အမေရိကန်သမ္မတ ဒေါ်နယ်ထရမ့်ပ်ရဲ့ သံမဏိနဲ့ အလူမီနီယံ စည်းကြပ်ခွန်တွေကို တုံ့ပြန်တဲ့အနေနဲ့ ကနေဒါဟာ မတ် ၁၃ ရက် မနက်ပိုင်းက စတင်ပြီး အမေရိကန်အပေါ် လက်တုံ့ပြန် အခွန်ငွေ ကနေဒါဒေါ်လာ ၂၉ ဒသမ ၈ ဘီလီယံ ချမှတ်မှာဖြစ်ကြောင်း ကနေဒါဘဏ္ဍာရေးဝန်ကြီး ဒေါမနစ် လွတ်ဘလန့်က မတ် ၁၂ ရက်မှာ ပြောကြားခဲ့ပါတယ်။

ကနေဒါဟာ အမေရိကန်ကို သံမဏိနဲ့ အလူမီနီယံ ထောက်ပံ့မှု အများဆုံးနိုင်ငံ ဖြစ်ပါတယ်။ ကနေဒါရဲ့ လက်တုံ့ပြန်မှုဟာ ကနေဒါဒေါ်လာ ၁၂ ဒသမ ၆ ဘီလီယံ တန်ဖိုးရှိ သံမဏိထုတ်ကုန်တွေနဲ့ ကနေဒါဒေါ်လာ ၃ ဘီလီယံ တန်ဖိုးရှိ အလူမီနီယံထုတ်ကုန်တွေအပြင် ကနေဒါဒေါ်လာ ၁၄ ဒသမ ၂ ဘီလီယံတန်ဖိုးရှိ နောက်ထပ် တင်သွင်းတဲ့ အမေရိကန် ကုန်ပစ္စည်း စုစုပေါင်း ကနေဒါဒေါ်လာ ၂၉ ဒသမ ၈ ဘီလီယံ တန်ဖိုးရှိပါတယ်။

ကနေဒါရဲ့ တန်ပြန်အခွန်စည်းကြပ်မှုဒဏ်ခံရတဲ့ ကုန်ပစ္စည်းတွေမှာ ကွန်ပျူတာတွေ၊ အားကစားပစ္စည်းတွေနဲ့ သံထည်ပစ္စည်းတွေ ပါဝင်တယ်လို့ လွတ်ဘလန့်က သတင်းစာ ရှင်းလင်းပွဲမှာ ပြောကြားခဲ့ပါတယ်။

သံမဏိနဲ့ အလူမီနီယံ သွင်းကုန်တွေအပေါ် ထရမ့်ပ်ရဲ့ အခွန်တိုးမြှင့် ကောက်ခံမှုဟာ မတ် ၁၂ ရက်မှာ ကြိုတင်ကင်းလွတ်ခွင့်တွေအဖြစ် အသက်ဝင်ခဲ့ပြီး အခွန်လွတ်ခွဲတမ်းနဲ့ ကုန်ပစ္စည်း ချန်လှပ်မှုတွေကတော့ သက်တမ်းကုန်သွားပါတယ်။

ထရမ့်ပ်က ကမ္ဘာလုံးဆိုင်ရာ ကုန်သွယ်မှုစံနှုန်းတွေကို ပြန်လည်စိစစ်ပြီး အမေရိကန်ရဲ့ အကျိုးအမြတ်တွေ အရှိန်အဟုန်နဲ့ ရစေရမယ် ဆိုပြီး စည်းရုံးလှုံ့ဆော်ခဲ့တာ ဖြစ်ပါတယ်။

ဝန်ကြီးချုပ် ဂျပ်စ်တင် ထရူးဒိုးက အခုသီတင်းပတ်အတွင်း သူ့နေရာကို ဆက်ခံမယ့် မာ့ခ်ကာနေး ကို အာဏာလွှဲပြောင်းဖို့ ပြင်ဆင်နေချိန်မှာပဲ အမေရိကန်-ကနေဒါ ကုန်သွယ်ရေးစစ်ပွဲ ပြင်းထန်လာတာပါ။

မာ့ခ်ကာနေးဟာ တနင်္ဂနွေနေ့က အာဏာရ လစ်ဘရယ်ပါတီရဲ့ ခေါင်းဆောင်မှုပြိုင်ပွဲမှာ အနိုင်ရခဲ့သူဖြစ်ပြီး သူဟာ ဝန်ကြီးချုပ်အဖြစ် ကျမ်းသစ္စာ မကျိန်ဆိုရသေးမချင်း ထရမ့်ပ်နဲ့ စကားမပြောနိုင်ကြောင်း မတ် ၁၀ ရက်မှာ ပြောဆိုခဲ့ပါတယ်။

Source : Reuters