ဧရာဝတီတိုင်း၊ လေးမျက်နှာမြို့နယ်က အာရက္ခတပ်တော် AA ပူးပေါင်းတပ်တွေနဲ့ စစ်ကောင်စီတို့ တိုက်ပွဲဖြစ်နေတဲ့ တုံးတောရွာနဲ့ စမ်းကုန်းရွာတို့ကို မတ် ၂၃ ရက် ဒီနေ့မနက်ပိုင်း စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

လေးမျက်နှာဒေသခံတယောက်က “ရက်ဆက် တိုက်ပွဲဖြစ်နေတာ၊ စစ်တပ်က စက်တပ်လေထီးတွေ ပျံလာလိုက်၊ လေယာဉ်တွေ ဗုံးကြဲတာ လုပ်နေတယ်။ အခု မနက်ပိုင်း တုံးတောရွာနဲ့ စမ်းကုန်ရွာ ဗုံးလာကြဲသွားတယ်။ ထိခိုက်တာ ရှိ၊ မရှိတော့ မသိရသေးဘူး” လို့ ပြောပါတယ်။

အခုရက်ပိုင်းမှာ စစ်ကောင်စီက စက်တပ်လေထီးတွေနဲ့ ပျံသန်းတိုက်ခိုက်နေပြီး မတ် ၁၇ ရက်ကစလို့ လေယာဉ်နဲ့ လာရောက်ဗုံးကြဲခဲ့တာလို့လည်း ဒေသခံတွေက ပြောပါတယ်။

တိုက်ပွဲအတွင်း စစ်ကောင်စီဘက်က သေဆုံးသူများပြီး ဒဏ်ရာရသူတွေကိုတော့ နီးစပ်ရာ မြို့တွေဆီ ပို့နေပြီး တိုက်ပွဲတွေ ပိုပြင်းထန်လာနိုင်တယ်လို့လည်း ဆိုပါတယ်။

လေးမျက်နှာမြို့နယ်က တုံးတောရွာကို စစ်တပ်က မတ် ၁၉ ရက် ညပိုင်းမှာ ဗုံးကြဲခဲ့တာကြောင့် ဘုန်းကြီးကျောင်းတကျောင်းလုံး မီးလောင်သွားခဲ့တယ်လို့ သိရပါတယ်။

မတ် ၁၇ ရက်ကစလို့ လေးမျက်နှာမြို့နယ်၊ ချင်းလယ်ရွာ မှာ AA ပူးပေါင်းတပ်တွေနဲ့ အာဏာသိမ်းစစ်တပ်တို့ တိုက်ပွဲတွေ စဖြစ်ခဲ့တာပါ။

လေးမျက်နှာမြို့နယ်၊ ရိုးမအစပ်ကျေးရွာ ၁၀ ရွာကျော်က ပြည်သူတွေဟာ နီးစပ်ရာကျေးရွာတွေမှာ စစ်ရှောင်နေ‌ကြရပြီး ဧရာဝတီတိုင်းက ပုသိမ်၊ သာပေါင်း၊ ငါးသိုင်းချောင်းနဲ့ လေးမျက်နှာမြို့နယ်တို့မှာ အာရက္ခတပ်တော် ဦးဆောင်တဲ့ ပူးပေါင်းတပ်တွေနဲ့ အာဏာသိမ်းစစ်တပ်တို့ ၂၀၂၅ ခုနှစ်မှာ တိုက်ပွဲတွေ စဖြစ်လာတာပါ။