အကယ်ဒမီ မင်းမော်ကွန်း ဦးဆောင်ပါဝင်သရုပ်ဆောင်ထားတဲ့  ‘ဖြတ်’ ရုပ်ရှင်ပြပွဲကို  ကနေဒါနိုင်ငံ ဗြိတိသျှကိုလံဘီယာပြည်နယ်၊ ဗန်ကူးဗားမြို့၊  BCIT မှာ  ဒေသစံတော်ချိန် မတ် ၁၅ ရက် နေ့လယ်က  ကျင်းပခဲ့ပါတယ်။

"ဖြတ်" Wide Awake ရုပ်ရှင်ပြပွဲကို ၈၈ မျိုးဆက်နိုင်ငံရေးလှုပ်ရှားသူတွေ၊ ဗန်ကူးဗားရောက် မြန်မာအသိုက်အဝန်းနဲ့ ပညာသင်ကြားနေတဲ့ ကျောင်းသူ ကျောင်းသားတွေ လာရောက်ကြည့်ရှု အားပေးခဲ့ကြပါတယ်။

ဒီရုပ်ရှင်ပြပွဲမှာ  အကယ်ဒမီ မင်းမော်ကွန်း၊  ကုလသမဂ္ဂဆိုင်ရာ  မြန်မာအမြဲတမ်းကိုယ်စားလှယ်  သံအမတ်ကြီး ဦးကျော်မိုးထွန်းနဲ့ အမျိုးသားညီညွတ်ရေးအစိုးရ (NUG) နိုင်ငံခြားရေး ပြည်ထောင်စုဝန်ကြီး ဒေါ်ဇင်မာအောင်တို့က အွန်လိုင်းကနေ အမှာစကားပြောကြားခဲ့ ပါတယ်။ 

ဒါရိုက်တာစောအေးထူး စီစဉ်ရိုက်ကူးပုံဖော်ထားပြီး မင်းမော်ကွန်းနဲ့ အောင်မြင့်မြတ် စသူတွေ ပါဝင်သရုပ်ဆောင်ထားတဲ့ ‘ဖြတ်’ ရုပ်ရှင်ကို  ကနေဒါ၊ အမေရိကန်ပြည်ထောင်စုပြည်နယ်အသီးသီးနဲ့ နိုင်ငံတကာမှာ လှည့်လည်ပြသနေတာဖြစ်ပြီး  ရလာတဲ့ရန်ပုံငွေအားလုံးကို မြန်မာပြည်က လိုအပ်တဲ့နေရာတွေကို တိုက်ရိုက်လှူဒါန်းသွားမယ်လို့ သိရပါတယ်။