ယီမင်နိုင်ငံမှာ လွန်ခဲ့တဲ့တပတ်ကျော်က စတင်တိုက်ခိုက်ခဲ့တဲ့ အမေရိကန်စစ်တပ်ရဲ့ စစ်ဆင်ရေးတခုမှာ ဟူသီအဖွဲ့ရဲ့ ထိပ်တန်း ဒုံးကျည်ကျွမ်းကျင်ပညာရှင် အပါအဝင် အဓိကကျတဲ့ ဟူသီခေါင်းဆောင်တွေကို ဖယ်ရှား ရှင်းလင်းခဲ့ကြောင်း အိမ်ဖြူတော် အမျိုးသားလုံခြုံရေးအကြံပေး မိုက်ခ်ဝေါ့လ်ဇ်ကပြောကြားလိုက်ပြီး မတ် ၂၄ ရက်မှာ စစ်ဆင်ရေးဗီဒီယိုကို ထုတ်ပြန်ခဲ့ပါတယ်။

ဒီစစ်ဆင်ရေးကို ဟူသီတွေက ဂါဇာရှိ စစ်ပွဲအတွက် ပင်လယ်နီသင်္ဘောတွေကို တိုက်ခိုက်မယ်လို့ ခြိမ်းခြောက်မှုတွေ လုပ်ခဲ့ပြီးနောက်မှာ စတင်ခဲ့ပြီး ဒီစစ်ဆင်ရေးနဲ့ပတ်သက်တဲ့ အသေးစိတ် အချက်အလက်တွေကို အမေရိကန်စစ်တပ်က အခုချိန်ထိ ထုတ်ပြန်ထားပါတယ်။

အမေရိကန်စစ်တပ်ဟာ ဒီသီတင်းပတ်ကုန်က တိုက်ခိုက်ရေးဂျက်လေယာဉ်တွေ နေ့ရောညပါ တိုက်ခိုက်မှု လုပ်ဆောင်နေတဲ့ ဗီဒီယိုကို ထုတ်ပြန်ခဲ့ပါတယ်။

မိုက်ခ်ဝေါ့လ်ဇ်က “ကျနော်တို့က သူတို့ဌာနချုပ်ကို ဝင်တိုက်ခဲ့ပြီး ဆက်သွယ်ရေးလမ်းကြောင်းတွေ၊ လက်နက်စက်ရုံတွေနဲ့ သူတို့ရဲ့ ရေပေါ်ဒရုန်း ထုတ်လုပ်ရေးစက်ရုံကိုတောင် တိုက်ခိုက်ခဲ့တယ်” လို့ CBS သတင်းဌာနကို ပြောကြားခဲ့ပါတယ်။

ဝေါ့လ်ဇ်ဟာ သေဆုံးသွားတဲ့ ဒုံးပျံပညာရှင်ကို ဘယ်သူဘယ်ဝါဖြစ်ကြောင်း မဖော်ထုတ်ခဲ့ဘဲ သတ်ဖြတ်ခံခဲ့ရတဲ့ တခြားခေါင်းဆောင်တွေ အကြောင်းကိုလည်း အသေးစိတ် မပြောခဲ့ပါဘူး။

Source : Reuters