ဆွီဒင်နိုင်ငံက ယူကရိန်းစစ်ပွဲအဆုံးသတ်ရေး ဆွေးနွေးပွဲတွေမှာ ယူကရိန်းရဲ့ ရပ်တည်ချက်ကို ခိုင်မာစေဖို့ ကူညီချင်တယ်လို့ပြောရင်း ယူကရိန်းအတွက် (အမေရိကန်ဒေါ်လာ ၁ ဒသမ ၅၉ ဘီလီယံ တန်ဖိုးရှိတဲ့) ဆွီဒင် ခရောင်း ငွေ ၁၆ ဘီလီယံတန် စစ်ရေးအကူအညီအသစ်တွေ ပေးမယ်လို့ ကြေညာခဲ့ပါတယ်။

ဒီအကူအညီတွေထဲမှာ ဆွီဒင်ခရောင်းငွေ ၉ ဘီလီယံ တန်တဲ့ ဆွီဒင်ကာကွယ်ရေးပစ္စည်း စီမံခန့်ခွဲရေးဌာနက  ဦးဆောင်မယ့် လုပ်ငန်းစဉ်တွေကနေ ဝယ်မယ့် စက်ပစ္စည်းအသစ်တွေ ပါမယ်လို့ ဆွီဒင်ကာကွယ်ရေးဝန်ကြီး ပါးလ်ဂျွန်ဆင်က သတင်းစာရှင်းလင်းပွဲမှာ ပြောပါတယ်။

ဆွီဒင်ခရောင်းငွေ ၅ ဘီလီယံလောက်ကိုတော့ ယူကရိန်းကာကွယ်ရေး စက်မှုလုပ်ငန်းအတွက် ဘဏ္ဍာရေးအလှူအဖြစ် လှူဒါန်းမှာပါ။

ဂျွန်ဆင်က “ကျနော်တို့ အခု စစ်ပွဲရဲ့ အရေးကြီးတဲ့ အဆင့်ကို ရောက်နေပါပြီ။ ကျနော်တို့ အာရုံစိုက်တာက အခု ဆွေးနွေးပွဲတွေအတွင်းမှာ ယူကရိန်းကို အတတ်နိုင်ဆုံး ပံ့ပိုးကူညီဖို့ပါ” လို့ ပြောပါတယ်။

အခုဥရောပနိုင်ငံအားလုံး က ယူကရိန်းအပေါ် သူတို့ရဲ့ ထောက်ခံမှုကို တိုးမြှင့်ဖို့လိုနေပြီလို့ ဂျွန်ဆင်က ပြောပါတယ်။

ဆွီဒင်အစိုးရက ရုရှားကျူးကျော်မှုကို တိုက်ဖျက်ဖို့ အစောပိုင်းက ခန့်မှန်းထားတဲ့ ၂၅ ဘီလီယံကနေ ၂၀၂၅ ခုနှစ် ဘတ်ဂျက်ခွဲဝေရာမှာ  ဘီလီယံ ၄၀ အထိ တိုးမြှင့်ခဲ့တာဖြစ်ပြီး ယူကရိန်းကို အခုနှစ်မှာ အကူအညီတွေ တိုးမြှင့်ပေးသွားမယ်လို့ ဆွီဒင်အစိုးရက ပြောပါတယ်။

အခုအကူအညီသစ်အပါအဝင် ဆွီဒင်ရဲ့ စစ်ရေးထောက်ပံ့မှုဟာ ၂၀၂၂ ခုနှစ်ကတည်းကနေ ခုထိ စုစုပေါင်း ဆွီဒင်ခရောင်းငွေ ဘီလီယံ ၈၀  ရှိသွားပြီလို့ ရိုက်တာ သတင်းမှာ ရေးပါတယ်။

ယူကရိန်းနဲ့ အပစ်အခတ်ရပ်စဲရေး သဘောတူဖို့ ရုရှားကို ဥရောပသံတမန်တွေက မတ်လ ၃၁ ရက်မှာ တိုက်တွန်း ခဲ့ပါတယ်။

ပြင်သစ်နဲ့ ဗြိတိန်တို့ ညှိုနှိုင်းဆောင်ရွက်နေတဲ့ ယူကရိန်းငြိမ်းချမ်းရေးအတွက် ထိန်းသိမ်းရေး တပ်ဖွဲ့တွေ ချထားရေးကိစ္စနဲ့ ပတ်သက်ပြီး မေးမြန်းရာမှာ ယူကရိန်းနိုင်ငံမှာ နိုင်ငံခြား တပ်ဖွဲ့ဝင်တွေ ဘယ်အချိန်မှာ ထားသင့်တယ်ဆိုတာကို ဆုံးဖြတ်ဖို့က ယူကရိန်း အစိုးရအပေါ် မူတည်တယ်လို့ ပိုလန်နိုင်ငံခြားရေးဝန်ကြီး ရိုဒိုရွှာ စီကော်စကီက ပြောပါတယ်။

ယူကရိန်းနိုင်ငံအရေး စပိန်နိုင်ငံ မက်ဒရစ်မြို့မှာ ကျင်းပတဲ့ ဥရောပနိုင်ငံခြားရေးဝန်ကြီးများ အစည်းအဝေး မတိုင်မီသူက ခုလို ပြောခဲ့တာပါ။

ဥရောပ ထိပ်တန်းသံတမန် ကာယာကားလက်စ်က ရုရှားကို ချစ်ကြည်ရေးအတွက် စေတနာပြဖို့ တိုက်တွန်းခဲ့ပြီး ၃ နှစ်ကြာ သွေးထွက်သံယို ပဋိပက္ခကို အဆုံးသတ်ရေး ရုရှားအစိုးရကို ဖိအားပေးဖို့ အမေရိကန်ကို တောင်းဆိုလိုက်ပါတယ်။

စပိန်နိုင်ငံခြားရေးဝန်ကြီး ဟိုဆေး မန်နျူယယ်အယ်လ်ဘားရက်စ်က ယူကရိန်းနိုင်ငံအတွက် ငွေကြေးထောက်ပံ့နိုင်ရေး ဥရောပမှာ ထိန်းသိမ်းထားတဲ့ ရုရှားရဲ့ ပိုင်ဆိုင်မှုတွေကို သုံးဖို့ သူ့အစိုးရက တွန်းအားပေးနေတယ်လို့ ပြောပါတယ်။

ထိန်းသိမ်းထားတဲ့ ရုရှားရဲ့ ပိုင်ဆိုင်မှုတွေကိုသုံးတာကို ရုရှားက ယူကရိန်းကို ပေးဆောင်ရမယ့် အနာဂတ် စစ်လျော်ကြေးအဖြစ် ယူဆနိုင်တယ်လို့လည်း သူက ထည့်သွင်းပြောခဲ့ပါတယ်။

ပြင်သစ်နိုင်ငံခြားရေးဝန်ကြီး ယွန်းနိုဝယ်ဘာဟူက ရုရှားဟာ ငြိမ်းချမ်းရေးရချင်စိတ် ရှိမရှိနဲ့ ပတ်သက်ပြီး အမေရိကန်ကို ရှင်းရှင်း လင်းလင်းတုံ့ပြန်ဖို့ အကြွေးတင်ထားတယ်လို့ ပြောပါတယ်။

Source: Reuters