မကွေးတိုင်း၊ ပခုက္ကူခရိုင်၊ မြိုင်မြို့နယ်၊ ဆင်စိန်ရွာနဲ့ ကိုင်းရိုးရွာ အရှေ့ဘက်တောထဲကို စစ်တပ်က မတ် ၄ ရက် မနက် ၉ နာရီခွဲကျော်က လေယာဉ်နဲ့ ဗုံးကြဲပစ်ခတ်ခဲ့တယ်လို့ ဒေသခံတွေဆီကနေ သိရပါတယ်။
အဆိုပါလေယာဉ်ဟာ ဂျက်ဖိုက်တာအမျိုးအစားဖြစ်ပြီး မိတ္ထီလာ ရှမ်းတဲကနေ လာရောက်ဗုံးကြဲ ပစ်ခတ်သွားတာလို့လည်း သိရပါတယ်။
We Love Myaing ပြန်ကြားရေးတာဝန်ရှိသူက “ကျနော်တို့ မြိုင်မြို့ရဲ့ အနောက်ခြမ်း ကိုင်းရိုးရွာ အရှေ့ဘက်က တောထဲကို တကြိမ်၊ ဆင်စိန်ရွာ ဘုန်းကြီးကျောင်းကို တကြိမ် စုစုပေါင်း နှစ်နေရာကို အကြမ်းဖက်စစ်ကောင်စီက လေကြောင်းတိုက်ခိုက်မှု ပြုလုပ်သွားတယ်ဗျ။ အဲလိုတိုက်ခိုက်လို့ ဆင်စိန်ရွာ ဘုန်းကြီးကျောင်းအတွင်းမှာ ရှိနေတဲ့ ပြည်သူ ၂ ဦး ထိခိုက်ဒဏ်ရာရရှိပြီး တဦးက ခြေထောက်ပြတ်သွားတယ်လို့ သိရပါတယ်ဗျ။ ခွေး ၂ ကောင်လည်း သေဆုံးတယ်။ ဘုရားစေတီနဲ့ ကျောင်းဆောင်တွေလည်း ပျက်စီးတယ်။ ကိုင်းရိုးရွာအရှေ့ဘက်ကြဲတဲ့ ဗုံးသီးကတော့ အထိအခိုက် မသိရသေးပါဘူး” လို့ ပြောပါတယ်။
စစ်တပ်က နောက်ထပ်တကြိမ် လာပစ်ဦးမယ်ဆိုတဲ့ သတင်းတွေ ထွက်ပေါ်နေတာကြောင့် ဒေသခံပြည်သူတွေလည်း နေရပ်စွန့်ခွာနေတယ်လို့ သိရပါတယ်။
အမည်မဖော်လိုတဲ့ ပြည်သူ့ကာကွယ်ရေးတပ် ခေါင်းဆောင်တယောက်က “ကျနော်တို့ ပစ်ခတ်တဲ့နေရာကို သွားရောက်ကြည့်တဲ့အခါ ဆင်စိန်ရွာ ဘုန်းကြီးကျောင်း အတွင်းက ဘုရားစေတီနဲ့ ကျောင်းတွေ ပျက်စီးတယ်။ အရပ်သား ၂ ဦး ထိခိုက်တယ်။ ထိခိုက်သူ ၂ ဦးထဲက ကိုမျိုးကျော် အသက် ၃၀ ဝန်းကျင် တဦးကတော့ ဆေးကုသဖို့သွားရင်း သေဆုံးသွားတယ်။ ကျန်တဲ့ ဒဏ်ရာရတဲ့သူတဦးကတော့ စောင့်ကြည့်အနေအထား ဖြစ်တယ်” လို့ ပြောပါတယ်။
စစ်တပ်က ပြီးခဲ့တဲ့ရက်ပိုင်းက အခုလို လေယာဉ်နဲ့ဗုံးကြဲချလို့ အရပ်သူ၊ အရပ်သား သေဆုံးတာတွေလည်း ရှိနေတယ်လို့ သိရပါတယ်။
