မကွေးတိုင်း၊ ရေစကြိုမြို့နယ်၊ မြေစွန်းတော်ကျေးရွာကို မတ် ၂ ရက် မနက်ပိုင်းမှာ စစ်ကောင်စီတပ်က မီးရှို့ဖျက်ဆီးခဲ့တယ်လို့ ဒေသခံတွေဆီကနေ သိရပါတယ်။
ရေစကြိုမြို့နယ် ရေလယ်ကျွန်းဒေသက မြေစွန်းတော်ကျေးရွာကို မတ် ၂ ရက် မနက် ၉ နာရီ ကျော်လောက်မှာ စစ်ကောင်စီစစ်ကြောင်းက မီးရှို့ဖျက်ဆီးခဲ့တယ်လို့ မြေစွန်းတော်ကျေးရွာ ဒေသခံတယောက်က DVB ကို ပြောပါတယ်။
ရေလယ်ကျွန်းဒေသကို စစ်ကောင်စီတပ်က အင်အား ၂၀၀ လောက်နဲ့ စစ်ကြောင်းထိုးလာတယ်လို့ သတင်းကြားလို့ ပြီးခဲ့တဲ့တပတ်လောက်ကတည်းက ကျေးရွာ ၁၀ ရွာလောက်က ဒေသခံပြည်သူ ထောင်နဲ့ချီ ဘေးလွတ်ရာနေရာတွေကို ထွက်ပြေးတိမ်းရှောင်နေကြတာ ဆိုပါတယ်။
စစ်ကောင်စီတပ်က စစ်ကြောင်းထိုး မွှေနှောက်နေတာဖြစ်လို့ အိမ်ခြေ ဘယ်လောက် မီးလောင်ကျွမ်းတယ် ဆိုတာကိုတော့ အတည်မပြုနိုင်သေးပါဘူး။
စစ်ကောင်စီစစ်ကြောင်းဟာ ဖေဖော်ဝါရီ ၂၆ ရက်မှာ ပြည်သူ့ကာကွယ်ရေးပူးပေါင်းတပ်ဖွဲ့တွေရဲ့ ဝိုင်းတိုက်ခိုက်တာကိုခံရလို့ အထိနာသွားတာကြောင့် လေကြောင်းတိုက်ခိုက်ခဲ့သလို အခုလည်း ပြည်သူတွေရဲ့ နေအိမ်တွေကို မီးရှို့ဖျက်ဆီးခဲ့ကြတာလို့ ဒေသခံက ပြောပါတယ်။
ရေစကြိုမြို့နယ်မှာ ဖေဖော်ဝါရီ ၂၆ ရက်က စစ်ကောင်စီစစ်ကြောင်းတိုက်ခိုက်ခံရပြီး ၉ ယောက်သေဆုံးကာ ၂၀ ကျော် ဒဏ်ရာရရှိပြီး ၊ ၉ယောက်ဖမ်းဆီးခံရကာ လက်နက်ခဲယမ်းတချို့ ဖမ်းဆီးရရှိခဲ့တယ်လို့ မြင်းခြံကျားနက်တပ်ဖွဲ့-MBT ကနေ သိရပါတယ်။
