စစ်ကောင်စီလက်အောက်မှာ စစ်ဆေးနေတဲ့ ၂၀၂၅ ခုနှစ် တက္ကသိုလ်ဝင်စာမေးပွဲမှာ ကျောင်းသား ကျောင်းသူပေါင်း ၂ သိန်းကျော် လာဖြေတယ်လို့ စစ်ကောင်စီရဲ့ ပညာရေးဌာန အချက်အလက်တွေအရ သိရပါတယ်။
ဒါဟာ မနှစ်ကထက် ၈၀၀၀၀ ဝန်းကျင်ပိုများလာတာဖြစ်ပြီး ၂၀၂၄ ခုနှစ် တက္ကသိုလ်ဝင်စာမေးပွဲမှာ တနိုင်ငံလုံးအတိုင်းအတာအနေနဲ့ ဖြေဆိုသူဦးရေ ၁၂၈,၈၂၀ ယောက် ရှိတယ်လို့ ထုတ်ပြန်ချက်တွေအရ သိရပါတယ်။
မတ် ၁၇ ရက်မှ စတင်တဲ့ စာမေးပွဲကို နေပြည်တော်နဲ့ နိုင်ငံခြားစာစစ်ဌာနတွေအပါအဝင် တိုင်းနဲ့ပြည်နယ်တွေမှာ စာစစ်ဌာန ၈၁၇ ခု ဖွင့်လှစ်ထားတယ်လို့ ဆိုပါတယ်။
ပညာရေးဌာနရဲ့ အချက်အလက်တွေအရ ကယားပြည်နယ်မှာတော့ လွိုင်ကော်မှာ စာစစ်ဌာန ၁ ခုပဲရှိပြီး ချင်းပြည်နယ်မှာ ၂ ခု၊ ရှမ်းပြည်နယ် အရှေ့ပိုင်းက မြို့နယ် ၉ မြို့နယ်မှာ ၂ ခု၊ ရှမ်းပြည်နယ်မြောက်ပိုင်းက မြို့နယ် ၃ မြို့နယ်မှာ ၄ ခု၊ ရခိုင်ပြည်နယ်က မြို့နယ် ၃ မြို့နယ်မှာ ၈ ခု ဖွင့်လှစ်ထားတယ်လို့ သိရပါတယ်။
မြို့နယ် ၄၀ လောက်ရှိတဲ့ စစ်ကိုင်းတိုင်းက ၂၁ မြို့နယ်မှာပဲ စာစစ်ဌာန ၃၅ ခု ဖွင့်လှစ်တယ်လို့ ဆိုပြီး ဧရာဝတီတိုင်းမှာတော့ စာစစ်ဌာန ၂၄၅ ခုနဲ့ အများဆုံးဖွင့်လှစ်ထားနိုင်တာကို တွေ့ရပါတယ်။
ဖြေဆိုသူဦးရေကတော့ ရန်ကုန်တိုင်းမှာ ၃၇,၄၆၈ ယောက်၊ မန္တလေးတိုင်းမှာ ၃၄,၃၈၃ ယောက်၊ ဧရာဝတီတိုင်းမှာ ၃၂,၂၄၁ ယောက်၊ မကွေးတိုင်းမှာ ၁၇,၈၆၂ ယောက်၊ နေပြည်တော်မှာ ၁၂,၅၅၂ ယောက်၊ ရှမ်းပြည်နယ်တောင်ပိုင်းမှာ ၁၂,၄၀၇ ယောက်၊ တနိုင်ငံလုံး ၂၀၈,၈၈၉ ယောက်ရှိတယ်လို့ ဆိုပါတယ်။
နိုင်ငံခြားစာစစ်ဌာနတွေမှာ ပျက်ကွက်သူမရှိတာကို တွေ့ရပြီး ရခိုင်ပြည်နယ်မှာတော့ စာရင်းရှိ ၃,၂၆၄ ယောက်မှာ အယောက် ၁,၇၀၀ ပျက်ကွက်တာကြောင့် အများဆုံးပျက်ကွက်ပြီး ချင်းပြည်နယ်မှာလည်း ၅၅၆ ယောက်ဖြေဆိုဖို့ စာရင်းပေးပြီး ၁၄၈ ယောက် ပျက်ကွက်တာကို တွေ့ရပါတယ်။
ကျန်တဲ့ တိုင်းနဲ့ပြည်နယ်က စာစစ်ဌာနတွေမှာတော့ ၉၀ ရာခိုင်နှုန်းနဲ့အထက် ဖြေဆိုကြတာကြောင့် တနိုင်ငံလုံးအတိုင်းအတာနဲ့တော့ ၉၄ ရာခိုင်နှုန်းကျော် ဖြေဆိုတယ်လို့ ဆိုပါတယ်။
အခုနှစ် စစ်ကောင်စီလက်ထက် တက္ကသိုလ်ဝင်စာမေးပွဲတွေကို မတ် ၁၇ ရက်ကနေ ၂၂ ရက်အထိ ကြားမှာ ပိတ်ရက်မရှိ စစ်ဆေးသွားမယ်လို့ ထုတ်ပြန်ထားပါတယ်။
