ရခိုင်ပြည်နယ် စစ်တွေနဲ့ ကျောက်ဖြူမြို့နယ်တို့မှာ စစ်ကောင်စီတပ်နဲ့ အာရက္ခတပ်တော် (AA) တို့အကြား နေ့တိုင်း တိုက်ပွဲဖြစ်ပွားနေတယ်လို့ အာရက္ခတပ်တော်ရဲ့ ပြောရေးဆိုခွင့်ရှိသူက ပြောပါတယ်။

စစ်တွေမြို့နယ်၊ ဝါဘိုကျေးရွာအနီးမှာ တိုက်ပွဲတွေ ဖြစ်ပွားနေပြီး စစ်ကောင်စီတပ်က လေကြောင်း၊ ဒရုန်းနဲ့ လက်နက်ကြီး လက်နက်ငယ်တွေ နေ့စဉ် တိုက်ခိုက်နေတယ်လို့ AA ပြောရေးဆိုခွင့်ရှိသူ ဦးခိုင်သုခက ပြောပါတယ်။

“စစ်တွေမြို့နယ်၊ ဝါဘိုကျေးရွာ ပတ်ဝန်းကျင်တဝိုက်မှာ အပြန်အလှန်ပစ်ခတ်မှုတွေတော့ ရှိနေပါတယ်။ စစ်ကောင်စီဘက်က လေကြောင်းနဲ့ လက်နက်ကြီး ပစ်ခတ်မှုတွေ တောက်လျှောက်ရှိနေပါတယ်။”

စစ်တွေမြို့နယ်မှာ ပြီးခဲ့တဲ့ ဇန်နဝါရီ ၁၆ ရက်ကတည်းက တိုက်ပွဲ ဖြစ်နေပြီး တလကျော်ကြာ နေ့တိုင်းလိုလို တိုက်ပွဲပြင်းထန်နေကြတာလည်း ဖြစ်ပါတယ်။

စစ်တွေမြို့နယ်နဲ့ နယ်နိမိတ်ချင်း ထိစပ်နေတဲ့ ပုဏ္ဏားကျွန်း၊ ပေါက်တော၊ ရသေ့တောင် မြို့နယ်တို့ကို AA က သိမ်းပိုက်ပြီးနောက် စစ်တွေ-ပုဏ္ဏားကျွန်း အစပ်ရှိ ကျေးရွာတွေမှာ ၂၀၂၄ ခုနှစ် အစောပိုင်းကတည်းက နှစ်ဖက်စစ်ဆိုင်ထားကြပြီး အပြန်အလှန်လည်း ပစ်ခတ်တိုက်ခိုက်နေကြတာ ဖြစ်ပါတယ်။

ဒါ့အပြင် ကျောက်ဖြူမြို့နယ်မှာလည်း ဖေဖော်ဝါရီ ၂၄ ရက်ကစပြီး စစ်ကောင်စီက စည်မော်၊ ကြတ္တိန်၊ ရှောက်ချောင်း၊ စိုင်ခြုံ ကျေးရွာတို့ကို လက်နက်ကြီး၊ လေကြောင်းပစ်ကူတို့နဲ့ အပြင်းအထန် တိုက်ခိုက်လာတဲ့အတွက် တိုက်ပွဲပြင်းထန်နေတယ်လို့ ဦးခိုင်သုခက ဆက်ပြောပါတယ်။

“ကျောက်ဖြူဘက်မှာတော့ လွန်ခဲ့တဲ့ ၆ ရက်လောက်က စပြီးတော့ စည်မော်၊ ကြတ္တိန်၊ နောက် ရှောက်ချောင်းရွာ၊ စိုင်ခြုံရွာတွေဘက်ကို စစ်ကောင်စီက အင်အားအများအပြားသုံးပြီးတော့ လက်နက်ကြီးပစ်ကူ၊ လေကြောင်းပစ်ကူ၊ ဒရုန်းပစ်ခတ်မှုတွေနဲ့ အပြင်းအထန် ထိုးစစ်ဆင်လာတဲ့ အတွက် အဲဒီကျေးရွာတွေတဝိုက်မှာ တိုက်ပွဲတွေ တောက်လျှောက်ဖြစ်ပွားနေတာ ရှိပါတယ်။”

ကျောက်ဖြူမြို့နယ်မှာရှိတဲ့ စစ်ကောင်စီရဲ့ ဓညဝတီရေတပ်ဌာနချုပ်နဲ့ ခလရ ၃၄ တပ်ရင်းတွေကို အာရက္ခတပ်တော် (AA) ဘက်ကလည်း လက်နက်ကြီးတွေနဲ့ ပစ်ခတ်တိုက်ခိုက်မှုတွေ ရှိတယ်လို့ ဒေသခံတွေနဲ့ စစ်ရေးသတင်းရင်းမြစ်တွေက ပြောပါတယ်။

ရခိုင်တိုက်ပွဲ တနှစ်ကျော်အတွင်းမှာ အာရက္ခတပ်တော်က မြို့နယ် ၁၄ ခုအထိ သိမ်းပိုက်ထားပြီး စစ်ကောင်စီ ထိန်းချုပ်ထားဆဲဖြစ်တဲ့ စစ်တွေ၊ ကျောက်ဖြူ၊ မာန်အောင် မြို့နယ် ၃ ခုထဲက စစ်တွေနဲ့ ကျောက်ဖြူမြို့နယ်တို့ကို တပြိုင်နက်တည်း ထိုးစစ်ဆင် တိုက်ခိုက်နေတာလည်း ဖြစ်ပါတယ်။

စစ်တွေနဲ့ ကျောက်ဖြူမြို့နယ်တွေမှာ တိုက်ပွဲတွေ ဖြစ်ပွားနေကြတာကြောင့် အဲဒီမြို့နယ် ၂ ခုက သောင်းနဲ့ချီတဲ့ ဒေသခံတွေဟာ ဘေးလွတ်ရာကို ထွက်ပြေးနေကြရပါတယ်။