မန္တလေးတိုင်း၊ ပုသိမ်ကြီးမြို့နယ်၊ ရန်ကင်းသာယာရပ်ကွက်မှာ မတ် ၁၁ ရက် ည ၆ နာရီလောက်က အငြိမ်းစားပါမောက္ခတယောက်ရဲ့ နေအိမ် ဓားပြတိုက်ခံရပြီး ရွှေငွေ သိန်း ၃၀၀ ကျော်ဖိုး ပါသွားတယ်လို့ မြို့ခံတွေဆီက သိရပါတယ်။
မနေ့ည ၆ နာရီက ရန်ကင်းသာယာရပ်ကွက်မှာ နေထိုင်တဲ့ အငြိမ်းစားပါမောက္ခ ဦးခင်ထွန်း နေအိမ်ကို အမည်မသိ အမျိုးသား ၂ ယောက်နဲ့ အမျိုးသမီးတယောက်က ပါဆယ်ပစ္စည်း ပို့ချင်ဟန်ဆောင်ပြီး ဓားပြတိုက်ခဲ့တာလို့ မြို့ခံတယောက်က DVB ကို ပြောပါတယ်။
“ပါဆယ်ထုပ် လာပို့တယ်၊ လက်မှတ်ထိုးယူမှ ရမယ်ဆိုလို့ တံခါးဖွင့်ပေးလိုက်တာ၊ အိမ်ရှင် မိသားစု ၃ ဦးစလုံးကို ရိုက်နှက်ပြီး လက်ဝတ်လက်စားတွေနဲ့ ငွေတွေယူသွားတယ်။ အလုခံရတဲ့အိမ်က ဖအေရော သမီးရော ဆေးရုံတင်ထားရတယ်။”
ဓားပြတွေ ရိုက်နှက်ခဲ့မှုကြောင့် အငြိမ်းစားပါမောက္ခ ဦးခင်ထွန်းနဲ့ သမီးဖြစ်သူ ခင်ချမ်းမြေ့တို့မှာ ဒဏ်ရာတွေရရှိပြီး ပြည်ကြီးတံခွန်ဆေးရုံမှာ ဆေးကုသမှု ခံယူနေရတယ်လို့ အုပ်ချုပ်ရေးနဲ့နီးစပ်တဲ့ သတင်းအရင်းအမြစ်က DVB ကို ပြောပါတယ်။
“သေနတ်နဲ့မပစ်ဘဲ ဓားနှောင့်နဲ့ ထုသွားလို့ တော်သေးတယ်။ ရွှေ ၆ ကျပ်သားကျော်ရယ်၊ ငွေ ၆ သိန်းရယ် ပါသွားတယ်။ ရဲတွေဘက်က စစ်ဆေးနေတာပဲ၊ တရားခံတော့ မမိဘူး။”
ဖေဖော်ဝါရီ ၂၁ ရက် ညပိုင်းက ပုသိမ်ကြီးမြို့နယ်မှာ ရွှေဆိုင်သိမ်းပြီး ပြန်လာတဲ့ ရွှေဆိုင်ပိုင်ရှင် မိသားစုကားကို လုယက်ခဲ့တဲ့အမှုမှ ဦးဆောင်သူ ပြည်သူ့စစ်ဒုခေါင်းဆောင် မှန်ကြီး (ခ) ကောင်းမြတ်စံ ဖမ်းဆီးခံခဲ့ရပါတယ်။
အလားတူ ၂၀၂၄ ခုနှစ် စက်တင်ဘာ ၁၁ ရက်က ပေါက်ကိုယ်တော်ရဲ့ ပြည်သူ့စစ်အဖွဲ့ဝင် ၇ ယောက်ကို ပြည်ကြီးတံခွန်မြို့နယ်ရှိ နေအိမ်တအိမ်က အိမ်စီးကားနဲ့ iPhone လုယက်မှုနဲ့ ဖမ်းဆီးခံခဲ့ရပါတယ်။
