စစ်ကောင်စီရဲ့ လေကြောင်းတိုက်ခိုက်မှုတွေ ပိုများလာပြီးနောက်ပိုင်း လေကြောင်းရန် ကာကွယ်ရေးအတွက် ဗုံးခိုကျင်းတွေ တူးဖို့ ပြည်သူတွေကို အသိပညာပေးထုတ်ပြန်နေပေမဲ့ မြေပြင်မှာ အခက်အခဲတွေ ရှိနေတယ်လို့ သိရပါတယ်။ 

အခုနှစ် အစောပိုင်းကစပြီး မုံရွာမြို့အခြေစိုက် မုံရွာအနောက်မြောက်တိုင်းစစ်ဌာနချုပ် (နမခ)နဲ့ နီးစပ်တဲ့ ကျေးရွာတွေကို စစ်ကောင်စီက တာဝေးပစ်လက်နက်ကြီး၊ ဂျက်ဖိုက်တာ၊ စက်တပ်လေထီး စတာတွေသုံးပြီး တိုက်ခိုက်မှုတွေ လုပ်နေသလို ထိခိုက်သေဆုံးမှုတွေလည်း များပြားလာတယ်လို့ စစ်ရေးသတင်းထုတ်ပြန်ချက်မှတ်တမ်းတွေအရ သိရပါတယ်။

ဒါကြောင့် စစ်ကိုင်းတိုင်း ယင်းမာပင်ခရိုင် ပြည်သူ့အုပ်ချုပ်ရေးအဖွဲ့ကနေ မုံရွာ နမခနဲ့ နီးစပ်တဲ့ ကျေးရွာတွေကို ဗုံးခိုကျင်း ကတုတ်ကျင်းတွေ တူးထားဖို့ ဖေဖော်ဝါရီလကုန်ပိုင်းကတည်းက ညွှန်ကြားထားတယ်လို့ ဒေသခံတွေက‌ ပြောပါတယ်။

မိသားစု ၅ ယောက်စာ တူးထားတဲ့ မြေသားဗုံးခိုကျင်း တကျင်းကို ငွေကျပ် ၄ သိန်းဝန်းကျင် ကုန်ကျပြီး အုပ်စီ ဗုံးခိုကျင်းတကျင်းကိုတော့ ငွေကျပ်သိန်း ၂၀ ဝန်းကျင်အထိ ကုန်ကျတယ်လို့ အကူအညီပေးနေသူတွေက ပြောပါတယ်။

ဗုံးခိုကျင်းတွေကိုတော့ ယင်းမာပင်ခရိုင်အတွင်းက နေအိမ်တွေတချို့မှာ တူးဖော်နေပြီး မီးရှို့ခံကျေးရွာတွေက နေရပ်စွန့်ခွာပြည်သူတွေကတော့ ဗုံးခိုကျင်းတူးဖော်ဖို့ အခက်အခဲတွေ ကြုံနေရတယ်လို့ သိရပါတယ်။

ကနီဒေသခံတယောက်က “အနည်းအကျဉ်းလောက်တော့ တူးဖြစ်ကြပါတယ်။ အစ်ကို အနေနဲ့ကတော့ မတူးဖြစ်သေးဘူးဗျ။ ရွာအနေနဲ့ဆိုရင်တော့ တူးထားတဲ့ဟာတွေလည်းရှိတယ်၊ မတူးရသေးတဲ့ဟာတွေလည်း အတော်များများရှိပါတယ်။ ကျနော့်အိမ်မှာဆိုရင်တော့ ကျနော့်နေရာလေးက ဗွက်တွေနဲ့ မိုးရာသီဆိုရင် ရေလမ်းကြောင်းနဲ့ ရေဝပ်တာပေါ့ဗျာ၊ အဲဒီအခက်အခဲတော့ရှိပါတယ်။ တူးဖို့ရာတော့ စိတ်ကူးရှိပါတယ်၊ အခက်အခဲကတော့ တော်တော်များများ ရှိလောက်ပါတယ်။ အနည်းအကျဉ်းတူးတာထက် နည်းနည်းလေးတော့ ‌ပေါ့တယ်လို့ ထင်တာပေါ့ဗျာ၊ ကိုယ့်ဆီမရောက်သေးဘူးဆိုတဲ့ ပုံစံမျိုးနဲ့” လို့ ပြောပါတယ်။

ယင်းမာပင် ခရိုင်အတွင်းမှာ ယင်းမာပင်၊ ဆားလင်းကြီး၊ ပုလဲ၊ ကနီ စတဲ့မြို့နယ်တွေ ပါဝင်ပြီး အဲဒီမြို့နယ်တွေကို စစ်ကောင်စီက ၄ နှစ်ကျော်ကာလအတွင်း လေကြောင်းတိုက်ခိုက်မှု ၈၄ ကြိမ်အထိ ပြုလုပ်ခဲ့တယ်လို့ သိရပါတယ်။

ဆားလင်းကြီးမြို့နယ် ရပ်ကျေးပအဖအဖွဲ့ဝင်တယောက်က  “သူ့နယ်နဲ့သူတော့ ရှိတာပေါ့ဗျာ။ ကနီနယ်ဆိုရင် လေကြောင်းတိုက်ခိုက်မှု ခပ်စိတ်စိတ်ဖြစ်တယ်ဗျာ။ သူတို့ကတော့ တော်တော်လေး တူးထားတာပေါ့ဗျာ၊ ကျနော်တို့ ဒီဘက်ကျတော့ ငါတို့က လာမှတူးမယ်ဆိုတဲ့ ပုံစံမျိုးတွေလည်း ရှိကောင်းရှိတာပေါ့။ အိမ်အနေနဲ့ဆိုရင် မိသားစု ၇ ယောက်၊ ၈ ယောက်လောက်ရှိရင် မြေအနေအထားပေါ် မူတည်ပြီး အလုပ်လုပ်ရင် မကျဘူးဆို ၁၀ သိန်းလောက်တော့ ကျမှာဗျ။ အပေါ်က အမိုးတွေ၊ သဲအိတ်တွေ ဘာတွေနဲ့ဆိုရင် ၁၀ သိန်းလောက်တောင် ကျလိမ့်မယ်လို့ ခန့်မှန်းတယ်။ ကျင်းတူးရတာက အဆင့် ၃ ဆင့်ရှိတာပေါ့၊ လူဝင်ပေါက် တဆစ်ချိုး နောက်တဆစ်ချိုးနဲ့ဆို ၂ ဆစ်ချိုး တူးရတာပေါ့” လို့ ပြောပါတယ်။

ယင်းမာပင် ခရိုင်အတွင်းက ကာကွယ်ရေး၊ အုပ်ချုပ်ရေးအဖွဲ့တွေအနေနဲ့ လေကြောင်းရန်ကာကွယ်ရေး အသိပညာပေးဟောပြောပွဲတွေ၊ ဆက်တိုက်လေ့ကျင့်တာတွေ၊ ပညာပေးလက်ကမ်းစာဆောင်ဖြန့်ဝေရေး အစီအစဉ်တွေ လုပ်ဆောင်နေတယ်လို့ သိရပါတယ်။ 

သီရိ