စစ်ကိုင်းတိုင်း၊ ကသာခရိုင်၊ အင်းတော်မြို့နယ်ကို စစ်ကူလာတဲ့ စစ်ကောင်စီစစ်ကြောင်းကို တိုက်ခိုက်ခဲ့လို့ စစ်ကောင်စီဘက်က ၃၃ ယောက် သေဆုံးပြီး ၃၁ ယောက်ကို ဖမ်းဆီးရမိတယ်လို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနက မတ် ၂၂ ရက်မှာ ထုတ်ပြန်ပါတယ်။

ကသာမြို့နယ်၊ ပင်လွတ်ရွာအနီး ပန်းတောင်ကြီး၊ ပန်းတောင်လေးတောင်မှာ ကသာမြို့ ခမရ ၃၀၉ ကနေထွက်လာတဲ့ စစ်ကောင်စီစစ်‌ကြောင်းကို မတ် ၁၅ ရက်မှာ တိုက်ခိုက်ခဲ့တာဖြစ်ပြီး လက်နက် ၅၃ လက် သိမ်းဆည်းရမိတယ်လို့ ဆိုပါတယ်။

စစ်ကောင်စီဘက်က ဗိုလ်မှူးလင်းထက် ဦးစီးပြီး ခမရ ၁၀၆၊ ၃၀၉၊ ခလရ ၆ ပူးပေါင်းအင်အား ၁၅၀ လောက်ပါတဲ့ စစ်ကြောင်းကို အမှတ် ၁ စစ်ဒေသကွပ်ကဲမှုနဲ့ KIA၊ KPDF၊ ကသာခရိုင် တပ်ရင်း ၁၊ မိုးတားတိုက်နယ် ပကဖနဲ့ ကသာမြို့နယ် ပကဖ ပူးပေါင်းအဖွဲ့တို့က တိုက်ခိုက်ခဲ့တာလို့ ဆိုပါတယ်။

တိုက်ပွဲအတွင်း စစ်ကောင်စီဘက်က ၃၃ ယောက် သေဆုံး၊ ၁၀ ယောက် ထိခိုက်ဒဏ်ရာရပြီး ၃၁ ယောက်ကိုတော့ ဖမ်းဆီးရမိတယ်လို့ ဆိုပါတယ်။

ဒါ့အပြင် MA-1 ၂၉ လက်၊ MA-2 ၆ လက်၊ MA-3 ၁၂ လက်၊ MA-4 ၃ လက်၊ MA-11 ၁ လက်၊ MA-15 ၁ လက်၊ Anti Drone Gun ၁ လက်၊ MA-10 ဗုံးသီး ၃၇ လုံး၊ MA ကျည် အတောင့် ၈,၀၀၀၊ MA-15 ကျည် အတောင့် ၂,၀၀၀ တောင့်၊ ၆၀ မမ ဗုံးသီး ၁၇ လုံး၊ ကျည်အိမ် ၁၁၃ ခု၊ ကျောပိုး Jammer ၁ ခု၊ ဆက်သွယ်ရေးစက် ၁ လုံး၊ အထိုင်ဖုန်း ၁ လုံးနဲ့ ကျည်ကာဦးထုပ် ၁၂ လုံးကို သိမ်းဆည်းရမိတယ်လို့ ထုတ်ပြန်ထားပါတယ်။ပြည်သူ့ကာကွယ်ရေးတပ်ဘက်ကလည်း ရဲဘော် ၂ ယောက် ကျဆုံးခဲ့ရတယ်လို့ အမျိုးသားညီညွတ်ရေး အစိုးရ၊ ကာကွယ်ရေးဝန်ကြီးဌာနက ဆိုပါတယ်။