ဧရာဝတီတိုင်း၊ ပုသိမ်ခရိုင်၊ သာပေါင်းမြို့နယ်က ကျေးရွာတချို့မှာ မတ် ၈ ရက်ကစတင်ပြီး စစ်ကောင်စီက တပ်စွဲထားပြီး အရပ်သားတွေကို တင်းတင်းကျပ်ကျပ် စစ်ဆေးနေတယ်လို့ ဒေသခံတွေဆီက သိရပါတယ်။

စစ်ကောင်စီတပ်က မတ် ၈ ရက်ကစတင်ပြီး သာပေါင်းမြို့နယ်၊ မ ရမ်းချိုကျေးရွာက သံပတ်ဘုန်းကြီးကျောင်းနဲ့ ကွင်းကျောင်းဘုန်းကြီးအနီးမှာ တပ်သားအင်အား ၁၂၀ လောက်နဲ့ လာရောက် တပ်စွဲထားပြီး အရပ်သားတွေကို တင်းတင်းကျပ်ကျပ် စစ်ဆေးနေတာလို့ ဆိုပါတယ်။

“ရွာထဲမှာ လာတပ်စွဲထားတာ။ လက်နက်တွေအပြည့်နဲ့ နေ့ရောညပါ အစစ်ဆေးကြမ်းနေတာ။ ယောကျ်ားလေးတွေကို အဓိကစစ်ဆေးနေတာ” လို့ ဒေသခံတယောက်က ပြောပါတယ်။

စစ်ကောင်စီတပ်က ဆိုင်ကယ်တွေပါ ဖမ်းဆီးစစ်ဆေးနေပြီး မတ် ၈ ရက်ကလည်း ဆိုင်ကယ် ၁ စီးကို ယောကျ်ားလေး ၂ ယောက်စီးတာကြောင့်လို့ဆိုကာ အရပ်သားလူငယ် ၄ ယောက်ကို ဖမ်းဆီးထားတယ်လို့ ဒေသခံတွေဆီက သိရပါတယ်။

နောက်ထပ် ဒေသခံတယောက်က “မသင်္ကာလို့ဆိုပြီး ဖမ်းထားတာ၊ အဖမ်းခံရတဲ့လူငယ်တွေက အရပ်သားတွေပါ။ လယ်ယာအလုပ်ကနေ ပြန်လာတဲ့ ထွန်းထွန်းအပါအဝင် ၄ ယောက်ကို PDF တွေဆိုပြီး ဖမ်းတာ” လို့ ပြောပါတယ်။

အဖမ်းခံရတဲ့ အရပ်သားတွေကို စစ်ကောင်စီတပ်က စစ်မှုထမ်းထဲထည့်ဖို့ လုပ်နေတယ်လို့ သတင်းတွေထွက်နေတာကြောင့် မိသားစုတွေက စိတ်ပူနေကြတယ်လို့ ဆိုပါတယ်။

ဧရာဝတီတိုင်း၊ ငါးသိုင်းချောင်း-ဂွလမ်းခွဲမှာ စစ်ကောင်စီတပ်က ဇန်နဝါရီ ဒုတိယအပတ်ကစတင်ပြီး လက်နက်ကြီးတွေပါ အထိုင်ချတပ်စွဲနေပြီး လက်နက်တွေနဲ့ သွားလာနေတာကြောင့် ဒေသခံတွေ စိုးရိမ်ကြောက်လန့်ပြီး အခက်အခဲဖြစ်ပေါ်နေတယ်လို့ ဒေသခံတွဆီက သိရပါတယ်။