ရန်ကုန်-မန္တလေး အမြန်လမ်းပေါ်မှာ ဆိုင်ကယ်စီးနင်းလာတဲ့ စစ်ကောင်စီ လက်အောက်ခံ ရဲတပ်ဖွဲ့ဝင်တယောက်ဆီကနေ မူးယစ်ဆေးပြားတွေ သိမ်းဆည်းရရှိခဲ့တယ်လို့ တိုက်ဒေါင်းပြည်သူ့တော်လှန်ရေးအင်အားစုက မတ်လ ၃၀ ရက်မှာ သတင်းထုတ်ပြန်ပါတယ်။

အဆိုပါရဲတပ်ဖွဲ့ဝင်ဟာ မန္တလေးတိုင်း၊ ရမည်းသင်းမြို့မရဲစခန်းက အသက် ၄၅ နှစ်အရွယ် ရဲတပ်ကြပ်ကြီး သန်းထိုက် ဖြစ်ပြီး မတ် ၂၈ ရက် မနက် ၉ နာရီခွဲဝန်းကျင်မှာ ပစ်ခတ်ဖမ်းဆီးရာက နေ မူးယစ်ဆေးဝါးတွေ သိမ်းဆည်းရမိခဲ့တာလို့ ဆိုပါတယ်။ 

တိုက်ဒေါင်းပြည်သူ့တော်လှန်ရေးအင်အားစုတာဝန်ခံ ဗိုလ်သူရိန်လင်းက “သူ့ကို မူးယစ်ဆေး အရောင်းအဝယ်လုပ်နေတယ်လို့ သတင်းရထားတာကြပြီ။ အခုမှ ရှင်းလင်းနိုင်ခဲ့တာပေါ့။ အတိုနဲ့  ၄ ချက် ပစ်ခတ်တာ ခေါင်းကို ၂ ချက်နဲ့ ရင်ဘတ်ကို ၂ ချက်ထိပြီး နေရာမှာတင် သေတယ်။ သူ့ဆီကပစ္စည်းတွေကို စစ်ဆေးလိုက်တဲ့အခါမှာ ထင်ထားတဲ့အတိုင်းပဲ WY မူးယစ်ဆေးပြားတွေ တွေ့ရတယ်” လို့ပြောပါတယ်။

သေဆုံးသူ ရဲတပ်ကြပ်ကြီး သန်းထိုက် ဆီကနေ WY တံဆိပ်ပါမူးယစ်ဆေးပြား အပြား ၃၀ အပြင် လက်ကိုင်ဖုန်း ၃ လုံးနဲ့ ပါဝါဘန့် ၁ ခုတို့ကို သိမ်းဆည်းရရှိခဲ့ပါတယ်။

ဒေါင်းပြည်သူ့တော်လှန်ရေးအင်အားစုရဲ့ ပြန်ကြားရေးတာဝန်ခံက “အမြန်လမ်းပေါ်မှာ အရပ်ဝတ် ဝတ်ပြီး ဆိုင်ကယ်စီးလာတဲ့ ရမည်းသင်းရဲစခန်းကနေ ဆိုင်ကယ်နဲ့ထွက်လာတဲ့ ရဲတပ်ကြပ်ကြီးကို အမြန်လမ်းပေါ်က မိုင်တိုင် ၂၅၄ နားမှာ ကျနော်တို့အဖွဲ့နဲ့အတူ ရမည်းသင်းခရိုင် ပကဖ တို့ ပူးပေါင်းရှင်းလင်းခဲ့ကြတာပါ။ ပစ်ခတ်မှုပြီးလို့ သတင်းထုတ်ပြန်ကာနီးမှာ ငလျင်လှုပ်သွားတော့ သတင်းထုတ်ပြန်ဖို့ နောက်ကျခဲ့တာ”လို့ ပြောပါတယ်။

ရဲတပ်ကြပ်ကြီး သန်းထိုက် ပစ်ခတ်ခံရတာနဲ့ပတ်သက်ပြီး အသေးစိတ်သိရှိနိုင်ဖို့ ရမည်းသင်းမြို့မရဲစခန်းကို DVB က ဖုန်းဆက်မေးမြန်းခဲ့ပေမယ့် လက်ခံဖြေဆိုသူမရှိခဲ့ပါဘူး။

Photo: တိုက်ဒေါင်းပြည်သူ့တော်လှန်ရေးအင်အားစု