ရခိုင်ပြည်နယ်၊ ကျောက်ဖြူမြို့နယ်မှာ မတ် ၂၇ ရက် ညနေပိုင်း စစ်ကောင်စီတပ်က ဒရုန်းနဲ့ ဗုံးကြဲခဲ့လို့ နေအိမ်တအိမ် မီးလောင်ကျွမ်းကာ ကားတစီး ပျက်စီးခဲ့တယ်လို့ ဒေသခံတွေဆီကနေ သိရပါတယ်။
ကျောက်ဖြူမြို့နယ်၊ ကုလားဘာကျေးရွာကို မတ် ၂၇ ရက် ညနေ ၃ နာရီကျော်လောက်မှာ စစ်ကောင်စီဘက်က ဒရုန်းနဲ့ ဗုံး ၂ လုံးကြဲချခဲ့တာလို့ ကုလားဘာကျေးရွာ ဒေသခံတယောက်က DVB ကို ပြောပါတယ်။
အဲဒီဗုံးကြဲတိုက်ခိုက်မှုကြောင့် ဦးမောင်ကျော်စိန်ရဲ့ နေအိမ်မှာ တလုံးကျရောက်ပေါက်ကွဲကာ နေအိမ် မီးလောင်ပြာကျခဲ့ပြီး နောက်တလုံးကတော့ နေအိမ်ရှေ့မှာ ရပ်နားထားတဲ့ ရမ်းဗြဲမြို့နယ် ရမ္မာဝတီ လူမှုကယ်ဆယ်ရေးအသင်းကား ဘေးနားမှာ ကျရောက်ပေါက်ကွဲခဲ့လို့ ကားထိခိုက်ပျက်စီးသွားတယ်လို့ ဆိုပါတယ်။
ကျောက်ဖြူမြို့နယ် ကြတ္တိန်ကျေးရွာကိုလည်း မတ်လ ၁၃ ရက် မွန်းလွဲပိုင်းမှာ စစ်ကောင်စီတပ်က ဒရုန်းနဲ့ဗုံးကြဲခဲ့လို့ ပြည်သူတယောက် သေဆုံးကာ တယောက်ဒဏ်ရာရရှိခဲ့ပြီး နေအိမ်တချို့ မီးလောင်ကျွမ်းခဲ့ပါတယ်။
