မိုးဗြဲမြို့ပြန်ရဖို့ အင်အားအလုံးအရင်းနဲ့ ထိုးစစ်ဆင်နေတဲ့ စစ်ကောင်စီတပ်တွေဟာ မြို့ထဲမှာ မီးလောင်ဗုံးတွေပါ အသုံးပြုတိုက်ခိုက်နေပါတယ်။ 

စစ်ကောင်စီတပ်က မိုးဗြဲမြို့ကို ပြန်ပြီးထိန်းချုပ်နိုင်ဖို့အတွက် လူအင်အား၊ လက်နက်အင်အား၊ လေကြောင်းအားတွေကို အလွန်အကျွံသုံးပြီး ထိုးစစ်ဆင်နေတာ အခုဆို ၄ လကျော်အထိ ရှိလာနေပါပြီ။ 

ဒီအတောအတွင်း နှစ်ဖက်တပ် အထိအခိုက်ကျဆုံးမှုတွေရှိနေပြီး လက်ရှိအချိန်ထိ မိုးဗြဲမြို့ကို တော်လှန်ရေးမဟာမိတ်တပ်ပေါင်းစုတွေက ထိန်းချုပ်ထားနိုင်ဆဲပါ။ 

ဒါကြောင့် မြေပြင်နယ်မြေစိုးမိုးမှု အသာမရတဲ့ စစ်ကောင်စီတပ်တွေဟာ မိုးဗြဲမြို့ထဲကို လေကြောင်းကနေကော လက်နက်ကြီးတွေနဲ့ နေ့စဥ်တိုက်ခိုက်နေတဲ့အတွက် မိုးဗြဲမြို့ထဲက လူနေအိမ်တွေ နေ့စဥ် မီးလောင်ဆုံးရှုံးနေတယ်လို့ လက်ရှိ ကယ်ဆယ်ရေး၀င်နေတဲ့သူတွေက DVB ကို ပြောပါတယ်။ 

ကရင်နီအမျိုးသားများကာကွယ်ရေးတပ် (KNDF) ရဲ့ မတ် ၁၆ ရက် ထုတ်ပြန်ချက်အရ အခုမတ် ၂ ပတ်တာကာလအတွင်းမှာပဲ နေအိမ် ၁၅ လုံး ထိခိုက်ပျက်စီးခဲ့ကြောင်း၊ လက်ရှိမှာ တိုက်ပွဲတွေ ငြိမ်နေပေမဲ့ ဒီရက်အတွင်း နေ့တိုင်းလိုလို မီးလောင်ဗုံးဒဏ်ကြောင့် နေအိမ်တွေ မီးလောင်ဆုံးရှုံးနေဆဲ ဖြစ်တယ်လို့ ဆိုပါတယ်။

ကယ်ဆယ်ရေးသမားတယောက်က “ပုံမှန်အားဖြင့် တရက်ကို ၄ လုံးလောက် ပုံမှန်လောင်နေတယ်။ လက်နက်ကြီးအရကော၊ နောက် လက်နက်ကြီးမှာ မီးလောင်ဗုံး ပါတယ်ပေါ့နော်။ အဲဒါတွေနဲ့ပဲ လှမ်းလှမ်းပစ်တာ။ နောက် နွေရာသီရောက်တာလည်း ပါတယ်ပေါ့နော်။ အဲဒီလိုမျိုး တရက်ကို ပုံမှန်အားဖြင့်တော့ သုံး လေးလုံး ပုံမှန်လောင်နေတယ်ဗျ။ မနေ့ညကတော့ တလုံး အဲဒီလောက်ပဲ လောင်တယ်” လို့ ပြောပါတယ်။

လက်ရှိ စစ်ကောင်စီတပ်တွေဟာ မိုးဗြဲမြို့ကို ထပ်မံထိုးစစ်ဆင်ဖို့အတွက် အမှတ် ၄၂၂ တပ်ရင်းထဲမှာ အင်အားဖြည့်တင်းနေပြီး တိုက်ပွဲတွေ ငြိမ်နေတာ သုံး လေးရက်ရှိနေပြီလို့ မိုးဗြဲကို ကာကွယ်နေတဲ့ မဟာမိတ်တပ်ပေါင်းစုတွေက ပြောပါတယ်။ 

၄၂၂ တပ်ရင်းထဲကနေပဲ လက်နက်ကြီးတွေနဲ့ နေ့စဥ် ပစ်ခတ်နေပြီး မဟာမိတ်တပ်ပေါင်းစုဘက်ကနေ လက်နက်ခဲယမ်း လိုအပ်ချက်တွေကို ဖြည့်တင်းပေးကြဖို့လည်း အကူအညီတောင်းခံထားပါတယ်။

ရှမ်းတောင်စစ်ဒေသခွဲ ဗျူဟာအမှတ် (၁) ပြန်ကြားရေးတာ၀န်ခံက “ဒီမိုးဗြဲကို စစ်ကောင်စီဘက်က ပြန်လည်ထိန်းချုပ်နိုင်ဖို့အတွက် နည်းလမ်းပေါင်းမျိုးစုံနဲ့ စစ်ကြောင်းထိုးတာတွေရှိတယ်။ အဲဒီထဲမှာမှ ကျနော်တို့ ခုခံကာကွယ်နေတာလည်း ၄ လကျော်ရှိသွားပြီပေါ့နော်။ တိုက်ပွဲကြီး တိုက်ပွဲငယ်တော့ အများကြီး ဖြစ်တယ်၊ ရက်တိုင်းလိုလို ဖြစ်တယ်။ ဒါပေမဲ့ ဒီတပတ်လောက်မှာပဲ နည်းနည်းငြိမ်နေတဲ့ သဘောမျိုး ရှိတာပေါ့။ လက်နက်ခဲယမ်းအပိုင်းကတော့ ဘယ်လိုမှ လုံလောက်မှုမရှိဘူး အရမ်းအခက်အခဲဖြစ်နေတယ်။ တပ်ရင်းတိုင်းကလည်း ခဲယမ်းတွေက စုဖို့ ဆောင်းဖို့ ရှာနေတယ်ပေါ့လေ။ ကျနော်တို့ ခဲယမ်းပိုင်းကတော့ တော်တော်လေးကို အကျပ်ရိုက်နေတဲ့ အခြေအနေမှာရှိတယ်” လို့ ပြောပါတယ်။

၂၀၂ေ နှစ်အစကနေ လက်ရှိအချိန်အထိ မိုးဗြဲမှာ ပြည်သူနေအိမ် အလုံး ၁၀၀ ထက်မနည်း၊ ဘာသာရေး အဆောက်အအုံ ၄ ခုနဲ့ စာသင်ကျောင်း ၄ ကျောင်းတို့ ပျက်စီးခဲ့ရတယ်လို့ KNDF ရဲ့ ထုတ်ပြန်ချက်တွေအရ သိရပါတယ်။

မောရစ်