ဧရာဝတီတိုင်း ဖျာပုံမြို့အနီး ပင်လယ်ပြင်ကို ဗဟိုပြုပြီး အင်အား ရစ်ချ်တာစကေး ၄ ဒသမ ၉ အဆင့်ရှိ အင်အားအနည်းငယ်ရှိတဲ့ မြေငလျင်တခု မြန်မာစံတော်ချိန် ဧပြီ ၂ ရက် ညက လှုပ်ခတ်ခဲ့ပါတယ်။
ဧပြီ ၂ ရက် မြန်မာစံတော်ချိန် ည ၁၀ နာရီ ၅၇ မိနစ်၊ ၁၄ စက္ကန့် အချိန်မှာ ကမ္ဘာအေးမြေငလျင်စခန်းမှ တောင်-အနောက်တောင်ဘက် ၉၃ မိုင်ခန့်ကွာဝေးတဲ့ မြန်မာ့ပင်လယ်ပြင် ဖျာပုံမြို့ရဲ့ တောင်-အရှေ့တောင်ဘက် ၅၃ မိုင်ခန့်အကွာ၊ အနက် ၂၇ ကီလိုမီတာကို ဗဟိုပြုပြီး မြေငလျင်လှုပ်သွားတာလို့ မိုးဇလဌာနက ထုတ်ပြန်ပါတယ်။
ငလျင်သက်ရောက်မှုဒဏ်ကို ဧရာဝတီတိုင်းထဲက ဖျာပုံ၊ ဘိုကလေးစတဲ့ မြို့နယ်အများပြားနဲ့ ရန်ကုန်တိုင်းထဲက မြို့နယ်တချို့အပေါ် သက်ရောက်မှုရှိခဲ့တယ်လို့ မြို့ခံတွေက လူမှုကွန်ယက်မှာ ရေးသားထားပါတယ်။
အဲဒီလို ပင်လယ်ပြင်ကို ဗဟိုပြုပြီး ငလျင်လှုပ်ခတ်သွားတဲ့အတွက် ပင်လယ်ပြင်ထဲ လှိုင်းကြီးနိုင်တာကြောင့် ကမ်းဝေး ရေယာဉ်တွေအနေနဲ့ အခုရက်ပိုင်း ရပ်ဆိုင်းထားသင့်တယ်လို့ ဖျာပုံမြို့နယ်က ရေလုပ်သားတယောက်က ပြောပါတယ်။
အခု ငလျင်လှုပ်ခတ်မှုနဲ့ပတ်သက်ပြီ မိုးဇလဌာနက ထုတ်ပြန်ထားသလို မြန်မာနိုင်ငံမှာ အင်အားအလွန်ပြင်းထန်တဲ့ ငလျင်ကြီးလှုပ်ခဲ့ပြီးနောက်မှာ နောက်ဆက်တွဲ ငလျင်တွေ လှုပ်ခဲ့တယ်လို့လည်း ကြိုတင် အသိပေးထားပါတယ်။
မြန်မာနိုင်ငံမှာ မတ် ၂၈ ရက်က လှုပ်ခတ်ခဲ့တဲ့ လူတွေအသေအပျောက်များပြီး ထိခိုက်ပျက်စီးမှု ကြီးကြီးမားမားရှိခဲ့တဲ့ အင်အားပြင်း ငလျင်ကြီးလှုပ်ခတ်ပြီးနောက် ခုရက်ပိုင်းအတွင်း နောက်ဆက်တွဲငလျင်တွေ ရာနဲ့ချီပြီး ဆက်တိုက်လှုပ်နေတာဖြစ်ပါတယ်။
