်ကြောင်း ထုတ်ပြန်ထားပြီး ပူးတွဲပစ်ခတ်မှု လေ့ကျင့်မှုအတွင်း KF-16 ဂျက်လေယာဉ်တွေကနေ ပေါင် ၅၀၀ အလေးချိန်ရှိ Mk82 ဗုံး ၈ လုံး ကွင်းအပြင်ဘက် ပြုတ်ကျခဲ့ကြောင်း ပြောကြားခဲ့ပါတယ်။
တောင်ကိုရီးယားစစ်တပ်က အခု မှားယွင်းပစ်ခတ်မှုမှာ သြဒိနိတ်တွေ မှားယွင်းခြင်းကြောင့် ဖြစ်ကြောင်းနဲ့ နောက်ထပ် စုံစမ်းစစ်ဆေးမှုတွေ လုပ်ဆောင်နေချိန်အတွင်း တိုက်ရိုက်ပစ်ခတ်မှု လေ့ကျင့်မှုတွေကို ရပ်ဆိုင်းထားကြောင်း ယွန်ဟက်ပ် သတင်းဌာနက ပြောကြားခဲ့ပါတယ်။
Source : Reuters
