ကိုးကန့်တပ်မတော် MNDAA သိမ်းပိုက်ထားတဲ့ ရှမ်းပြည်နယ်, လားရှိုးမြို့မှာ သင်္ကြန်ပွဲတော်ကျင်းပဖို့ စီစဉ်နေပြီး မြို့ဟာ ပုံမှန်အတိုင်း လည်ပတ်နေတဲ့ အနေအထားကို ရောက်နေပြီလို့ လားရှိုးမြို့ အုပ်ချုပ်ရေးအဖွဲ့ထံက သိရပါတယ်။
ဧပြီ ၁၃ ရက်မှာ ကျရောက်မယ့် မြန်မာ့နှစ်သစ်ကူးသင်္ကြန်ပွဲတော်ကို လားရှိုးမြို့မှာ ကျင်းပဖို့ စီစဉ်နေပြီး မဏ္ဍပ်တွေ၊ ဖျော်ဖြေရေးအစီအစဉ်တွေ ထည့်သွင်းကျင်းပသွားမှာဖြစ်ကာ မဏ္ဍပ်တည်နေရာတွေကို လုံခြုံရေးအရ ဖော်ပြလို့မရသေးဘဲ မြို့ခံပြည်သူတွေ ပျော်ရွှင်စွာ ဆင်နွှဲနိုင်ဖို့ သက်ဆိုင်ရာတာဝန်ရှိသူတွေက စီစဉ်နေတယ်လို့ လားရှိုးမြို့ အုပ်ချုပ်ရေးအဖွဲ့ တာဝန်ရှိသူတယောက်က ပြောပါတယ်။
“လက်ရှိမှာ ကျနော်တို့လည်း ဒီမှာ အေးအေးဆေးဆေး ရှိနေတယ်။ ဒီတလလုံးလည်း အလုပ်တွေနဲ့ အစီအစဉ်တွေ ရှိတယ်။ ပြီးတော့ သင်္ကြန်ကိုလည်း လုပ်ဖြစ်သွားမယ်။ မဏ္ဍပ်တွေလည်း ထိုးဖို့ရှိတယ်။ လက်ရှိမှာတော့ တည်နေရာတွေကိုတော့ မပြောထားသေးဘူး။ အကုန်လုံးတော့ စီစဉ်ထားတာရှိပါတယ်။”
ဒီလို မြန်မာ့နှစ်သစ်ကူး သင်္ကြန်ပွဲတော် ပြုလုပ်ပေးမယ့်အပေါ် မြို့ခံတွေအနေနဲ့ ကြိုဆိုပေမဲ့ စစ်ကောင်စီဘက်က ဖျက်လိုဖျက်ဆီး လုပ်မှာကိုတော့ စိုးရိမ်မှုရှိနေတယ်လို့ မြို့ခံတယောက်က ပြောပါတယ်။
စစ်ကောင်စီဟာ MNDAA နဲ့ မတွေ့ဆုံစဉ်က လားရှိုးမြို့ကို မကြာခဏ ဗုံးကြဲတိုက်ခိုက်မှုတွေကြောင့် လူစည်ကားစွာ ပြုလုပ်မယ့်သင်္ကြန်ပွဲတော်မှာ ဗုံးကြဲတိုက်ခိုက်မှာကို စိုးရိမ်နေကြတာပါ။
“စစ်ကောင်စီက ယုံရတာမဟုတ်ဘူး။ လူစုလူဝေးလုပ်တဲ့အချိန် ဗုံးလာကြဲမှာကိုတော့ စိုးရိမ်တယ်။ အခု လားရှိုးရဲ့ အခြေအနေကလည်း တည်ငြိမ်နေပြီ။ ပွဲတော်တွေ၊ အခမ်းအနားတွေလည်း လုပ်ပေးနေပြီ။ သင်္ကြန်ပွဲတော်ကိုလည်း အေးအေးဆေးဆေး ပျော်ပျော်ရွှင်ရွှင်နဲ့ ဆင်နွှဲချင်ပါတယ်။”
လားရှိုးမြို့ကို MNDAA သိမ်းပိုက်ပြီးတဲ့နောက် ပြီးခဲ့တဲ့ တရုတ်နှစ်သစ်ကူးကာလမှာလည်း ပွဲတော်အခမ်းအနားတွေကို စည်စည်ကားကား ပြုလုပ်ပေးခဲ့သလို လက်ရှိမှာလည်း တပေါင်းပွဲတော်ကို ကျင်းပပေးနေပါတယ်။
စစ်ကောင်စီနဲ့ MNDAA တို့ တွေ့ဆုံဆွေးနွေးပြီးတဲ့နောက် လားရှိုးမြို့ကနေ MNDAA တပ်ဖွဲ့တွေ ဆုတ်ခွာနေတယ်လို့ သတင်းတွေ မကြာခဏ ထွက်ပေါ်နေပေမဲ့ တပ်အလဲအလှယ် ပြုလုပ်တာသာရှိပြီး မြို့လုံခြုံရေးအတွက် တာဝန်ထမ်းဆောင်နေသူတွေဟာ ပုံမှန်အတိုင်း ရှိနေဆဲ ဖြစ်တယ်လို့ သိရပါတယ်။
