ကချင်ပြည်နယ်၊ ဗန်းမော်မြို့ စကခ ၂၁ ပတ်ဝန်းကျင်နဲ့တဝိုက်က စစ်ကောင်စီတပ်စခန်းတွေကို ကချင်လွတ်လပ်ရေးတပ်မတော် (KIA) မတ် ၂၂ ရက် မနက်က စတင်ပြီး ပြန်လည်တိုက်ခိုက်နေတယ်လို့ ရှေ့တန်းသတင်းရင်းမြစ်တယောက်က သိရပါတယ်။
“သူတို့ (စကစ) ဘက်က ထိုးလာတာတော့ မရှိဘူး၊ မနေ့က မနက် ၃ နာရီလောက်ကနေ ကျနော်တို့ဘက်က ထိုးနေတာ အခုထိပါပဲ။”
ကချင်လွတ်လပ်ရေးတပ်မတော်က စကခ ၂၁ ကို အားပြု ထိုးစစ်ဆင်တိုက်ခိုက်နေတာဖြစ်ပြီး ဗန်းမော်မြို့ပတ်ဝန်းကျင်က ခလရ ၄၇ နဲ့ ၄ မိုင်း စကစ တပ်စခန်းပတ်ဝန်းကျင်တွေမှာတော့ မြေပြင်တိုက်ခိုက်မှုတွေ မရှိသလောက်ဖြစ်နေတယ်လို့ သိရပါတယ်။
ဝိုင်းမော်မြို့ထဲက နောက်ဆုံးကျန်ရှိနေတဲ့ ခလရ ၅၈ တပ်စခန်းကနေ လမ်ယန်ကျေးရွာဘက်မှာလည်း စစ်ကောင်စီနဲ့ ပြည်သူ့စစ်ပူးပေါင်းတပ်ဖွဲ့တွေက မတ် ၂၁ ရက်က စစ်ရေးလှုပ်ရှားလာတာကြောင့် တိုက်ပွဲဖြစ်ပွားခဲ့တယ်လို့ သိရပါတယ်။
ဝိုင်းမော်မြို့နဲ့ ခလရ ၅၈ တပ်ခန်းတွေကိုလည်း စစ်အင်အားတွေ ပို့ဆောင်နေပြီးတော့ နှစ်ဖက် စစ်ရေးတင်းမာနေတယ်လို့ သိရပါတယ်။
စစ်ကောင်စီဘက်က မတ် ၂၂ ရက်နေ့ ညနေမှာ မြစ်ကြီးနားမြိုနယ်ထဲက မြစ်ကြီးနား-တနိင်း၊ ဖားကန့် လမ်းခွဲကျေးရွာဖြစ်တဲ့ လဝါနဲ့ ဒွန်ဘုန်ခကျေးရွာတွေမှာ သေနတ်ပစ်ဖောက် ဝင်ရောက်လာပြီးတော့ တပ်စွဲနေရာယူနေတယ်လို့ သိရပါတယ်။
စစ်ကောင်စီဘက်က မြစ်ကြီးနား-တနိုင်းလမ်းတလျှောက် စစ်ရေးလှုပ်ရှားနေပြီး လေကြောင်းတိုက်ခိုက်မှုတွေလည်း ပြုလုပ်နေတာကြောင့် ကျေးရွာနေပြည်သူတွေလည်း ထွက်ပြေးတိမ်းရှောင်နေကြရတယ်လို့ သိရပါတယ်။
မြို့သိမ်းတိုက်ပွဲပြင်းထန်နေတဲ့ ဗန်းမော်မြို့ပတ်ဝန်းကျင်ကို စစ်ကောင်စီဘက်က စကခ ၂၁ မကျရေးအတွက် နေ့စဉ် လေကြောင်းတိုက်ခိုက်မှုတွေ အပြင်းအထန်ပြုလုပ်နေတယ်လို့ သိရပါတယ်။
ဗန်းမော်က ကျန်ရှိနေတဲ့ တပ်ခစန်းတွေကို လေကြောင်းကနေသာ လက်နက်ခဲယမ်း၊ ရိက္ခာတွေကို ပို့ဆောင်နေရပြီးတော့ မြေပြင်ထောက်ပို့ မပြုလုပ်နိုင်တော့တဲ့ အခြေအနေဖြစ်ပါတယ်။
