တရုတ်နိုင်ငံ၊ တယ်ဟုန်ပြည်နယ်ခွဲနဲ့ ရွှေလီမြို့ ပြည်သူ့အစိုးရတို့က ရှမ်းပြည်နယ်ရှိ ငလျင်ဘေးသင့် ပြည်သူတွေအတွက် ကျပ်သိန်း ၆၆၀၀ တန်ဖိုးရှိ လူသုံးကုန်ပစ္စည်းတွေ ထောက်ပံ့ လှူဒါန်းခဲ့ကြောင်း ဌာနဆိုင်ရာနဲ့ နီးစပ်သူတွေဆီက သိရပါတယ်။
ဌာနဆိုင်ရာနဲ့ နီးစပ်သူတယောက်က “တရုတ်ငွေ ယွမ် ၁၁ သိန်း (ကာလပေါက်ဈေး ကျပ် သိန်း ၆၆၀၀)လောက် တန်ဖိုးရှိတဲ့ လူသုံးကုန်ပစ္စည်းမျိုးစုံနဲ့ ဆေးဝါးပစ္စည်းတွေ လှူဒါန်းပေးတယ်” လို့ ပြောပါတယ်။
မူဆယ်မြို့ရှိ မြန်မာ-တရုတ် နှစ်နိုင်ငံ အဝင်၊ အထွက် ဂိတ်ဖြစ်တဲ့ မန့်ဝိန်း-ကြယ်ဂေါင် နယ်စပ်ဂိတ်မှာ မတ် ၂၉ ရက် ညနေ ၆ နာရီခန့်က လာရောက်လှူဒါန်းခဲ့တာလို့ သူက ပြောပါတယ်။
လှူဒါန်းပစ္စည်းတွေကတော့ ရှမ်းပြည်နယ်အတွင်းက ငလျင်သဘာဝဘေးဒဏ် ထိခိုက်ခံရတဲ့ ပြည်သူတွေအတွက် ဖြစ်ပြီး ရွက်ဖျင်တဲ ၃၀၀၊ အသင့်စားခေါက်ဆွဲဖာ ၃၀၀၀၊ ခေါက်ဆွဲဖာ ၃၀၀၊ ဆန်အိတ် ၆၀၀၊ ခေါက်ခုတင်အလုံး ၈၀၀၊ အိပ်ရာခင်းအစုံ ၁၆၀၀ စုံ၊ ဂွမ်းစောင် အထည် ၈၀၀၊ ရောင်စုံမိုးကာဖျင်လိပ် ၅၀ နဲ့ ဆေးဝါးပစ္စည်းတွေ ပါဝင်တယ်လို့ ဆိုပါတယ်။
ဒေသခံတယောက်က “ရှမ်းပြည်နယ်က ငလျင်ဘေးသင့်ဒေသတွေအတွက် တရုတ်ဘက်က လှူဒါန်းထားတဲ့ ကယ်ဆယ်ရေးပစ္စည်း တင်ဆောင်တဲ့ကားတွေက ဆင်းသွားပြီ။ ကားကြီး ငါးစီး၊ ခြောက်စီးနဲ့”လို့ ပြောပါတယ်။
အဲဒီ ငလျင်ကယ်ဆယ်ရေးပစ္စည်းတင်တဲ့ကားတွေက မတ် ၃၀ ရက် ညနေ ၅ နာရီခွဲ ဝန်းကျင်ခန့်က ပြည်ထောင်စုလမ်းမအတိုင်း ထွက်ခွာသွားခဲ့ကြတယ်လို့ ဆိုပါတယ်။
တရုတ်နိုင်ငံအစိုးရအနေနဲ့ မတ် ၂၈ ရက် လှုပ်ခတ်ခဲ့တဲ့ အင်အားပြင်း ငလျင်ဒဏ် ဘေးကြုံနေရတဲ့ မြန်မာနိုင်ငံကို တရုတ်ငွေ ယွမ် သန်း ၁၀၀ တန်ဖိုးရှိ ငလျင်ဘေးအန္တရာယ် ကယ်ဆယ်ရေး အရေးပေါ်ပစ္စည်းတွေ ထောက်ပံ့ကူညီမှာလို့ မြန်မာနိုင်ငံဆိုင်ရာ တရုတ်သံရုံးရဲ့ သတင်းထုတ်ပြန်ချက်အရ သိရပါတယ်။
