တနင်္သာရီတိုင်း၊ ရေဖြူမြို့နယ် အမှတ် (၈) ပြည်ထောင်စုလမ်းမကြီးဘေးမှာရှိတဲ့ ကျောက်ကညာနဲ့ ညင်းထွေးကျေးရွာကြားမှာ မတ် ၂၄ ရက် မနက်ပိုင်း တိုက်ပွဲဖြစ်ပွားခဲ့ပြီး စစ်ကောင်စီတပ်ဘက်က ထိခိုက်သေဆုံးကာ လက်နက်တချို့ သိမ်းဆည်းရမိခဲ့တယ်လို့ ဒူရက စစ်ကြောင်းက ပြောပါတယ်။ 

ဒူရက စစ်ကြောင်းရဲ့ပြောရေးဆိုခွင့်ရှိသူက  “လမ်းကင်းယူဖို့ထွက်လာတဲ့ စစ်ကောင်စီ စစ်ကြောင်းကို ကြားဖြတ်တိုက်ခိုက်ခဲ့တာဖြစ်ကာ စစ်ကောင်စီဘက်က ၂၀ နဲ့ အထက် သေဆုံးခဲ့ပြီး အများအပြားထိခိုက်ဒဏ်ရာရတယ်” လို့ ပြောပါတယ်။

ဒါ့အပြင် တိုက်ပွဲအတွင်း စစ်ကောင်စီဘက်က လက်နက်ငယ် ၄ လက်၊ လက်နက်ကြီး တလက် သိမ်းဆည်းနိုင်ခဲ့ပြီး တိုက်ပွဲဖြစ်ပွားနေချိန် စစ်ကောင်စီရဲ့ ကျောက်ကညာ အခြေစိုက် အမြောက်တပ် ၃၀၄ တပ်ရင်းက လက်နက်ကြီးနဲ့ ကူပစ်ပေးခဲ့သလို အမှတ် (၈) စကခ တပ်ကနေလည်း စက်တပ်လေထီးတွေနဲ့ တက်လာတာမျိုးရှိခဲ့တယ်လို့ ဆိုပါတယ်။ 

စစ်ကောင်စီရဲ့ လက်နက်ကြီး ပစ်ခတ်မှုကြောင့် အသက် ၄၀ အရွယ် ညင်းထွေးရွာသားတယောက် သေဆုံးခဲ့ပြီး ပစ်ခတ်သံတွေကြားလို့ အသက် ၇၀ အရွယ် နောက်ထပ်ရွာသားတယောက်လည်း နှလုံးရပ်လို့  သေဆုံးသွားတယ်လို့ ဒေသခံတွေက ပြောပါတယ်။ 

တိုက်ပွဲမှာ စစ်ကောင်စီတပ်ဖွဲ့ဝင်တွေ သေဆုံးထိခိုက်မှု အခြေအနေ အသေးစိတ်အချက်ကိုတော့ မသိရသေးသလို ဒီတိုက်ပွဲနဲ့ပတ်သက်ပြီး စစ်ကောင်စီ ပြန်ကြားရေးကလည်း သတင်းထုတ်ပြန်ခြင်း မရှိပါဘူး။

အဆိုပါ တိုက်ခိုက်မှုကို ထားဝယ်အမျိုးသားလွတ်မြောက်ရေးတပ်တော် (DNLA)ရဲ့ ဒူရကစစ် ကြောင်းနဲ့ ရေဖြူပြည်သူ့ကာကွယ်ရေးအဖွဲ့ (YPPDF) တို့က ပူးပေါင်းတိုက်ခိုက်ခဲ့တာ ဖြစ်ပါတယ်။