ရုရှားတပ်ဖွဲ့တွေအားလုံး ယူကရိန်းကနေ “ခြွင်းချက်မရှိဆုတ်ခွာ” ပေးဖို့ ဆိုတာဟာ ဥရောပသမဂ္ဂ (EU) ရဲ့ ရုရှားအပေါ် အရေးယူပိတ်ဆို့မှုတွေ ရုပ်သိမ်းဖို့၊ ပြင်ဆင်ဖို့အတွက် အဓိက သတ်မှတ်ချက်တခု ဖြစ်တယ်လို့ ဥရောပကော်မရှင်က ထုတ်ပြန်ပါတယ်။

ပင်လယ်ပြင်နဲ့ စွမ်းအင်ပစ်မှတ်တွေအပေါ် တိုက်ခိုက်မှုတွေ ရပ်တန့်ထားဖို့ ယူကရိန်း၊ ရုရှားတို့နဲ့ အမေရိကန်က အင်္ဂါနေ့မှာ သီးခြားစီ သဘောတူညီချက် ယူခဲ့အပြီးမှာ မော်စကိုအပေါ် အရေးယူ ပိတ်ဆို့ထားမှု တချို့ပါ ရုပ်သိမ်းရေး ဖိအားပေးဖို့ ဝါရှင်တန်က သဘောတူခဲ့ပါတယ်။ ဒီဆွေးနွေးပွဲတွေမှာ EU ကိုတော့ ဖိတ်ကြားခဲ့ခြင်း မရှိပါဘူး။ အခုလို သဘောတူညီချက်ရတာကို ကြိုဆိုကြောင်း ဥရောပကော်မရှင်က ထုတ်ပြန်ပါတယ်။

ပင်လယ်နက်မှာ ရေကြောင်း လုံခြုံရေး သဘောတူညီချက်အတွက် အကြိုသတ်မှတ်ချက်အနေနဲ့ စားနပ်ရိက္ခာ၊ ဓာတ်မြေဩဇာနဲ့ ရေကြောင်းပို့ဆောင်ရေး ကုမ္ပဏီတွေအပေါ်  အနောက်နိုင်ငံတွေက ချမှတ်ထားတဲ့ အရေးယူမှုတွေနဲ့ ကန့်သတ်ချက်တွေ ရုပ်သိမ်းရေး ကူညီပေးဖို့ရာ အမေရိကန်က သဘောတူခဲ့တယ်လို့ ရုရှားက ထုတ်ပြန်ထားပါတယ်။ ဒီအချိန်မှာ EU ဘက်က သဘောထားကို ထုတ်ပြန်လာတာ ဖြစ်ပါတယ်။

ဥရောပသမဂ္ဂဝင် နိုင်ငံတွေဟာ ရုရှားအပေါ် အရေးယူပိတ်ဆို့မှု မူဘောင် ၂ ခု ချမှတ်ထားပြီး တခုကို ဒီနှစ် ဇန်နဝါရီလကုန်နဲ့ နောက်တခုကို ဒီလထဲမှာ ၆ လစီ သက်တမ်းထပ်တိုးထားပါတယ်။ ပြင်ဆင်ဖို့ဆိုရင်တော့ အဖွဲ့ဝင် ၂၇ နိုင်ငံလုံး သဘောတူမှ ရမှာဖြစ်ပါတယ်။

EU နိုင်ငံခြားရေးရာ ပြောခွင့်ရပုဂ္ဂိုလ် အနီတာ ဟစ်ပါက  “ရုရှားက ဒီ တရားမဝင်၊ အကြောင်းမဲ့တဲ့ ရန်စကျူးကျော်တဲ့ စစ်ပွဲကို အဆုံးသတ်ဖို့ စစ်မှန်တဲ့ နိုင်ငံရေးစိတ်ဆန္ဒကို ပြသရပါမယ်။ ရုရှားကို စကားလုံးတွေနဲ့ ဆုံးဖြတ်လို့မရဘဲ လုပ်ရပ်နဲ့ပဲ ဆုံးဖြတ်လို့ရတယ် ဆိုတာ အတွေ့အကြုံတွေက ဖော်ပြနေပါတယ်” လို့ ထုတ်ပြန်ထားပါတယ်။

Source : Reuters