အာဏာသိမ်းစစ်ကောင်စီ ရုံးစိုက်ရာ နေပြည်တော်မှာ မတ် ၂၉ ရက် ညသန်းခေါင်က နောက်ဆက်တွဲ ငလျင်တွေ ထပ်မံလှုပ်ခတ်ခဲ့တာကြောင့် အိမ်တွေ ထပ်ပြိုကျပျက်စီးခဲ့ပြီး နေရေးထိုင်ရေးနဲ့ အစားအစာ ချက်ပြုတ်စားသောက်ဖို့ အကူအညီတွေ လိုအပ်နေတယ်လို့   ဒေသခံတွေက  ပြောပါတယ်။

ဇမ္ဗူသီရိမြို့နယ်၊ သုခသိဒ္ဓိရပ်ကွက်နေသူ တယောက်က “၁၂ ခွဲ၊ ၁ နာရီလောက် လှုပ်သွားတာ၊ လှုပ်တုန်းက ခဏပဲလှုပ်တာ တော်တော်ပြင်းတယ်၊ အကုန်လုံး တိုက်တွေကွဲ၊ အကုန်လုံး အိမ်တွေပြို၊ မြေတွေပြို ဖြစ်တာပေါ့” လို့ DVB ကို ပြောပါတယ်။

ဒီလို ငလျင်လှုပ်ခတ်မှုကြောင့် သူတိုတရပ်ကွက်လုံး မဟုတ်ဘဲ တမြို့လုံး ဘယ်သူမှ အိမ်ထဲမှာ မနေရဲကြဘဲ မတ် ၃၀ ရက် မနက်ပိုင်းထိ အကုန်လုံး အိမ်အပြင်ထွက် နေနေကြရတယ်လို့ ဆိုပါတယ်။

အိမ်တွေပြိုကျပျက်စီးတာတွေ ရှိသလို မပြိုဘဲ ကျန်ခဲ့တဲ့ အိမ်တွေဆိုရင်လည်း အောက်ကို ကျွံဝင်ကုန်တယ်လို့လည်း သိရပါတယ်။

နေပြည်တော်၊ ဇမ္ဗူသီရိမြို့နယ်က ငလျင်ဒဏ်သင့် ပြည်သူတွေအနေနဲ့ မီးပြတ်၊ ရေပြတ် အခြေအနေတွေ ဖြစ်နေပြီး ချက်ပြုတ်စားသောက်ဖို့ မဖြစ်နိုင်တဲ့ အခြေအနေမှာ ရှိနေတယ်လို့ ဒေသခံတွေက ဆိုပါတယ်။

ကူညီကယ်ဆယ်ရေးတွေလည်း မရှိသလို ကိုယ့်အစီအစဉ်နဲ့ကိုယ်ပဲ အဆင်ပြေသလို နေနေကြရပြီး နေဖို့ထိုင်ဖို့ တခုခု စီစဉ်ပေးဖို့ လိုတယ်လို့လည်း ဒေသခံတွေက ဆိုပါတယ်။မတ် ၂၈ ရက်က မန္တလေးနဲ့ စစ်ကိုင်းကို ဗဟိုပြုလှုပ်ခတ်ခဲ့တဲ့ အင်အားပြင်းငလျင် လှုပ်ခတ်မှုကြောင့်  နေပြည်တော်မှာလည်း စစ်ရုံးနဲ့ ဝန်ထမ်းအိမ်ရာတွေ အပါအဝင် အဆောက်အအုံတွေ ပြိုကျပျက်စီးပြီး လူတွေလည်း ထိခိုက်ဒဏ်ရာရ သေဆုံးမှုရှိခဲ့ပါတယ်။