နိုင်ငံတဝန်း အကျဉ်းထောင်အသီးသီးက အကျဉ်းကျခံနေရတဲ့ အကျဉ်းသားတွေကို စစ်ကောင်စီက လက်နက်တပ်ဆင်ပေးထားပြီး အကျဉ်းထောင်အတွင်း ခုခံကာကွယ်ဖို့ အပါအဝင် တော်လှန်ရေးတပ်ဖွဲ့တွေကို ပြန်လှန်ခုခံဖို့ စေခိုင်းထားတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ထုတ်ပြန်ထားပါတယ်။

အဓိက တိုက်ပွဲတွေပြင်းထန်နေတဲ့ ဒေသတွေဖြစ်တဲ့ ကချင်ပြည်နယ် ဗန်းမော်အကျဉ်းထောင်နဲ့ မိုးညှင်းအကျဉ်းထောင်တွေမှာ နှစ်ကြီးထောင်ဒဏ်ချမှတ်ခံထားရတဲ့ အကျဉ်းသားတွေကိုလည်း ပြစ်မှုပြစ်ဒဏ် လျှော့ပေါ့ပေးမယ်ဆိုတဲ့ စည်းရုံးလှုံ့ဆော်မှုတွေအနေနဲ့ လက်နက်ပေးပြီး ခုခံဖို့ တာဝန်ပေးထားတာ မှန်ကန်ကြောင်း PPNM ရဲ့ တာဝန်ရှိသူက ပြောပါတယ်။

မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) ရဲ့ ဦးဆောင်ကော်မတီဝင် ကိုသိုက်ထွန်းဦးက “တိုက်ပွဲဖြစ်ပွားနေတဲ့ ရပ်ဝန်းက အကျဉ်းထောင်တွေက ပထမဆုံး ရဲနဲ့ စစ်သားထဲက ဖမ်းဆီးထားတဲ့သူတွေကို ရာထူးအာဏာပြန်ပေးပြီး လက်နက်ကိုင်ပြီး တိုက်ပွဲဝင်ဖို့ စည်းရုံးလှုံ့ဆော်ခဲ့တာတွေ ရှိသလို တခြား ရာဇဝတ်မှု ပြစ်မှုပြစ်ဒဏ် နှစ်ကြီးသမားတွေလည်း ညှိနှိုင်းပြီး ပြစ်မှု ပြစ်ဒဏ်တွေ လွတ်ငြိမ်းခွင့်ပေးမယ် ဆိုတာမျိုး စည်းရုံးပြီးမှ တော်လှန်ရေးတပ်တွေကို ပြန်လှန်ခုခံတိုက်ခိုက်ဖို့ နေရာတွေမှာ အသုံးပြုလာတာကို တွေ့ရပါတယ်” လို့ ပြောပါတယ်။

တိုက်ပွဲတွေ ပြင်းထန်လာတာနဲ့အတူ ကျဆုံးမှုတွေ များပြားလာတဲ့ စစ်ကောင်စီတပ်ဖွဲ့ဝင်တွေ နေရာကို အစားထိုး အင်အားဖြည့်တင်းဖို့ လုပ်ဆောင်နေတာ ဖြစ်တယ်လို့ PPNM က ဆိုပါတယ်။

စစ်ကောင်စီက ဘယ်လိုလူ့အခွင့်အရေးမျိုးကိုမဆို ချိုးဖောက်ဖို့ ဝန်မလေးဘဲ လုပ်ဆောင်နေတာ ဖြစ်လို့ လူ့အခွင့်အရေးအဖွဲ့တွေ အနေနဲ့လည်း အထူးအလေးပေး ဆောင်ရွက်ကြဖို့ ကိုသိုက်ထွန်းဦးက တိုက်တွန်းပါတယ်။

“လူ့အခွင့်အရေး ကြေညာစာတမ်းပါ အချက်တွေအားလုံးကို ချိုးဖောက်နေတဲ့ စစ်ကောင်စီကတော့ အကျဉ်းထောင်တွေထဲက အကျဉ်းသားတွေကို စစ်မြေပြင်မှာ အသုံးချဖို့ ဝန်မလေးပါဘူး။ ဒီလိုစေခိုင်းခြင်းက အကျဉ်းထောင်တွေထဲမှာ အသက်ရှင်သန်ပိုင်ခွင့်တွေ ချိုးဖောက်ခံရနိုင်ခြေ ရှိသလို အချိန်မရွေး တိုက်ပွဲကြားမှာ အသက်သေဆုံးနိုင်တဲ့ အခြေအနေတွေ ဖြစ်ပါတယ်။ မြေပြင်မှာ အခုလို ဆိုးဆိုးဝါးဝါး လူ့အခွင့်အရေးချိုးဖောက်မှု လုပ်ရပ်တွေကို ပေါ်‌ပေါ်တင်တင် ကျူးလွန်နေတဲ့ ကိစ္စရပ်တွေကို ကျနော်တို့အားလုံး အာရုံစိုက် ဆောင်ရွက်ပေးကြဖို့ လိုတယ်။”

စစ်စည်းကမ်း၊ ရဲစည်းကမ်း ဖောက်ဖျက်မှုတွေကြောင့် ဖမ်းဆီးထားတဲ့ စစ်သားနဲ့ ရဲတပ်ဖွဲ့ဝင်တွေကို လက်နက်တပ်ဆင်ပေးပြီး မူလရာထူးပြန်ပေးကာ တော်လှန်ရေးတပ်ဖွဲ့ဝင်တွေကို ခုခံစေတဲ့ဖြစ်ရပ်မျိုးက ၁၁၁၁ စစ်ဆင်ရေးအတွင်း လွိုင်ကော်ထောင်မှာလည်း ရှိခဲ့ကြောင်း သိရပါတယ်။

ဝေဝေ