ဧရာဝတီတိုင်း၊ ရေကြည်မြို့နယ်၊ စောပြောကျေးရွာတိုက်ပွဲမှာ သေဆုံးသူတွေနဲ့ ထိခိုက်ဒဏ်ရာရရှိတဲ့ စစ်ကောင်စီတပ်သားတွေကို မတ်လ ၂၂ ရက်က စတင်ပြီး စစ်ကားတွေနဲ့ ရေကြည် အမြောက်တပ်ကို ပြန်လည်သယ်ယူနေတယ်လို့ စစ်ကောင်စီတပ်နဲ့ နီးစပ်သူက ပြောပါတယ်။

စောပြာကျေးရွာအနီး စစ်ကောင်စီတပ်နဲ့ အာရက္ခတပ်တော် (AA) တို့ တိုက်ပွဲဖြစ်ပွားခဲ့ပြီး စစ်ကောင်စီတပ်ဖွဲ့ဝင်တွေ ရာနဲ့ချီ ထိခိုက်သေဆုံးခဲ့ကာ ဒဏ်ရာရသူတွေကိုတော့ ပုသိမ်-ရေကြည်လမ်းက တဆင့် စစ်ကောင်စီတပ်ရဲ့ကား ၁၆ စီးနဲ့ ပြန်သယ်နေတာလို့ ဆိုပါတယ်။

စစ်ကောင်စီတပ်နဲ့ နီးစပ်သူက “ရေကြည်တိုက်ပွဲမှာ ဒဏ်ရာရ သေဆုံးတပ်သားတွေက ကျုံပျော်တပ်နဲ့ ရေကြည်အမြောက်တပ်က စစ်သားတွေအပြင် စစ်မှုထမ်းဥပဒေနဲ့ ခေါ်ထားတဲ့ တပ်သားတွေ များတယ်။ ပြန်သယ်ယူနေတယ်”လို့ ပြောပါတယ်။

ပြန်သယ်လာတဲ့ ဒဏ်ရာရ စစ်ကောင်စီတပ်သားတွေထဲက ဒဏ်ရာ ပြင်းထန်တဲ့ တပ်သားတချို့ကိုတော့ ပုသိမ်ဆေးရုံမှာ ဆေးကုသပေးနေပြီး တချို့ကို ရေကြည် အမြောက်တပ်ထဲမှာ  ဆေးကုသပေးနေပါတယ်။

ရေကြည်ဒေသခံက “စက်စက်ယိုကျေးရွာက ရေကြည်မြို့နယ်၊ ငါးသိုင်းချောင်းဘက်မှာပါ။ အဲဒီဘက်ကနေ ပစ်ခတ်သံတွေ ကြားနေရတယ်။ ဘယ်ဘက်က ပစ်နေတာလဲ မသိဘူး။ စစ်သားတွေ မနည်းဘူး၊ ကားနဲ့ပြန်လာတာ”လို့  ပြောပါတယ်။

သေဆုံးထိခိုက်ဒဏ်ရာရရှိတဲ့ စစ်ကောင်စီ တပ်သားတွေထဲမှာ စစ်မှုထမ်းဥပဒေနဲ့ အဓမ္မစုဆောင်းခံရတဲ့ လူငယ်တွေလည်း ပါတယ်လို့ စစ်ကောင်စီတပ်နဲ့ နီးစပ်သူတွေရဲ့ ပြောပြချက်အရ သိရပါတယ်။

၂၀၂၄ ခုနှစ် ဒီဇင်ဘာ ဒုတိယပတ်က ရခိုင်ပြည်နယ်၊ အမ်းမြို့နယ်တိုက်ပွဲမှာ ထိခိုက်ဒဏ်ရာရရှိတဲ့ စစ်ကောင်စီတပ်သားတွေကို စစ်ကောင်စီက ဂွ-ငါးသိုင်းချောင်းလမ်းကတဆင့် ရေကြည်နဲ့ ပုသိမ်ဆေးရုံကို ပို့ဆောင်ခဲ့ပါတယ်။

ပုသိမ်မှာ ဆေးကုနေရတဲ့ စစ်ကောင်စီတပ်သားတွေကို စစ်ကောင်စီ ဒုတိယခေါင်းဆောင် ဒုဗိုလ်ချုပ်မှူးကြီး စိုးဝင်းက  ဒီဇင်ဘာ ၂၇ ရက်မှာ လာရောက်တွေ့ဆုံခဲ့ပါတယ်။