မကွေးတိုင်းနဲ့ စစ်ကိုင်းတိုင်းအတွင်းက ကျေးရွာ ၉ ရွာကို စစ်ကောင်စီတပ်က မတ် ၃ ရက်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သားပြည်သူ ၁၁ ယောက် သေဆုံးပြီး ဒဏ်ရာရရှိသူလည်း အများအပြားရှိနေတယ်လို့ ဒေသခံတွေဆီကနေ သိရပါတယ်။

မကွေးတိုင်း၊ မြိုင်မြို့နယ်နဲ့ ပေါက်မြို့နယ်အတွင်းက ကျေးရွာ ၈ ရွာကို စစ်တပ်က ဒီမနက်အစောပိုင်း ၁ နာရီကျော်က လေယာဉ် ၅ စီးနဲ့ တပြိုင်နက် တိုက်ခိုက်တာလို့လည်း သိရပါတယ်။

မြိုင်မြို့နယ်ဒေသခံ ကိုဗစ်တာက “ကျနော်တို့ မြိုင်မြို့ရဲ့ အရှေ့ဘက် ပခုက္ကူမြို့နယ်အစပ် ဆိတ်ချေးရွာကို မနေ့ည ၁ နာရီနီးပါးက Y12 လေယာဉ်နဲ့ ဗုံးကြဲတိုက်ခိုက်သွားတယ်ဗျ။ အဲလိုတိုက်ခိုက်လို့ ပြည်သူတဦး နေရာတင် ပွဲချင်းပြီး သေဆုံးခဲ့ရတယ်။ ဒဏ်ရာရသူတွေလည်း များတယ်ဗျ။ နောက်ထပ် ဂျုတ်ကုန်းရွာကိုလည်း Y-12 နဲ့ တဆက်တည်း လေကြောင်းတိုက်ခိုက်မှု တကြိမ် ပြုလုပ်တယ်ဗျ။ အဲရွာကတော့ လူထိခိုက်မှုတော့ မရှိခဲ့ဘူးဗျ။ နောက်ထပ် ဘောင့်ဘင်ရွာကိုလည်း Y-12 နဲ့ပဲ လေကြောင်းတိုက်ခိုက်မှု ၂ ကြိမ် ပြုလုပ်သွားတယ်။ သေဆုံးသူ ပြည်သူ ၄ ဦးအထိ ရှိတယ်ဗျ။ ထိခိုက်ဒဏ်ရာပြင်းထန်ရသူ‌တွေလည်း များတယ်။ ညောင်ကုန်းရွာကိုလည်း Y12 လေယာဉ်နဲ့ တိုက်ခိုက်တယ်။ အထိအခိုက်တော့ မရှိဘူးဗျ။ ဆူးဝင်းရွာကိုလည်း ဂျက်ဖိုက်တာနဲ့ ဗုံးကြဲတိုက်ခိုက်တယ်။ လူအထိအခိုက်မရှိဘူး။ နောက်ပြီး တောရွာအနီးက လယ်ကွင်းပြင်ထဲကိုလည်း Y12 လေယာဉ်နဲ ဗုံးကြဲချတယ်။ အဲဒီနေရာမှာလည်း လူအထိအခိုက် မရှိခဲ့ဘူး” လို့ ပြောပါတယ်။

စစ်‌တပ်က လေယာဉ်နဲ့ ဗုံးကြဲချတဲ့ နေရာတွေမှာ စစ်တပ် စစ်ကြောင်းထိုးတာ မရှိသလို တိုက်ပွဲဖြစ်ပွားခြင်းလည်းမရှိဘဲ အကြောင်းမဲ့ လေကြောင်းတိုက်ခိုက်တာ ဖြစ်တယ်လို့လည်း ကိုဗစ်တာက ပြောပါတယ်။

ဒါ့အပြင် မကွေးတိုင်း၊ ပေါက်မြို့နယ်အတွင်းက လက်ပံတိုရွာနဲ့ သရက်ကန်ကိုလည်း မတ် ၃ ရက် မနက်အစောပိုင်းမှာ စစ်တပ်က လေကြောင်းတိုက်ခိုက်ခဲ့တယ်လို့ သိရပါတယ်။

အခုလို လေကြောင်းတိုက်ခိုက်လို့ အရပ်သားပြည်သူ သေဆုံးထိခိုက်တာအပြင် လူနေအိမ်တွေနဲ့ ဈေးဆိုင်တွေလည်း ပျက်စီးခဲ့တယ်လို့ သိရပါတယ်။

ပေါက်မြို့နယ် ဒေသခံ ကိုထွေးညိုက “ကျနော်တို့ ပေါက်မြို့နယ်ကိုတော့ မနေ့ညပိုင်းက လက်ပံတိုရွာနဲ့ သရက်ကန်ရွာကို စစ်တပ်က လေကြောင်းကနေ ဗုံးကြဲချသွားတယ်ဗျ။ အဲလို ဗုံးကြဲချလို့ လက်ပံတိုရွာက ဆိုင်ကယ်ပြင်ဆိုင်နဲ့ စားသောက်ဆိုင်တချို့ ပျက်စီးပြီး ဆိုင်ကယ်ပြင်ဆိုင်က ပြည်သူ ၂ ဦး၊ သရက်ကန်လမ်းခွဲ စားသောက်ဆိုင်က ပြည်သူ ၃ ဦး သေဆုံးပြီး ထိခိုက်ဒဏ်ရာ ၆ ဦး ရှိခဲ့တယ်ဗျ။ ဒဏ်ရာရ ၆ ဦးထဲမှာလည်း အသက်အန္တရာယ် စိုးရိမ်ရတဲ့သူတွေ ပါတယ်ဗျ။ အဲဒါက Y12 လေယာဉ်နဲ့ တိုက်ခိုက်သွားတာဗျ။ နောက်ထပ် ဂျက်ဖိုက်တာနဲ့လည်း သရက်ကန်ရွာက စားသောက်ဆိုင်ကို ထပ်ပြီး လာပစ်သေးတယ်။ အဲဒီအကြိမ်မှာလည်း ပြည်သူ ၃ ဦး ထပ်ပြီး သေဆုံးတယ်” လို့ DVB ကို ပြောပါတယ်။

စစ်တပ်က မတ် ၃ ရက်‌ မနက်အစောပိုင်းမှာ မကွေးတိုင်းအပြင် စစ်ကိုင်းတိုင်းအတွင်းက ခင်ဦးမြို့နယ်၊ ညောင်ပင်ကြီးစုရွာကို ဗုံးကြဲတိုက်ခိုက်တယ်လို့လည်း သိရပါတယ်။

ခင်ဦးဒေသခံ မနှင်းဆီက “အိမ်တွေကို တုန်သွားတာပဲ။ ဗုံးသီးချတာက တလုံးတည်းရယ်။ ရွာရဲ့အရှေ့ဘက်က ယာခင်းထဲ ချသွားတာလေ။ ယာခင်းစောင့်နေတဲ့ လင်မယား ၂ ဦးထဲက ယောကျ်ားဖြစ်တဲ့ အသက် ၇၀ အရွယ် ဦးနန်း မစိုးရိမ်ရဒဏ်ရာ ရရှိခဲ့တယ်။ ကျန်တာကတော့ ထိခိုက်တာမရှိဘူး။ တိုက်ပွဲလည်း မဖြစ်ဘူး။ အကြောင်းမဲ့ လာကြဲချသွားတာ။ သူတို့ဘက်က သတင်းအမှားရလို့ လာချတာလည်း ဖြစ်နိုင်ပါတယ်။ မြေပြင်မှာတော့ ဘာမှမရှိဘူး” လို့ DVB ကို ပြောပါတယ်။

အခုလို စစ်တပ်က လေကြောင်းတိုက်ခိုက် ဗုံးကြဲချခံရတဲ့ ကျေးရွာက ဒေသခံတွေနဲ့ အနီးဝန်းကျင်က ဒေသခံတွေဟာ စစ်တပ်ရဲ့ နောက်ထပ်တကြိမ် လေယာဉ်နဲ့ လာရောက်ဗုံးကြဲချမှာကို ကြောက်လန့်ပြီး ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌မတ် ၃ ရက် နေ့ပိုင်းက စတင်ပြီး နေရပ်စွန့်ခွာ ထွက်ပြေးနေကြရတယ်လို့လည်း သိရပါတယ်။