ယီမင်နိုင်ငံ ဆာနာမြို့တော်နဲ့ ဆားဒါမြို့တွေမှာ အမေရိကန်ရဲ့ လေကြောင်းတိုက်ခိုက်မှုကြောင့် လူ ၄ ယောက်ထက်မနည်း သေဆုံးပြီး ၂ ယောက် ဒဏ်ရာရခဲ့တယ်လို့ ဒေသတွင်း မီဒီယာတွေက ဖော်ပြပါတယ်။

ဟူသီသူပုန်တွေကြီးစိုးတဲ့ ယီမင်နိုင်ငံ ဆာနာမြို့တော် အနောက်ဘက်က စစ်ဘက်ဆိုင်ရာ ထောက်ပံ့ရေးနေရာကို ပစ်မှတ်ထား တိုက်ခိုက်ခဲ့တာလို့ အယ်လ်အာရဘီအယ်လ်ယေဒီ သတင်းမှာ ဖော်ပြပါတယ်။

တချိန်တည်းမှာ ဟူသီသူပုန်တွေက မတ် ၂၃ ရက်နှောင်းပိုင်းမှာ ဆာနာမြို့တော်ကို တိုက်ခိုက်မှုအတွင်း လူ တယောက်သေဆုံးပြီး ၁၃ ယောက် ဒဏ်ရာရတယ်လို့ အတည်ပြုခဲ့ပါတယ်။

အစောပိုင်းမှာ ဟူသီမီဒီယာတွေက ယီမင်နိုင်ငံ ဆာနာမြို့တော်က အက်ဆာရပ်ကွက်မှာ အမေရိကန်ရဲ့ လေကြောင်းတိုက်ခိုက်မှုက အဆောက်အဦတလုံးကို မတ် ၂၃ ရက်မှာ ထိမှန်ခဲ့လို့ လူ တယောက်ထက်မနည်း သေဆုံးပြီး တခြားလူ ၁၃ ယောက် ဒဏ်ရာရခဲ့တယ်လို့  ဟူသီတွေ ကြီးကြပ်တဲ့ ကျန်းမာရေးဝန်ကြီးဌာနကို ကိုးကား ဖော်ပြပါတယ်။

သေဆုံး ဒဏ်ရာရသူတွေဟာ လမ်းပေါ်က ဖြတ်သွားဖြတ်လာတွေ ဖြစ်ကြပြီး လေကြောင်း တိုက်ခိုက်ခံရချိန်မှာ အဆောက်အအုံမှာ လူမနေခဲ့ဘူးလို့ မျက်မြင်သက်သေတွေက ပြောပါတယ်။

အဆောက်အဦကတော့ ကွန်ကရစ်တွေကွဲကြေနေပြီး လိမ်ကောက်နေတဲ့ သတ္တုတွေနဲ့ ကြေမွနေတဲ့ အမှိုက်ပုံလို ပြားပြားဝပ် ပျက်စီးခဲ့တာပါ။

ကြမ်းပြင်တွေ၊ ပန်ကာနဲ့ နံရံတွေ ပြိုကျသွားခဲ့ကာ အပျက်အစီးတွေကြားမှာ  အသက်ရှင်ကျန်ရစ်သူတွေကို အရေးပေါ် ကယ်ဆယ်ရေးသမားတွေက ဆက်ရှာနေပါတယ်။

ကပ်လျက်အဆောက်အအုံမှာ နေထိုင်သူတွေဟာ သူတို့ရဲ့ ပစ္စည်းတွေကို ပြန်ဆယ်ယူဖို့ ကြိုးပမ်းခဲ့ကြပါတယ်။

ဂါဇာကမ်းမြောင်စစ်ပွဲနဲ့ ပတ်သက်ပြီး ပင်လယ်နီထဲက သင်္ဘောတွေကို ပြန်တိုက်ခိုက်မယ်လို့ ဟူသီတွေက ခြိမ်းခြောက်ခဲ့ပြီးတဲ့နောက် ယီမင်ကို အမေရိကန်က ထိုးစစ်ဆင်တာနဲ့ ပတ်သက်ပြီး အသေးစိတ်အချက်အလက် နည်းနည်းကိုသာ အမေရိကန် စစ်တပ်က ထုတ်ပြန်ခဲ့ပါတယ်။

အမေရိကန်အလယ်ပိုင်းစစ်တိုင်းဟာ ယီမင်နိုင်ငံရဲ့ နေရာအများအပြားကို နေ့ရောညပါ တိုက်ခိုက်နေတယ်လို့ အမေရိကန်ကာကွယ်ရေးအရာရှိတယောက်က AFP သတင်းဌာနကို ပြောပါတယ်။