အာဏာသိမ်းစစ်ကောင်စီကို တော်လှန်နေကြတဲ့ မွန်တော်လှန်ရေးအဖွဲ့တွေကို ပါဝင်ခွင့်မပြုဘဲ စစ်ကောင်စီ ရွေးကောက်ပွဲကို ထောက်ခံအားပေးကြတဲ့ မွန်ညီညွတ်ရေးပါတီ MUP အပါအဝင် တခြားသောအဖွဲ့တွေ တက်ရောက်ကြမယ့် မွန်အမျိုးသားညီလာခံကို မွန်တော်လှန်ရေးအဖွဲ့တွေက ကန့်ကွက်ရှုတ်ချကြောင်း သဘောထားထုတ်ပြန်ခဲ့ကြပါတယ်။
မွန်ပြည်နယ်၊ မော်လမြိုင်မြို့၊ ဈေးကြိုရပ်ကွက်ရှိ ရာမညနိကာယ ဓာတုမာလာ မွန်ပရိယတ္တိကျောင်းတိုက်မှာ ဧပြီ ၂ ရက်မှ ၅ ရက်အထိ အမျိုးသားရေးဆိုင်ရာ မူဝါဒတွေကို အတည်ပြုသုံးသပ်ဖို့ ရည်ရွယ်ချက်တွေနဲ့ ၂၀၂၅ ခုနှစ် မွန်အမျိုးသားညီလာခံကို မွန်ပြည်သစ်ပါတီ ဗဟိုကနေ ဦးဆောင်ပြီး ကျင်းပနေတာပါ။
မွန်ပြည်သစ်ပါတီ စစ်အာဏာရှင်တိုက်ဖျက်ရေး (NMSP-AD) အနေနဲ့ မော်လမြိုင်မြို့ပေါ်မှာ မွန်အမျိုးသားညီလာခံကျင်းပတာဟာ မွန်တမျိုးသားလုံးရဲ့အသံကို ကိုယ်စားပြုနိုင်မှာ မဟုတ်သလို မွန်အမျိုးသားတွေရဲ့ ကိုယ့်ကြမ္မာကိုယ် ဖန်တီးပိုင်ခွင့်ရရှိဖို့ ရုန်းကန်တိုက်ပွဲဝင်နေချိန် နိုင်ငံရေးအမြင်တွေလည်း ကွဲပြားနေတဲ့အတွက် အမျိုးသားရေးလုပ်ငန်းစဉ်တွေကို တဘက်တည်းအမြင်နဲ့ ဆုံးဖြတ်နေတာက အမျိုးသားညီညွတ်ရေးကို ပိုမို ပျက်ပြားစေနိုင်တယ်လို့ ထုတ်ပြန်ပြောဆိုထားပါတယ်။
မွန်အမျိုးသားညီလာခံ ဆိုတာ ပြည်တွင်း ပြည်ပက မွန်လူမျိုးတွေ ပါဝင်ကြရမှာဖြစ်ပြီး လက်ရှိ MUP ပါတီက ဦးဆောင်ကျင်းပတဲ့ အမျိုးသားညီလာခံ ဆိုတာက စစ်ကောင်စီနဲ့ ပနံသင့်တဲ့ အဖွဲ့တွေသာ တက်ရောက်နိုင်တာကြောင့် မွန်တမျိုးသားလုံးကို ကိုယ်စားမပြုနိုင်ဘူးလို့ မွန်ပြည်ကာကွယ်ရေးတပ် (MSDF) ဥက္ကဋ္ဌ ဒေါက်တာသီရီမွန်ချမ်းက DVB ကိုပြောပါတယ်။
“အဓိကကတော့ ညီလာခံရဲ့ရည်မှန်းချက်တခုဖြစ်တဲ့ အမျိုးသားညီညွတ်ရေး တည်ဆောက်ဖို့ဆိုတဲ့ ရည်မှန်းချက်ကိုလည်း ရရှိနိုင်မှာမဟုတ်ဘူး။ ဘာလို့လဲဆိုတော့ စစ်ကောင်စီနဲ့ ပနံသင့်တဲ့အဖွဲ့နဲ့ စစ်ကောင်စီကို လက်နက်ကိုင်ဆန့်ကျင်နေတဲ့အဖွဲ့တို့အကြား သွေးစည်းညီညွတ်မှုကို ပျက်ပြားစေနိုင်ပါတယ်။ ရလဒ်အနေနဲ့ကတော့ စစ်ကောင်စီက ကျင်းပမယ့် ရွေးကောက်ပွဲမှာ ပါဝင်ဖို့အတွက် manage (တာဝန်ယူ)လုပ်တဲ့ ရလဒ်တခုပဲ ရလာလိမ့်မယ်လို့ ယုံကြည်ပါတယ်။”
မွန်ပြည်သစ်ပါတီက ဦးဆောင်ကျင်းပတဲ့ မွန်အမျိုးသားညီလာခံ (၂၀၂၅ ခုနှစ်) ကို မွန်ပြည်သစ်ပါတီ ကိုယ်စားလှယ်တွေ၊ မွန်ညီညွတ်ရေးပါတီ ကိုယ်စားလှယ်တွေ၊ အရပ်ဘက် လူမှုအဖွဲ့အစည်းက ကိုယ်စားလှယ်တွေ၊ သံဃာတော်တွေအပြင် ဖိတ်ကြားထားသူတွေနဲ့ လေ့လာသူ စုစုပေါင်း ၂၀၀ ကျော် တက်ရောက်ခဲ့ကြကြောင်း သိရပါတယ်။
မွန်အမျိုးသားလွတ်မြောက်ရေးတပ်တော် (MLA) ကတော့ စစ်ကောင်စီ သက်ဆိုးရှည်အောင် မွန်အမျိုးသားညီလာခံ ဖြစ်မြောက်ရေး ဦးစီးဦးဆောင်ကော်မတီကနေ ကျင်းပတဲ့ မွန်အမျိုးသားညီလာခံကို ရှုတ်ချကန့်ကွက်တယ်လို့ ဧပြီ ၁ ရက်က အသိပေး ကြေညာထားပါတယ်။
လက်ရှိ မြန်မာနိုင်ငံ ဒေသတချို့မှာ ငလျင်ဒဏ် ဆိုးရွားစွာ ခံစားနေရချိန် မွန်အမျိုးသားညီလာခံ ကျင်းပတာဟာ လုံးဝမဖြစ်သင့်ဘူးလို့ မြို့ခံတွေအကြား ဝေဖန်မှုတွေလည်း ရှိနေပါတယ်။
