မတ် ၃၀ ရက် မြန်မာစံတော်ချိန် မွန်းလွဲ ၁ နာရီ ၃၈ မိနစ်ခန့်က မန္တလေးမြို့ အနောက်မြောက်ဘက် ၂၈ ကီလိုမီတာအကွာ မတ္တရာမြို့နယ်ထဲကို ဗဟိုပြုပြီး ပြင်းအား ရစ်ချ်တာစကေး ၅ ဒသမ ၁ ၊ အနက် ၁၀ ကီလိုမီတာရှိတဲ့ ငလျင်တခု လှုပ်ခတ်ခဲ့တယ်လို့ အမေရိကန်ဘူမိဗေဒ လေ့လာရေးအဖွဲ့ (USGS) အဖွဲ့က ထုတ်ပြန်ပါတယ်။
မန္တလေးမြို့မှာ ပြီးခဲ့တဲ့ မတ် ၂၈ ရက်က ငလျင်ကြောင့် ပြိုကျမှုတွေအောက်မှာ ပိတ်မိနေသူတွေကို ကူညီကယ်ဆယ်ရေးတွေ လုပ်ဆောင်နေချိန်မှာ သိသာတဲ့လှုပ်ခတ်မှု ဖြစ်ခဲ့တာပါ။
ငလျင်ဗဟိုချက်နဲ့ ၃၅ ကီလိုမီတာအကွာမှာရှိတဲ့ စစ်ကိုင်းတိုင်းထဲက နေရာတွေမှာလည်း ငလျင်လှုပ်ခတ်မှုတွေ ခံစားရကြောင်း ဒေသခံတွေက ပြောပါတယ်။
စစ်ကိုင်းမြို့အနီးဒေသခံတယောက်က “လှုပ်တာ သိလိုက်တယ်၊ တော်တော်လေးကြမ်းတယ်၊ ဟိုနေ့က လှုပ်တဲ့နောက်ပိုင်း အကြမ်းဆုံးပဲ” လို့ ပြောပါတယ်။
မတ် ၂၈ ရက် နောက်ပိုင်း နောက်ဆက်တွဲလှုပ်ခတ်မှု aftershocks အကြိမ်ပေါင်း ၁၆၀ ကျော် ရှိလာပြီ ဖြစ်ပါတယ်။
မတ် ၂၈ ရက်က လှုပ်ခတ်ခဲတဲ့ ရစ်ချ်တာစကေး ၇ ဒသမ ၇ ရှိတဲ့ အင်အားပြင်းငလျင်ကြောင့် လှုပ်ခတ်အပြီး ၄၃ နာရီအကြာ DVB က ကောက်ယူရရှိတဲ့ စာရင်းအရ မြန်မာနိုင်ငံအနှံ့ သေဆုံးသူ ၂,၀၂၈ ယောက်အထိ ရှိလာပြီ ဖြစ်ပါတယ်။
