ငလျင်လှုပ်ခတ်ပြီးနောက် ပြည်ပအလုပ်သမားစေလွှတ်ရေး လုပ်ငန်းစဥ်တွေကို တပတ်မှာ တကြိမ်တည်း စိစစ်ခွင့်ပြုပေးသွားမယ်လို့ စစ်ကောင်စီသြဇာခံ အလုပ်သမားဝန်ကြီးဌာနက ထုတ်ပြန်ပါတယ်။
မတ် ၂၈ ရက်က လှုပ်ခတ်ခဲ့တဲ့ ငလျင်ကြောင့် နေပြည်တော်ရှိ အလုပ်သမားဝန်ကြီးဌာနရုံး အဆောက်အအုံ ထိခိုက်ပျက်စီးခဲ့လို့ ရုံးလုပ်ငန်းတွေ ဆောင်ရွက်ဖို့ အခက်အခဲရှိနေတယ်လို့ အဲဒီဝန်ကြီးဌာန သတင်းအရင်းအမြစ်တွေက ဆိုပါတယ်။
အလုပ်သမားညွှန်ကြားရေးဦးစီးဌာန NonCDM ဝန်ထမ်းတယောက်က “ထိခိုက်ပျက်စီးတာ များတော့ ပုံမှန်လုပ်ငန်းလည်ပတ်ဖို့ အခက်အခဲရှိတယ်။ ရနိုင်သလောက် အနေအထားနဲ့ ဆက်လုပ်နေရတာ။ အခုက ဝန်ထမ်းတွေ ရုံးတက်ဖို့တောင် အဆင်ပြေမနေသေးဘူး၊ ပုံမှန်လည်ပတ်နိုင်ဖို့က အချိန်ယူရဦးမယ်” လို့ ပြောပါတယ်။
အလုပ်သမားညွှန်ကြားရေးဦးစီးဌာနရဲ့ တယ်လီဂရန်အကောင့်မှာ “အခက်အခဲ အကျပ်အတည်းများ ပူပင်သောကများကြားမှ ကျနော်တို့ ရွှေ့ပြောင်းလုပ်သားများ အဆင်ပြေ ချောမွေ့စေရေး အပတ်စဉ် တပတ်လျှင် တကြိမ်နှုန်းဖြင့် စိစစ်ခွင့်ပြုနိုင်ရေး ကြိုးစားဆောင်ရွက်သွားမည် ဖြစ်ပါသည်” လို့ အသိပေး ထုတ်ပြန်ထားပါတယ်။
စစ်ကောင်စီက ပြည်ပသွားရောက်မယ့် အလုပ်သမားတွေအတွက် ပြည်ပအလုပ်အကိုင် အလုပ်သမား သက်သေခံကတ် (OWIC) ထုတ်ပေးတဲ့ လုပ်ငန်းစဥ်ကို တလနီးပါး ရပ်နားခဲ့ပြီး မတ် ၂၀ ရက်ကမှ ပြန်လုပ်ပေးနေတာပါ။
အဲဒီလုပ်ငန်းစဥ်ပြန်စပြီး ရက်ပိုင်းအကြာမှာ ငလျင်လှုပ်ခတ်ခဲ့ကာ ငလျင်ကြောင့် အလုပ်သမားဝန်ကြီးဌာန၊ အမြဲတမ်းအတွင်းဝန် သေဆုံးခဲ့တယ်လို့ ဌာနတွင်း သတင်းတွေအရ သိရပါတယ်။
